നയിക്കാന്‍ ഈജിപ്റ്റും സൗദിയും: നാറ്റോ മോഡല്‍ അറബ് സൈന്യം വരുന്നു; ഇസ്രായേല്‍ ഭയക്കണോ ?

SEPTEMBER 14, 2025, 7:41 PM

നാറ്റോ എന്നത് യൂറോപ്യന്‍ രാജ്യങ്ങളുടെ കൂട്ടായ്മയില്‍ പിറന്ന സൈനിക സഖ്യമാണ്. അമേരിക്ക ഉള്‍പ്പെടെയുള്ള വന്‍ ശക്തികള്‍ നാറ്റോ ഭാഗമാണ്. അംഗ രാജ്യങ്ങളുടെ സുരക്ഷയാണ് പ്രധാന അജണ്ട. സമീപകാലങ്ങളില്‍ ഏഷ്യന്‍ രാജ്യങ്ങളില്‍ നടന്ന മിക്ക അധിനിവേശങ്ങള്‍ക്ക് പിന്നിലും ഈ സൈനിക സഖ്യമായിരുന്നുവെന്നാണ് റിപ്പോര്‍ട്ടുകള്‍. അഫ്ഗാനിലും ഇറാഖിലുമൊക്കെ നാറ്റോ അധിനിവേശം നടത്തിയിരുന്നു.

അറബ് ലീഗിലെ അംഗങ്ങളുടെ സൈനികരെയും ആയുധങ്ങളെയും ഉള്‍പ്പെടുത്തി സംയുക്ത സൈനിക സേന സ്ഥാപിക്കാനുള്ള ഈജിപ്റ്റിന്റെ നിര്‍ദ്ദേശം അറബ് രാജ്യങ്ങള്‍ പരിഗണിക്കുന്നുണ്ടെന്ന് ദി നാഷണലിനോട് വൃത്തങ്ങള്‍ പറഞ്ഞു. 2015 ല്‍ ആദ്യമായി ഉയര്‍ന്നുവന്ന ഈ നിര്‍ദ്ദേശം, മുതിര്‍ന്ന ഹമാസ് നേതാക്കളെ ലക്ഷ്യമിട്ട് ഖത്തര്‍ തലസ്ഥാനമായ ദോഹയില്‍ ഇസ്രായേല്‍ നടത്തിയ ആക്രമണത്തിന് മറുപടിയായാണ് പുനരുജ്ജീവിപ്പിക്കുന്നത്. ഈജിപ്റ്റാണ് സഖ്യത്തിന് മുന്‍കൈ എടുക്കുന്നതെന്നാണ് സൂചന. നേരത്തെ ഈ വിഷയം ജിസിസി രാജ്യങ്ങളുടെ ചര്‍ച്ചയിലുണ്ടായിരുന്നു. ഖത്തര്‍ ആക്രമണത്തിന്റെ പശ്ചാത്തലത്തിലാണ് വേഗത്തില്‍ സഖ്യരൂപീകരണത്തിന് നീക്കം നടക്കുന്നത്.

നാവിക, വ്യോമ, കര യൂണിറ്റുകള്‍ അടങ്ങുന്നതായിരിക്കും ഈ സേന, കമാന്‍ഡോകളായും ഭീകരവിരുദ്ധ തന്ത്രങ്ങളിലും പരിശീലനം നേടിയ നിരവധി ഉന്നത സൈനികരെയും ഈ സേന ഉള്‍പ്പെടുത്തുമെന്ന് വൃത്തങ്ങള്‍ അറിയിച്ചു. അറബ് രാജ്യങ്ങളില്‍ സമാധാന പരിപാലന ദൗത്യങ്ങളും ഈ സേന ഏറ്റെടുക്കും.

ഈജിപ്ഷ്യന്‍ സൈനിക ഓഫീസര്‍മാരെ ഉദ്ധരിച്ചാണ് അറബ് സഖ്യസേനയെ കുറിച്ചുള്ള വാര്‍ത്ത രാജ്യാന്തര മാധ്യമങ്ങളില്‍ വന്നിരിക്കുന്നത്. കൂടാതെ ലബ്നോനിലെയും ഇസ്രായേലിലെയും മാധ്യമങ്ങള്‍ ഈ വാര്‍ത്ത റിപ്പോര്‍ട്ട് ചെയ്തിട്ടുണ്ട്. എന്നാല്‍, ഈജിപ്തിലെ സൈന്യം ഔദ്യോഗികമായി വിഷയത്തില്‍ പ്രതികരിച്ചിട്ടില്ല. ദോഹയില്‍ അറബ് ഉച്ചകോടി നടക്കാനിരിക്കെയാണ് പുതിയ റിപ്പോര്‍ട്ട്.

ഖത്തറിലെ അപ്രതീക്ഷിത ആക്രമണം അറബ് മേഖലയില്‍ അസ്ഥിരത പടര്‍ത്തിയിട്ടുണ്ട്. പൊതുവേ സമാധാനപരമായ അന്തരീക്ഷമുള്ള ഖത്തറില്‍, പല വിഷയങ്ങളിലും സമാധാന ശ്രമങ്ങള്‍ക്ക് മധ്യസ്ഥത വഹിക്കുന്ന രാജ്യത്ത് ഇസ്രായേല്‍ ആക്രമണം നടത്തിയതോടെ ജിസിസി രാജ്യങ്ങള്‍ക്ക് അമേരിക്ക നല്‍കുന്ന സുരക്ഷയിലും അവിശ്വാസം വളര്‍ന്നുവെന്നാണ് സൂചന.

2015 ല്‍ ഷാം എല്‍ ഷെയ്ക്കില്‍ നടന്ന അറബ് ഉച്ചകോടിയിലാണ് നാറ്റോ ശൈലിയിലുള്ള ഒരു ഏകീകൃത സൈനിക സേന രൂപീകരിക്കാനുള്ള നിര്‍ദ്ദേശം ഈജിപ്റ്റ് ആദ്യമായി അവതരിപ്പിച്ചത്. ഇത് തത്വത്തില്‍ അംഗീകരിക്കപ്പെട്ടെങ്കിലും തുടര്‍ന്നുള്ള യോഗങ്ങളില്‍ പുരോഗതി ഉണ്ടായില്ല. കാരണം സേനയുടെ കമാന്‍ഡ് ഘടനയും ആസ്ഥാനവും സംബന്ധിച്ച ചില ആശയ കുഴപ്പങ്ങളാണ്. ആ സമയത്ത്, ഇറാന്‍ പിന്തുണയുള്ള ഹൂതികള്‍ യമനിലെ വലിയ പ്രദേശങ്ങള്‍ ഏറ്റെടുത്തതിന് മറുപടിയായാണ് ഈജിപ്ഷ്യന്‍ നിര്‍ദ്ദേശം തയ്യാറാക്കിയത്. യമന്റെ അന്താരാഷ്ട്ര അംഗീകാരമുള്ള സര്‍ക്കാരിന്റെ പക്ഷത്ത് പോരാടുന്നതിനായി സൗദി നേതൃത്വത്തിലുള്ള ഒരു സഖ്യം സ്ഥാപിക്കപ്പെട്ടു.

കെയ്റോയെ സേനയുടെ ആസ്ഥാനമാക്കാന്‍ ഈജിപ്ത് ഇപ്പോള്‍ സമ്മര്‍ദ്ദം ചെലുത്തുന്നതായാണ് മനസ്സിലാക്കുന്നത്. മിഡില്‍ ഈസ്റ്റിലെ ഏറ്റവും വലിയ സൈന്യമെന്ന് അഭിമാനിക്കുന്ന ഈജിപ്റ്റ്, അറബ് ലീഗിലെ 22 അംഗങ്ങള്‍ക്കിടയില്‍ കമാന്‍ഡറുടെ സ്ഥാനം മാറിമാറി നല്‍കണമെന്നും, ആദ്യ ടേം നേതൃസ്ഥാനം ഒരു ഈജിപ്ഷ്യന്‍ ആയിരിക്കണമെന്നും ആഗ്രഹിക്കുന്നു.

മൊത്തത്തിലുള്ള കമാന്‍ഡറെ കൂടാതെ, പങ്കെടുക്കുന്ന രാജ്യങ്ങളില്‍ നിന്ന് തിരഞ്ഞെടുക്കപ്പെട്ട ഒരു ചീഫ് ഓഫ് സ്റ്റാഫ് സേനയില്‍ ഉണ്ടായിരിക്കും. പരിശീലനം, ലോജിസ്റ്റിക്‌സ്, ആയുധ സംവിധാനങ്ങളുടെ ഏകീകരണം എന്നിവ കൈകാര്യം ചെയ്യുന്ന ഒരു പ്ലാനിംഗ് കൗണ്‍സിലും ഉണ്ടായിരിക്കും. സൈന്യത്തിന്റെ വലുപ്പത്തെയും അതിന്റെ കഴിവുകളെയും ആശ്രയിച്ച് ഓരോ രാജ്യത്തിനും സേനയിലേക്കുള്ള സംഭാവനകളുടെ വലുപ്പം വ്യത്യാസപ്പെടും.

യുദ്ധത്തിലോ സമാധാന പരിപാലന ദൗത്യങ്ങളിലോ ബലപ്രയോഗം നടത്തുന്നതിന് ബന്ധപ്പെട്ട രാജ്യത്തിന്റെ ഔപചാരിക അഭ്യര്‍ത്ഥന ആവശ്യമാണ്, കൂടാതെ പങ്കെടുക്കുന്ന എല്ലാ രാജ്യങ്ങളുമായും കൂടിയാലോചിച്ച ശേഷം കമാന്‍ഡറുടെയും ചീഫ് ഓഫ് സ്റ്റാഫിന്റെയും അംഗീകാരവും ആവശ്യമാണ്.

1945ല്‍ സ്ഥാപിതമായതും കെയ്റോ ആസ്ഥാനമായി പ്രവര്‍ത്തിക്കുന്നതുമായ അറബ് ലീഗിന് പതിറ്റാണ്ടുകളായി അംഗങ്ങളെ ബന്ധിപ്പിക്കുന്ന ഒരു സംയുക്ത പ്രതിരോധ കരാര്‍ ഉണ്ടായിരുന്നു. കഴിഞ്ഞ ദശകത്തില്‍ ഈജിപ്ഷ്യന്‍, മറ്റ് അറബ് സൈന്യങ്ങളില്‍ നിന്നുള്ള സേനകള്‍ പലപ്പോഴും സംയുക്ത യുദ്ധ അഭ്യാസങ്ങള്‍ നടത്തിയിട്ടുമുണ്ട്. ഇസ്രായേലിനെതിരായ യുദ്ധങ്ങളില്‍ നിരവധി അറബ് രാജ്യങ്ങളില്‍ നിന്നുള്ള പോരാട്ട യൂണിറ്റുകള്‍ ജോര്‍ദാനിയന്‍, സിറിയന്‍, ഈജിപ്ഷ്യന്‍ സൈനികരോടൊപ്പം പോരാടിയിരുന്നു.

ഇസ്രായേലിന് ആശങ്കയോ ?

പശ്ചിമേഷ്യയിലെ അമേരിക്കന്‍ സൈന്യത്തിന്റെ ഏറ്റവും വലിയ സൈനിക താവളം ഖത്തറിലാണ്. എന്നിട്ടും ഇസ്രായേല്‍ ആക്രമണം തടയാന്‍ സാധിച്ചില്ല. ജിസിസിയിലെ മിക്ക രാജ്യങ്ങളിലും അമേരിക്കന്‍ സൈനികര്‍ തമ്പടിക്കുന്നുണ്ട്. മേഖലയുടെ സുരക്ഷ ചൂണ്ടിക്കാട്ടിയാണ് ഈ സൈനിക ക്യാമ്പുകള്‍. ഇതിന് വലിയ പണവും അറബ് രാജ്യങ്ങള്‍ ചെലവഴിക്കുന്നുണ്ട്. എന്നിട്ടും സുരക്ഷ ഉറപ്പാക്കാനായില്ല എന്നാണ് പൊതുവികാരം.

ഈ സാഹചര്യത്തിലാണ് നേരത്തെ ചര്‍ച്ചയില്‍ ഉണ്ടായിരുന്ന അറബ് സൈന്യം എന്ന ആശയം വീണ്ടും ചര്‍ച്ചയാകുന്നത്. ദോഹയിലെ അറബ്-ഇസ്ലാമിക രാജ്യങ്ങളുടെ ഉച്ചകോടിയില്‍ വിഷയം ചര്‍ച്ച ചെയ്തേക്കും. ഈജിപ്റ്റ് ആയിരിക്കും സൈനിക സഖ്യത്തിന് നേതൃത്വം നല്‍കുക എന്നാണ് റിപ്പോര്‍ട്ടുകളില്‍ പറയുന്നത്. സൗദി അറേബ്യ രണ്ടാം കക്ഷിയാകുമെന്നും സൂചനയുണ്ട്.

അതേസമയം ചില റിപ്പോര്‍ട്ടുകളില്‍ പറയുന്നത് ചര്‍ച്ച പ്രാഥമിക ഘട്ടത്തിലാണെന്നും മുന്നോട്ട് പോയാല്‍ മാത്രമേ ബാക്കി കാര്യങ്ങളില്‍ വ്യക്തത വരൂ എന്നുമാണ്. അറബ് സേന വന്നാല്‍ മേഖലയുടെ സുരക്ഷ ഈ സൈന്യം ഏറ്റെടുത്തേക്കും. എന്നാല്‍ ഇതിനെ സംശയത്തോടെയാണ് ഇസ്രായേല്‍ കാണുന്നത്.