സമുദ്ര അതിർത്തികളിൽ ശത്രുക്കളുടെ നീക്കങ്ങൾ തകർക്കാൻ ഇന്ത്യൻ നാവികസേന വൻ പ്രതിരോധ പരിഷ്കാരത്തിന് ഒരുങ്ങുന്നു. യുദ്ധക്കപ്പലുകളിൽ നിന്ന് വിക്ഷേപിച്ച് 1,000 കിലോമീറ്റർ അകലെയുള്ള ലക്ഷ്യസ്ഥാനങ്ങളെ തകർത്തുകളയാൻ ശേഷിയുള്ള മീഡിയം റേഞ്ച് ലോയിറ്ററിംഗ് മ്യൂണിഷനുകൾ അഥവാ കാമികാസെ (ആത്മഘാതി) ഡ്രോണുകൾ സ്വന്തമാക്കാനാണ് നാവികസേന പദ്ധതിയിടുന്നത്.

പ്രതിരോധ മന്ത്രാലയം ഇതിനായി ഇൻഫോർമേഷൻ ഫോർ റിക്വസ്റ്റ് (RFI) പുറപ്പെടുവിച്ചിട്ടുണ്ട്. കടലിലെ ശത്രു യുദ്ധക്കപ്പലുകൾക്ക് പുറമെ കരയിലുള്ള സൈനിക കേന്ദ്രങ്ങളും തകർക്കാൻ ഈ ഡ്രോണുകൾക്ക് സാധിക്കും. 9 മണിക്കൂർ വരെ ലക്ഷ്യസ്ഥാനത്തിന് മുകളിൽ തങ്ങിനിന്ന് നിരീക്ഷണം നടത്താൻ ഇവയ്ക്ക് കഴിയും.

സാധാരണ ആന്റി-ഷിപ്പ് മിസൈലുകളിൽ നിന്നും നിരീക്ഷണ ഡ്രോണുകളിൽ നിന്നും വ്യത്യസ്തമായി പ്രവർത്തിക്കുന്നവയാണ് ലോയിറ്ററിംഗ് മ്യൂണിഷനുകൾ. ശത്രു കേന്ദ്രങ്ങൾ കണ്ടെത്തുന്നതുവരെ ആകാശത്ത് വട്ടമിട്ട് പറക്കാനും ലക്ഷ്യം ഉറപ്പിച്ചാൽ കപ്പലിന് മുകളിലേക്ക് നേരിട്ട് പതിച്ച് സ്ഫോടനം നടത്താനും ഇവയ്ക്ക് പ്രത്യേക ശേഷിയുണ്ട്.

മണിക്കൂറിൽ കുറഞ്ഞത് 139 കിലോമീറ്റർ വേഗതയിൽ സഞ്ചരിക്കുന്ന ഈ ഡ്രോണുകൾക്ക് ആക്രമണ വേളയിൽ വേഗത 370 കിലോമീറ്ററായി ഉയർത്താൻ സാധിക്കും. 15,000 അടി ഉയരത്തിൽ വരെ പറക്കാൻ കഴിയുന്ന ഇവ ഒൻപത് കിലോമീറ്റർ വരെ ദൂരപരിധിയിലുള്ള ദൃശ്യങ്ങൾ വ്യക്തമായി പകർത്തി നൽകും.

കാലാവസ്ഥാ വ്യതിയാനങ്ങളെ പ്രതിരോധിച്ച് മൈനസ് 20 ഡിഗ്രി മുതൽ 60 ഡിഗ്രി വരെയുള്ള കഠിനമായ താപനിലയിൽ പ്രവർത്തിക്കാൻ ഇവയ്ക്ക് കഴിയും. പകലും രാത്രിയും ഒരുപോലെ ലക്ഷ്യസ്ഥാനങ്ങൾ കണ്ടെത്താൻ സഹായിക്കുന്ന ഇൻഫ്രാറെഡ് ക്യാമറകളും ഓട്ടോമാറ്റിക് ട്രാക്കിംഗ് സെൻസറുകളും ഡ്രോണിൽ ഘടിപ്പിച്ചിട്ടുണ്ട്.

ഒരു യുദ്ധക്കപ്പലിൽ നിന്ന് വിക്ഷേപിക്കുന്ന ഡ്രോണിന്റെ നിയന്ത്രണം ആകാശത്തുവെച്ചുതന്നെ മറ്റൊരു യുദ്ധക്കപ്പലിലേക്ക് കൈമാറാൻ സാധിക്കുമെന്നത് ഈ സാങ്കേതികവിദ്യയുടെ പ്രധാന സവിശേഷതയാണ്. തത്സമയ വീഡിയോകൈമാറ്റവും നാവികസേനാ കൺട്രോൾ റൂമുകളിലേക്ക് ഇതിലൂടെ ലഭ്യമാകും.

ശത്രുക്കളുടെ ഇലക്ട്രോണിക് ജാമറുകളെയും സാറ്റലൈറ്റ് തടസ്സപ്പെടുത്തലുകളെയും അതിജീവിച്ച് പ്രവർത്തിക്കാൻ ഈ ഡ്രോണുകൾക്ക് കഴിയും. ഉപഗ്രഹ സന്ദേശങ്ങൾ വിച്ഛേദിക്കപ്പെട്ടാൽ സ്വയം ദിശ കണ്ടെത്തി നിയന്ത്രണ കേന്ദ്രത്തിലേക്ക് തിരികെ പറക്കാനുള്ള സാങ്കേതികവിദ്യയും ഇവയിൽ ഒരുക്കിയിട്ടുണ്ട്.

ഒരു വിക്ഷേപണ കേന്ദ്രത്തിൽ നിന്ന് ഒരേസമയം 10 ഡ്രോണുകൾ വരെ ഒരുമിച്ച് നിയന്ത്രിക്കാൻ സാധിക്കും. ഒരേ സമയം കൂട്ടമായി ആക്രമണം നടത്തുന്ന സ്വാം സാങ്കേതികവിദ്യ ഉപയോഗിക്കാനും ഇതിൽ സൗകര്യമുണ്ട്.

കപ്പലുകളിലെ ഇലക്ട്രോമാഗ്നെറ്റിക് തടസ്സങ്ങൾ ഡ്രോണിന്റെ പ്രവർത്തനത്തെ ബാധിക്കാതിരിക്കാൻ പ്രത്യേക പ്രതിരോധ കവചങ്ങൾ ഒരുക്കിയിട്ടുണ്ട്. ഭാവിയിൽ കൂടുതൽ പുതിയ സെൻസറുകളും മെച്ചപ്പെടുത്തിയ സോഫ്റ്റ്‌വെയറുകളും കൂട്ടിച്ചേർക്കാൻ അനുയോജ്യമായ രീതിയിലാണ് ഇതിന്റെ ഘടന.

ഇന്ത്യൻ സമുദ്രമേഖലയിലും തന്ത്രപ്രധാനമായ പാതകളിലും സുരക്ഷ കർശനമാക്കാൻ ഈ ആത്മഘാതി ഡ്രോണുകൾ നാവികസേനയ്ക്ക് വലിയ കരുത്തേകും. വരും മാസങ്ങളിൽ കരാർ നടപടികൾ പൂർത്തിയാക്കി ഡ്രോണുകൾ പടക്കപ്പലുകളുടെ ഭാഗമാക്കും.

English Summary:

The Indian Navy is planning to acquire medium range loitering munitions capable of striking targets up to 1000 kilometers away from warships. These ship-launched kamikaze drones can loiter for up to 9 hours and accurately attack enemy vessels and land-based installations.

Tags:

Malayalam News, News Malayalam, Latest Malayalam News, Vachakam News, India News, India News Malayalam, Indian Navy Drones, Indian Armed Forces

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്