ഡാളസ്: ഡാലസിൽ നിന്നും പുറത്തിറക്കുന്ന 'ഡി മലയാളി' ഓൺലൈൻ ദിനപത്രത്തിന്റെ സ്വിച്ച് ഓൺ കർമ്മം അമേരിക്കയിലെ മുതിർന്ന മാധ്യമപ്രവർത്തകൻ ബിനോയി സെബാസ്റ്റ്യൻ നിർവ്വഹിച്ചു.

ജനുവരി 26 ഞായറാഴ്ച വൈകിട്ട് 5 മണിക്ക് ഡാലസ് കേരള അസോസിയേഷൻ ഓഫീസിൽ നടന്ന ഇന്ത്യ പ്രസ് ക്ലബ് ഓഫ് നോർത്ത് ടെക്‌സസ് അവാർഡ് വിതരണ ചടങ്ങിലാണ് പ്രകാശനകർമം നിർവ്വഹിക്കപ്പെട്ടത്. എം ഇന്ത്യ പ്രസ് ക്ലബ് ഓഫ് നോർത്ത് ടെക്‌സാസ് പ്രസിഡന്റ് സണ്ണി മാളിയേക്കൽ അധ്യക്ഷത വഹിച്ചു. 

അനുദിനം സാങ്കേതികവിദ്യയിൽ പ്രകടനമാകുന്ന അസൂയാവഹമായ വളർച്ച മാധ്യമ പ്രവർത്തകരംഗത്തും പ്രതിഫലിക്കുന്നു. വാർത്താ ചാനലുകൾ, ഫെയ്‌സ്ബുക്ക്, ട്വിറ്റർ, സ്വകാര്യ ബ്‌ളോഗുകൾ തുടങ്ങിയ സോഷ്യൽ മീഡിയായകളിൽ പ്രത്യക്ഷപ്പെടുന്ന വാർത്തകൾ നിമിഷങ്ങൾക്കകം ലോകത്തെമ്പാടുമുള്ള ജനങ്ങൾക്ക് ലഭ്യമാകുന്നു. ഈ വിഷയങ്ങളെ കുറിച്ചും പൊടിപ്പും തൊങ്ങലും വെച്ചു വാർത്തകൾ സൃഷ്ടിക്കുവാൻ പത്രപ്രവർത്തകർ പ്രകടിപ്പിക്കുന്ന ആവേശം പലപ്പോഴും അതിർവരമ്പുകൾ ലംഘിക്കപ്പെടുന്നു. പത്രപ്രവർത്തകർ കാത്തുസൂക്ഷിക്കുവാൻ ബാധ്യസ്ഥമായ കോഡ് ഓഫ് എത്തിക്‌സ് എന്ന അടിസ്ഥാന പ്രമാണങ്ങൾ പോലും ഇവിടെ ബോധപൂർവ്വം വിസ്മരിയ്ക്കപ്പെടുന്നു. പ്രകാശന കർമം നിര്വഹിക്കുന്നതിനിടയിൽ ബിനോയി സെബാസ്റ്റ്യൻ ചൂണ്ടിക്കാട്ടി. ആധുനിക കാലഘട്ടത്തിൽ പത്രപ്രവർത്തനത്തേയും, പത്രപ്രവർത്തകരേയും അമിതമായി സ്വാധീനിച്ചിരിക്കുന്ന സോഷ്യൽ മീഡിയായുടെ അനിയന്ത്രിതമായ കടന്നു കയറ്റം നിയന്ത്രിക്കപ്പെടേണ്ടതുണ്ട് എന്ന് ബിനോയ് കൂട്ടിച്ചേർത്തു.

'ഡി മലയാളി' ഓൺലൈൻ ദിനപത്രത്തിന്റെ വിജയത്തിനായി രംഗത്തിറങ്ങിയിരിക്കുന്നത് ദ്രശ്യ, പ്രിന്റ്, ഓൺലൈൻ മാധ്യമ രംഗത്ത് സജീവമായി പ്രവർത്തിക്കുന്ന വിവിധ മേഖലകളിൽ പ്രാഗൽഭ്യം തെളിയിച്ച ഡാലസിലെ യുവ പത്രപ്രവർത്തകരാണ്. സാമൂഹികസാംസ്‌കാരിക പ്രാദേശിക വിഷയങ്ങളെക്കുറിച്ചുള്ള അറിയിപ്പുകൾ പ്രതിഫലേച്ഛ കൂടാതെ ജനങ്ങളിലെത്തിക്കുക, അതോടൊപ്പം തന്നെ അമേരിക്കയിലെ മലയാളികൾ അറിഞ്ഞിരിക്കേണ്ട സുപ്രധാന വിഷയങ്ങളെക്കുറിച്ച് ജനങ്ങളെ ബോധവൽക്കരിക്കുക എന്നതാണ്  'ഡി മലയാളി' ദിനപത്രം ലക്ഷ്യമിടുന്നത്.

സണ്ണി മാളിയേക്കൽ, പി.പി. ചെറിയാൻ, ബിജിലി ജോർജ്, റ്റി.സി. ചാക്കോ, ബെന്നി ജോൺ, അനശ്വർ മാമ്പിള്ളി, സാം മാത്യു, രാജു തരകൻ, ലാലി ജോസഫ്, സിജു വി. ജോർജ്, തോമസ് ചിറമേൽ, പ്രസാദ് തിയോടിക്കൽ, ഡോ. അഞ്ജു ബിജിലി എന്നിവർ ഉൾപ്പെടുന്ന വിപുലമായ പത്രാധിപ സമതിയാണ് ഡി മലയാളി ദിനപത്രത്തിന്റെ പ്രവർത്തനങ്ങൾ നിയന്ത്രിക്കുന്നത്. മാർച്ച് ഒന്നു മുതൽ പൂർണമായി ഓൺലൈൻ 'ഡി മലയാളി' ദിനപത്രം സൗജന്യമായി എല്ലാവരുടെയും കൈകളിൽ എത്തിക്കുന്നതിനുള്ള ശ്രമമാണ് അണിയറയിൽ നടന്നുവരുന്നത്.

പി.പി. ചെറിയാൻ

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

ടെലിഗ്രാം :ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്