ആയിരക്കണക്കിന് ജീവനക്കാരെ പിരിച്ചു വിട്ടിട്ടും ഉന്നതരുടെ ബോണസ് 200 ശതമാനം കൂട്ടി; വൻ വിവാദത്തിൽ മെറ്റ

FEBRUARY 24, 2025, 2:58 AM

കാലിഫോര്‍ണിയ: മെറ്റ ആയിരക്കണക്കിന് ജീവനക്കാരെ പിരിച്ചു വിട്ട വാർത്ത ഏറെ ചർച്ചയായിരുന്നു. എന്നാൽ ഇത്രയും തൊഴിലാളികളെ പിരിച്ചു വിട്ടപ്പോൾ കമ്പനിയിലെ മുതിര്‍ന്ന എക്‌സിക്യൂട്ടീവുകളുടെ ബോണസ് കുത്തനെ വര്‍ധിപ്പിച്ചു എന്നാണ് ലഭിക്കുന്ന വിവരം. ഇത് വലിയ രീതിയിൽ വിവാദമായിട്ടുണ്ട്.

പുതിയ തീരുമാന പ്രകാരം മെറ്റ എക്സിക്യൂട്ടീവുകൾക്ക് ഇനി മുതല്‍ അടിസ്ഥാന ശമ്പളത്തിന്‍റെ 200 ശതമാനം വരെ ബോണസ് ലഭിക്കും എന്നാണ് പുറത്തു വരുന്ന വിവരം. മുമ്പ് ഇത് 75% മാത്രമായിരുന്ന സ്ഥാനത്താണ് ഇപ്പോള്‍ ബോണസ് കുത്തനെ കൂട്ടിയത്. ഈ വർഷം കമ്പനിയിലെ ഉന്നതര്‍ക്ക് വലിയ ബോണസുകൾ വാഗ്ദാനം ചെയ്യുമെന്ന് മെറ്റ ഒരു കോർപ്പറേറ്റ് ഫയലിംഗിൽ ആണ് വ്യക്തമാക്കിയതെന്ന് ആണ് പുറത്തു വരുന്ന റിപ്പോർട്ടുകൾ വ്യക്തമാക്കുന്നത്.

എന്നാൽ മെറ്റയിലെ ഉന്നത എക്സിക്യൂട്ടീവുകളുടെ ശമ്പളം മറ്റ് കമ്പനികളെ അപേക്ഷിച്ച് കുറവായിരുന്നുവെന്നും അതുകൊണ്ടാണ് അവർക്ക് കൂടുതൽ ശമ്പളം നൽകാൻ തീരുമാനിച്ചതെന്നും ആണ് കമ്പനിയുടെ വിശദീകരണം.