ആകാശം കീഴടക്കി ഇൻഡിഗോയും എയർ ഇന്ത്യയും; രാജ്യത്തെ വിമാന സർവീസുകളിൽ 91 ശതമാനവും രണ്ട് കമ്പനികൾക്ക് കീഴിൽ

MARCH 30, 2026, 10:16 PM

ന്യൂഡൽഹി: ഇന്ത്യൻ ആഭ്യന്തര വ്യോമയാന വിപണിയിൽ ഇൻഡിഗോയുടെയും എയർ ഇന്ത്യ ഗ്രൂപ്പിന്റെയും ആധിപത്യം തുടരുന്നു. രാജ്യത്തെ ആകെ വിമാന സർവീസുകളുടെ 91 ശതമാനവും ഈ രണ്ട് കമ്പനികളാണ് കൈകാര്യം ചെയ്യുന്നതെന്ന് കേന്ദ്ര സർക്കാർ രാജ്യസഭയെ അറിയിച്ചു.

തൃണമൂൽ കോൺഗ്രസ് എംപി സാഗരിക ഘോഷിന്റെ ചോദ്യത്തിന് സിവിൽ ഏവിയേഷൻ സഹമന്ത്രി മുരളീധർ മൊഹോൾ നൽകിയ മറുപടിയിലാണ് ഈ കണക്കുകളുള്ളത്.

2025-ലെ കണക്കനുസരിച്ച് ഇൻഡിഗോയ്ക്ക് 64 ശതമാനവും എയർ ഇന്ത്യ ഗ്രൂപ്പിന് 27 ശതമാനവും വിപണി വിഹിതമാണുള്ളത്. 2026 ജനുവരിയിലും ഈ നില തുടരുകയാണ്. ഇതോടെ ചെറുകിട വിമാനക്കമ്പനികൾ വിപണിയിൽ നാമമാത്രമായ സാന്നിധ്യമായി ഒതുങ്ങി. എന്നാൽ വിപണിയിലെ ഈ ആധിപത്യത്തിനൊപ്പം തന്നെ യാത്രാക്ലേശവും വർധിക്കുന്നതായാണ് റിപ്പോർട്ടുകൾ സൂചിപ്പിക്കുന്നത്.

കഴിഞ്ഞ ഡിസംബർ മാസത്തിൽ മാത്രം ഇൻഡിഗോ 5,689 ആഭ്യന്തര സർവീസുകൾ റദ്ദാക്കിയതായി സർക്കാർ വെളിപ്പെടുത്തി. പൈലറ്റുമാരുടെ കുറവും പുതിയ ഡ്യൂട്ടി സമയ നിയമങ്ങളും കാരണമുണ്ടായ ഈ പ്രതിസന്ധി മൂലം മൂന്ന് ദിവസത്തിനുള്ളിൽ 3.64 ലക്ഷം യാത്രക്കാരാണ് ദുരിതത്തിലായത്. സർവീസുകൾ റദ്ദാക്കിയതുമായി ബന്ധപ്പെട്ട നഷ്ടപരിഹാരമായി 4,620.5 ലക്ഷം രൂപ ഇൻഡിഗോ ഇതുവരെ നൽകിയിട്ടുണ്ട്.

യാത്രക്കാർക്ക് നേരിട്ട സാമ്പത്തിക നഷ്ടത്തെയോ ബുദ്ധിമുട്ടുകളെയോ കുറിച്ചുള്ള കൃത്യമായ വിവരങ്ങൾ ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ (DGCA) സൂക്ഷിക്കുന്നില്ല എന്ന ഗുരുതരമായ പോരായ്മയും കേന്ദ്രം സമ്മതിച്ചു.

വിമാനങ്ങൾ റദ്ദാക്കിയപ്പോൾ പകരം സംവിധാനം ലഭിക്കാത്തവരോ റീഫണ്ട് കിട്ടാത്തവരോ ആയ യാത്രക്കാരുടെ ഔദ്യോഗിക കണക്കുകളും സർക്കാരിന്റെ പക്കലില്ല. വൻകിട കമ്പനികളുടെ ആധിപത്യം വർധിക്കുമ്പോഴും യാത്രക്കാരുടെ അവകാശങ്ങൾ സംരക്ഷിക്കുന്നതിൽ ഡാറ്റാ ശേഖരണത്തിലെ പോരായ്മകൾ വെല്ലുവിളിയാകുന്നുണ്ട്.