ഞെട്ടിച്ച് ട്രംപിന്റെ ഓഹരി ഇടപാടുകള്‍; മൂന്ന് മാസത്തിനിടെ നടത്തിയത് 3,700-ലധികം വ്യാപാരങ്ങള്‍

MAY 18, 2026, 7:56 AM

വാഷിംഗ്ടണ്‍: യു.എസ് പ്രസിഡന്റ് ഡൊണാള്‍ഡ് ട്രംപിന്റെ സാമ്പത്തിക ഇടപാടുകള്‍ സംബന്ധിച്ച പുതിയ വിവരങ്ങള്‍ വാള്‍സ്ട്രീറ്റിലെ സാമ്പത്തിക വിദഗ്ധരെയും രാഷ്ട്രീയ കേന്ദ്രങ്ങളെയും ഒരുപോലെ ഞെട്ടിച്ചിരിക്കുകയാണ്. 2026 ന്റെ ആദ്യ മൂന്ന് മാസങ്ങള്‍ക്കുള്ളില്‍ (ജനുവരി - മാര്‍ച്ച്) ട്രംപോ അദ്ദേഹത്തിന്റെ സാമ്പത്തിക ഉപദേശകരോ ചേര്‍ന്ന് അമേരിക്കന്‍ ഓഹരി വിപണിയില്‍ 3,700 ലധികം ഇടപാടുകള്‍ നടത്തിയെന്ന ഔദ്യോഗിക വിവരങ്ങളാണ് ഇപ്പോള്‍ പുറത്തുവന്നിരിക്കുന്നത്.

യു.എസ് സര്‍ക്കാരിന്റെ നയങ്ങളും നിയന്ത്രണങ്ങളും നേരിട്ട് ബാധിക്കുന്ന വന്‍കിട കമ്പനികളുടെ ഓഹരികളിലാണ് ഈ ഭീമമായ വ്യാപാരം നടന്നിട്ടുള്ളത്. ഇതോടെ ട്രംപ് വീണ്ടും വിവാദങ്ങളിലേക്ക് നീങ്ങുകയാണ്.

ഹെഡ്ജ് ഫണ്ടുകളെ വെല്ലുന്ന വേഗത

പുറത്തുവന്ന സാമ്പത്തിക വിവരങ്ങള്‍ പ്രകാരം പ്രമുഖ കമ്പനികളുടെ കോടിക്കണക്കിന് ഡോളര്‍ മൂല്യമുള്ള ഓഹരികളാണ് ഈ ചുരുങ്ങിയ കാലയളവില്‍ കൈമാറ്റം ചെയ്യപ്പെട്ടത്. ഈ വര്‍ഷം ജനുവരി മുതല്‍ മാര്‍ച്ച് വരെയുള്ള മൂന്ന് മാസങ്ങളില്‍ പ്രതിദിനം ശരാശരി 40-ലധികം ഓഹരി ഇടപാടുകളാണ് ട്രംപിന്റെ പേരില്‍ നടന്നിട്ടുള്ളത്. 2025 ന്റെ അവസാന മൂന്ന് മാസങ്ങളില്‍ വെറും 380 ഇടപാടുകള്‍ മാത്രം നടന്ന സ്ഥാനത്താണ് നിലവിലെ ഈ ഭീമമായ വര്‍ദ്ധനവ് രേഖപ്പെടുത്തിയിരിക്കുന്നത്. ഒരു വന്‍കിട ഹെഡ്ജ് ഫണ്ട് നടത്തുന്നതിന് സമാനമായ ഈ അതിവേഗ വ്യാപാരം വിപണി വിദഗ്ധരെപ്പോലും അമ്പരപ്പിച്ചിരിക്കുകയാണ്.

വിവാദങ്ങള്‍ക്ക് ആക്കം കൂട്ടി സര്‍ക്കാര്‍ നയങ്ങള്‍

അമേരിക്കന്‍ സര്‍ക്കാരിന്റെ നയരൂപീകരണങ്ങളുമായി നേരിട്ട് ബന്ധമുള്ള വന്‍കിട കമ്പനികളുടെ ഓഹരികളിലാണ് ഈ വ്യാപാരം മുഴുവന്‍ കേന്ദ്രീകരിച്ചിരിക്കുന്നത് എന്നതാണ് ഈ ഇടപാടുകളെ സംശയത്തിന്റെ നിഴലിലാക്കുന്നത്. ഭരണകൂടത്തിന്റെ തീരുമാനങ്ങള്‍ ഈ കമ്പനികളുടെ ഓഹരി മൂല്യത്തെ നേരിട്ട് സ്വാധീനിക്കാന്‍ സാധ്യതയുള്ളതിനാല്‍, പ്രസിഡന്റ് പദവിയിലിരിക്കുന്ന ഒരാളുടെ അക്കൗണ്ടില്‍ നിന്ന് ഇത്തരം ഇടപാടുകള്‍ നടക്കുന്നത് ധാര്‍മ്മിക ചോദ്യങ്ങള്‍ ഉയര്‍ത്തുന്നു.

മുന്‍ പ്രസിഡന്റുമാരില്‍ ഭൂരിഭാഗവും തങ്ങളുടെ സാമ്പത്തിക നിക്ഷേപങ്ങള്‍ സ്വതന്ത്രമായ 'ബ്ലൈന്‍ഡ് ട്രസ്റ്റുകളിലേക്ക്' മാറ്റുന്നതായിരുന്നു പതിവ്. എന്നാല്‍ അതില്‍ നിന്നും വിഭിന്നമായി ട്രംപ് സ്വീകരിച്ചിരിക്കുന്ന ഈ ശൈലി വരും ദിവസങ്ങളില്‍ യു.എസ് രാഷ്ട്രീയത്തില്‍ വലിയ ചര്‍ച്ചകള്‍ക്കും പ്രതിപക്ഷ പ്രതിഷേധങ്ങള്‍ക്കും വഴിതുറക്കുമെന്നുറപ്പാണ്.