ലൈംഗികാതിക്രമക്കേസ്; രാജി വയ്ക്കണോയെന്ന് മുകേഷ് തീരുമാനിക്കട്ടെയെന്ന് വനിതാ കമ്മീഷന്‍ അധ്യക്ഷ

FEBRUARY 2, 2025, 10:46 PM

തിരുവനന്തപുരം: ലൈംഗിക പീഡനക്കേസില്‍ മുകേഷ് എംഎല്‍എയ്‌ക്കെതിരേ കുറ്റപത്രം സമര്‍പ്പിച്ച സംഭവത്തില്‍ പ്രതികരണവുമായി വനിതാ കമ്മീഷന്‍ അധ്യക്ഷ പി.സതീദേവി.

കോടതി കുറ്റക്കാരനാണെന്ന് കണ്ടെത്തിയാല്‍ മാത്രം രാജി വച്ചാല്‍ മതി. ധാര്‍മികതയുടെ പേരില്‍ രാജി വേണോ എന്ന് തീരുമാനിക്കേണ്ടത് മുകേഷാണെന്നും സതീദേവി പ്രതികരിച്ചു.

കോടതി രണ്ട് വര്‍ഷത്തിലധികം ശിക്ഷ വിധിച്ചാലാണ് എംഎല്‍എ സ്ഥാനം രാജി വയ്‌ക്കേണ്ടി വരിക. കേസിന്‍റെ വിചാരണ നടക്കട്ടെയെന്നും അവർ പറഞ്ഞു.

കഴിഞ്ഞ ദിവസമാണ് മുകേഷ് എംഎല്‍എക്കെതിരായ പീഡനപരാതിയില്‍ പ്രത്യേക അന്വേഷണസംഘം കുറ്റപത്രം സമർപ്പിച്ചത്. മുകേഷിനെതിരെ ഡിജിറ്റല്‍ തെളിവുകള്‍ ഉണ്ടെന്ന് കുറ്റപത്രത്തില്‍ പറയുന്നു. എറണാകുളം ജുഡീഷല്‍ മജിസ്ട്രേറ്റ് കോടതിയിലാണ് കുറ്റപത്രം സമർപ്പിച്ചത്.

മുകേഷ് പരാതിക്കാരിയുമായി നടത്തിയ വാട്സ്‌ആപ്പ് ചാറ്റുകളും, ഇമെയില്‍ സന്ദേശങ്ങളും തെളിവുകളായി ലഭിച്ചിട്ടുണ്ട്. കൂടാതെ സാഹചര്യ തെളിവുകളും സാക്ഷി മൊഴികളും ലഭിച്ചിട്ടുണ്ടെന്നും എസ്‌ഐടി വ്യക്തമാക്കി.

പീഡനത്തിന് പുറമേ ലൈംഗികാതിക്രമത്തിന്‍റെ വകുപ്പും മുകേഷിനെതിരെ ചുമത്തിയിട്ടുണ്ട്. താരസംഘടനയായ അമ്മയില്‍ അംഗത്വം വാഗ്ദാനം ചെയ്ത് പീഡിപ്പിച്ചെന്നായിരുന്നു മുകേഷിനെതിരായ പരാതി.