കാനഡയിലെ ബ്രിട്ടീഷ് കൊളംബിയയിലുള്ള ടംബ്ലർ റിഡ്ജ് സെക്കൻഡറി സ്‌കൂളിൽ എട്ട് പേരുടെ മരണത്തിനിടയാക്കിയ വെടിവെപ്പ് നടത്തിയ ജെസ്സി വാൻറൂട്ട്‌സെലറുടെ (Jesse VanRootselaar) ചാറ്റ് ജിപിടി (ChatGPT) അക്കൗണ്ട് മാസങ്ങൾക്ക് മുൻപ് തന്നെ നിരോധിച്ചിരുന്നതായി ഒപെൻഎഐ (OpenAI) വെളിപ്പെടുത്തി. 2025 ജൂണിൽ തന്നെ അക്കൗണ്ട് ദുരുപയോഗം ചെയ്യുന്നതായി കണ്ടെത്തിയതിനെത്തുടർന്നാണ് നടപടി സ്വീകരിച്ചത്. ഫെബ്രുവരി 10-ന് നടന്ന ദാരുണമായ വെടിവെപ്പിന് ശേഷം ഒപെൻഎഐ തന്നെ നേരിട്ട് കനേഡിയൻ പോലീസിനെ (RCMP) സമീപിച്ച് വിവരങ്ങൾ കൈമാറുകയായിരുന്നു.

അക്കൗണ്ട് നിരോധിച്ച സമയത്ത് വിവരം പോലീസിനെ അറിയിക്കുന്നതിനെക്കുറിച്ച് കമ്പനി ആലോചിച്ചിരുന്നു. എന്നാൽ അന്ന് നടത്തിയ പരിശോധനയിൽ ഉടനടി വലിയൊരു ആക്രമണത്തിനുള്ള (Imminent Threat) കൃത്യമായ തെളിവുകൾ ലഭിക്കാത്തതിനാലാണ് പോലീസിനെ അറിയിക്കാതിരുന്നതെന്ന് ഒപെൻഎഐ വക്താവ് പറഞ്ഞു. വെടിവെപ്പിന് ഏഴ് മാസം മുൻപേ അക്കൗണ്ട് നിരോധിച്ചിരുന്നു എന്നത് പ്രതിയുടെ മാനസിക നിലയെക്കുറിച്ചും ഓൺലൈൻ പ്രവർത്തനങ്ങളെക്കുറിച്ചും കൂടുതൽ അന്വേഷണത്തിലേക്ക് നയിക്കുന്നുണ്ട്.

ജെസ്സി വാൻറൂട്ട്‌സെലർ സ്വന്തം അമ്മയെയും അർദ്ധസഹോദരനെയും വീട്ടിൽ വെച്ച് കൊലപ്പെടുത്തിയ ശേഷമാണ് സ്‌കൂളിലെത്തി അഞ്ച് വിദ്യാർത്ഥികളെയും ഒരു അധ്യാപികയെയും വെടിവെച്ച് കൊന്നത്. തുടർന്ന് പ്രതി സ്വയം വെടിവെച്ച് മരിക്കുകയായിരുന്നു. പ്രതിയുടെ യൂട്യൂബ് ചാനലും റോബ്ലോക്സ് (Roblox) അക്കൗണ്ടും അതത് കമ്പനികൾ നിരോധിച്ചിട്ടുണ്ട്. പ്രതി സോഷ്യൽ മീഡിയയിലൂടെ പങ്കുവെച്ചിരുന്ന വിവരങ്ങൾ പോലീസ് സൂക്ഷ്മമായി പരിശോധിച്ചു വരികയാണ്.

ആൺകുട്ടിയായി ജനിച്ച ജെസ്സി പെൺകുട്ടിയായി മാറുന്ന ട്രാൻസിഷൻ ഘട്ടത്തിലായിരുന്നുവെന്ന് പോലീസ് അറിയിച്ചു. പ്രതി ഉപയോഗിച്ചിരുന്ന തോക്കുകൾ നിയമപരമായി കൈവശം വെക്കാവുന്നവയായിരുന്നുവെന്നാണ് പ്രാഥമിക നിഗമനം. ഈ ദാരുണ സംഭവം കാനഡയിലെ തോക്ക് നിയന്ത്രണ നിയമങ്ങളെക്കുറിച്ചും ഓൺലൈൻ നിരീക്ഷണ സംവിധാനങ്ങളെക്കുറിച്ചും വലിയ ചർച്ചകൾക്ക് വഴിവെച്ചിരിക്കുകയാണ്.

English Summary: OpenAI has confirmed that it flagged and banned a ChatGPT account belonging to the Tumbler Ridge school shooter, Jesse VanRootselaar, seven months before the tragic incident. The account was closed in June 2025 for violating usage policies, although at the time, the company determined that the activity did not meet the threshold for referral to law enforcement as it did not indicate an imminent threat. Following the February 10 shooting, which left eight people dead, OpenAI proactively reached out to the RCMP to assist in the investigation. Other platforms like YouTube and Roblox have also removed accounts associated with the suspect.

Tags: Malayalam News, News Malayalam, Latest Malayalam News, Vachakam News, Tumbler Ridge School Shooting, ChatGPT, OpenAI, Canada News, School Safety, Jesse VanRootselaar