ഭക്ഷ്യ, കൃഷി, തദ്ദേശ വകുപ്പ് മന്ത്രിമാരുടെ യോഗം വിളിച്ച് മുഖ്യമന്തി

SEPTEMBER 9, 2026, 12:29 AM

തിരുവനന്തപുരം: സംസ്ഥാനത്തെ ഭക്ഷ്യ, കൃഷി, തദ്ദേശ വകുപ്പ് മന്ത്രിമാരുടെ സുപ്രധാന യോഗം ബുധനാഴ്ച ചേരും. മുഖ്യമന്ത്രിയുടെ അധ്യക്ഷതയിലാണ് യോഗം. വിവിധ വകുപ്പുകളുമായി ബന്ധപ്പെട്ട നിർണായക തീരുമാനങ്ങൾ ഈ യോഗത്തിൽ ഉണ്ടായേക്കും.

ജനകീയ ഹോട്ടലുകൾക്കുള്ള സബ്‌സിഡി പുനരാരംഭിക്കുക, നെല്ല് സംഭരണത്തിലെ പ്രശ്നങ്ങൾ പരിഹരിക്കുക, മാളുകളിലെ അമിതവില ഈടാക്കൽ തടയുക തുടങ്ങിയ സുപ്രധാന വിഷയങ്ങളാണ് യോഗത്തിന്റെ പ്രധാന അജണ്ട.

കഴിഞ്ഞ ഏപ്രിൽ മാസം മുതൽ ജനകീയ ഹോട്ടലുകൾക്കുള്ള സബ്‌സിഡി വിതരണം നിലച്ചിരിക്കുകയാണ്. ഇത് പല ഹോട്ടലുകളുടെയും ദൈനംദിന പ്രവർത്തനത്തെ ബാധിക്കുകയും പലതും അടച്ചുപൂട്ടൽ ഭീഷണി നേരിടുകയും ചെയ്യുന്ന സാഹചര്യമുണ്ട്.

ഈ പ്രതിസന്ധി മറികടക്കാൻ സബ്‌സിഡി പുനരാരംഭിക്കുന്നതിനെക്കുറിച്ച് സർക്കാർ ഗൗരവമായി ആലോചിക്കുന്നുണ്ട്.

നെല്ല് സംഭരണവുമായി ബന്ധപ്പെട്ട് കർഷകർ നേരിടുന്ന കാലതാമസം ഒഴിവാക്കാനുള്ള സുപ്രധാന തീരുമാനങ്ങളും യോഗത്തിലുണ്ടാകും. നെല്ല് സംഭരിച്ചാലുടൻ തന്നെ കർഷകർക്ക് വേഗത്തിൽ പണം ലഭ്യമാക്കുന്നതിനുള്ള പുതിയ സംവിധാനം ഭക്ഷ്യവകുപ്പിന്റെ പരിഗണനയിലുണ്ട്.