ന്യൂയോർക്ക് : യുഎസ് നിയമങ്ങൾ ലംഘിച്ചതിനും വിസാ കാലാവധി കഴിഞ്ഞിട്ടും രാജ്യത്ത് തങ്ങിയതിനും 6,000ത്തിലധികം അന്താരാഷ്ട്ര വിദ്യാർത്ഥി വിസകൾ റദ്ദാക്കിയതായി സ്റ്റേറ്റ് ഡിപ്പാർട്ട്‌മെന്റ് ബിബിസിയോട് പറഞ്ഞു. ആക്രമണം, മദ്യപിച്ച് വാഹനമോടിക്കൽ (DUI), മോഷണം, 'തീവ്രവാദത്തിന് പിന്തുണ നൽകൽ' എന്നിവയാണ് ഇതിൽ ഭൂരിഭാഗം നിയമലംഘനങ്ങളെന്നും ഏജൻസി വ്യക്തമാക്കി.

കുടിയേറ്റത്തിനും അന്താരാഷ്ട്ര വിദ്യാർത്ഥികൾക്കുമെതിരായ ട്രംപ് ഭരണകൂടത്തിന്റെ നിലപാടുകളുടെ ഭാഗമായാണ് ഈ നടപടി. 'തീവ്രവാദത്തിന് പിന്തുണ നൽകൽ' എന്നതുകൊണ്ട് എന്താണ് അർത്ഥമാക്കുന്നതെന്ന് സ്റ്റേറ്റ് ഡിപ്പാർട്ട്‌മെന്റ് വ്യക്തമാക്കുന്നില്ലെങ്കിലും, പാലസ്തീനെ പിന്തുണച്ച് പ്രതിഷേധിച്ച ചില വിദ്യാർത്ഥികളെ ട്രംപ് ഭരണകൂടം ലക്ഷ്യമിട്ടിരുന്നു. ഇവർ യഹൂദ വിരുദ്ധമായ പെരുമാറ്റങ്ങൾ പ്രകടിപ്പിച്ചുവെന്നാണ് ആരോപണം.

റദ്ദാക്കിയ 6,000 വിസകളിൽ, ഏകദേശം 4,000 എണ്ണം നിയമലംഘനങ്ങൾ നടത്തിയതിനാണ്. 'INA 3B' അനുസരിച്ച് 'തീവ്രവാദം' നടത്തിയതിന് 200 -300 വിസകളും റദ്ദാക്കിയതായി സ്റ്റേറ്റ് ഡിപ്പാർട്ട്‌മെന്റ് അറിയിച്ചു. മനുഷ്യജീവന് അപകടമുണ്ടാക്കുന്നതോ യുഎസ് നിയമങ്ങൾ ലംഘിക്കുന്നതോ ആയ പ്രവർത്തനങ്ങളെ 'തീവ്രവാദ പ്രവർത്തനം' എന്ന് ഈ കോഡ് വിശാലമായി നിർവചിക്കുന്നു.

ഈ വർഷം ആദ്യം, അന്താരാഷ്ട്ര വിദ്യാർത്ഥികൾക്കായുള്ള വിസ അപ്പോയിന്റ്‌മെന്റുകൾ ട്രംപ് ഭരണകൂടം താൽക്കാലികമായി നിർത്തിവെച്ചിരുന്നു. ജൂണിൽ അപ്പോയിന്റ്‌മെന്റുകൾ പുനരാരംഭിച്ചപ്പോൾ, കൂടുതൽ സൂക്ഷ്മപരിശോധനക്കായി എല്ലാ അപേക്ഷകരോടും അവരുടെ സോഷ്യൽ മീഡിയ അക്കൗണ്ടുകൾ പൊതുവാക്കാനും ആവശ്യപ്പെട്ടിരുന്നു.

'യുണൈറ്റഡ് സ്റ്റേറ്റ്‌സിലെ പൗരന്മാർ, സംസ്‌കാരം, സർക്കാർ, സ്ഥാപനങ്ങൾ, അല്ലെങ്കിൽ സ്ഥാപക തത്വങ്ങൾ എന്നിവയോടുള്ള ശത്രുതയുടെ ഏതെങ്കിലും സൂചനകൾ' അവർ തിരയുമെന്നും അറിയിച്ചിരുന്നു.

കൂടാതെ, 'അന്താരാഷ്ട്ര ഭീകരർക്കും ദേശീയ സുരക്ഷയ്ക്ക് ഭീഷണിയായവർക്കും വേണ്ടി വാദിക്കുന്നവർ, അവരെ സഹായിക്കുന്നവർ, പിന്തുണയ്ക്കുന്നവർ അല്ലെങ്കിൽ നിയമവിരുദ്ധമായ യഹൂദ വിരുദ്ധ പീഡനങ്ങളോ അക്രമങ്ങളോ നടത്തുന്നവർ' എന്നിവരെയും പരിശോധിക്കാൻ സ്റ്റേറ്റ് ഡിപ്പാർട്ട്‌മെന്റ് ഉദ്യോഗസ്ഥർക്ക് നിർദ്ദേശം നൽകിയിരുന്നു.

മെയ് മാസത്തിൽ, വിദേശകാര്യ സെക്രട്ടറി മാർക്കോ റൂബിയോ, ജനുവരി മുതൽ 'ആയിരക്കണക്കിന്' വിദ്യാർത്ഥി വിസകൾ റദ്ദാക്കിയിട്ടുണ്ടെന്ന് നിയമനിർമ്മാതാക്കളോട് പറഞ്ഞിരുന്നു.

'ഏറ്റവും പുതിയ കണക്ക് എനിക്കറിയില്ല, പക്ഷെ ഇനിയും കൂടുതൽ ചെയ്യാനുണ്ട്,' മെയ് 20ന് റൂബിയോ യുഎസ് നിയമനിർമ്മാതാക്കളോട് പറഞ്ഞു. 'അതിഥികളായി ഇവിടെയുള്ളവരും നമ്മുടെ ഉന്നത വിദ്യാഭ്യാസ സ്ഥാപനങ്ങളെ തടസ്സപ്പെടുത്തുന്നവരുമായ ആളുകളുടെ വിസകൾ റദ്ദാക്കുന്നത് ഞങ്ങൾ തുടരും.'

ഡെമോക്രാറ്റുകൾ ട്രംപ് ഭരണകൂടത്തിന്റെ ഈ നീക്കത്തെ എതിർക്കുകയും, ഇത് നിയമപരമായ നടപടികൾക്ക് നേരെയുള്ള ആക്രമണമാണെന്ന് വിശേഷിപ്പിക്കുകയും ചെയ്തിട്ടുണ്ട്.

വിദേശ വിദ്യാർത്ഥികളെക്കുറിച്ചുള്ള വിവരങ്ങൾ ശേഖരിക്കുന്ന 'ഓപ്പൺ ഡോർസ് ' എന്ന സംഘടനയുടെ കണക്കനുസരിച്ച്, 2023 -24 അധ്യയന വർഷത്തിൽ 210ൽ അധികം രാജ്യങ്ങളിൽ നിന്നുള്ള 1.1 ദശലക്ഷത്തിലധികം അന്താരാഷ്ട്ര വിദ്യാർത്ഥികൾ യുഎസ് കോളേജുകളിൽ പഠനം നടത്തിയിരുന്നു.

പി.പി. ചെറിയാൻ

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

ടെലിഗ്രാം :ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്