ഒട്ടാവ: കാനഡയിൽ പ്രവിശ്യകളുടെ വിഘടനവാദ നീക്കങ്ങൾ ശക്തമാകുന്നതിനിടെ, രാജ്യത്തിന്റെ ഐക്യത്തിനായി നിലകൊള്ളുമെന്ന് പ്രഖ്യാപിച്ച് പ്രതിപക്ഷ നേതാവ് പിയറി പൊയ്‌ലിവ്. കാനഡയിൽ നിന്ന് അൽബർട്ട പ്രവിശ്യ വേർപെട്ട് സ്വതന്ത്ര രാജ്യമാകണമെന്ന ആവശ്യവുമായി ഒരു വിഭാഗം രംഗത്തെത്തിയ പശ്ചാത്തലത്തിലാണ് അദ്ദേഹത്തിന്റെ പ്രതികരണം.

ഒട്ടാവയിൽ മാധ്യമപ്രവർത്തകരോട് സംസാരിക്കവെ, താൻ നയിക്കുന്ന കൺസർവേറ്റീവ് പാർട്ടി പൂർണ്ണമായും ഫെഡറലിസ്റ്റ് നിലപാടിലുറച്ചു നിൽക്കുന്നവരാണെന്ന് പൊയ്‌ലിവ് വ്യക്തമാക്കി. തന്റെ പാർട്ടിയിലെ ഒരംഗം പോലും അൽബർട്ട വിഘടനവാദത്തെ പിന്തുണയ്ക്കുന്നില്ലെന്നും അദ്ദേഹം കൂട്ടിച്ചേർത്തു. 

അൽബർട്ടയെ ഒരു പ്രത്യേക രാജ്യമാക്കണമെന്ന ലക്ഷ്യത്തോടെ സ്റ്റേ ഫ്രീ അൽബർട്ട (Stay Free Alberta) എന്ന സംഘടന ഹിതപരിശോധനയ്ക്കായി ഒപ്പുശേഖരണം നടത്തിവരികയാണ്. മെയ് മാസത്തിനുള്ളിൽ ഏതാണ്ട് 1.78 ലക്ഷം ഒപ്പുകൾ ശേഖരിക്കാനാണ് ഇവരുടെ നീക്കം.

നിലവിലെ നിയമമനുസരിച്ച് ഒരു പ്രവിശ്യയ്ക്ക് ഏകപക്ഷീയമായി കാനഡയിൽ നിന്ന് വേർപെടാൻ കഴിയില്ല. ഹിതപരിശോധന വിജയിച്ചാൽ പോലും കേന്ദ്ര ഗവൺമെന്റും മറ്റ് വിഭാഗങ്ങളുമായും ദീർഘമായ ചർച്ചകൾ ആവശ്യമാണ്. താൻ ജനിച്ചുവളർന്നത് അൽബർട്ടയിലാണെന്നും എന്നാൽ ഒരു കനേഡിയൻ എന്ന നിലയിൽ രാജ്യത്തിന്റെ ഐക്യത്തിൽ അഭിമാനിക്കുന്നുവെന്നും പൊയ്‌ലിവ് പറഞ്ഞു.

ലിബറൽ ഗവൺമെന്റിന്റെ നയങ്ങളാണ് ഇത്തരം വിഘടനവാദ ചിന്തകൾക്ക് കാരണമാകുന്നതെന്ന് അദ്ദേഹം കുറ്റപ്പെടുത്തി. അൽബർട്ടയുടെ ഊർജ്ജ മേഖലയെയും ക്യുബെക്കിന്റെ അധികാര പരിധികളെയും ഒട്ടാവ അടിച്ചമർത്തുന്നതാണ് ജനങ്ങളിൽ പ്രതിഷേധമുണ്ടാക്കുന്നതെന്ന് അദ്ദേഹം ജനുവരിയിൽ നടന്ന പാർട്ടി കൺവെൻഷനിൽ ചൂണ്ടിക്കാട്ടിയിരുന്നു.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്