'മകൾ വിസ്‌മയയ്‌ക്കൊപ്പം മോഹൻലാലും'; ആരാധകർക്ക് ആവേശമായി 'തുടക്കം' പുതിയ പോസ്റ്റർ

JULY 14, 2026, 6:31 AM

കൊച്ചി: ജൂഡ് ആന്തണി ജോസഫ് സംവിധാനം ചെയ്യുന്ന 'തുടക്കം' എന്ന ചിത്രത്തിന്റെ പുതിയ പോസ്റ്റർ പുറത്തിറങ്ങി. ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമിക്കുന്ന ചിത്രത്തിന്റെ പോസ്റ്റർ മോഹൻലാൽ തന്റെ ഔദ്യോഗിക സോഷ്യൽ മീഡിയ പേജുകളിലൂടെയാണ് പങ്കുവെച്ചത്. പോസ്റ്ററിലെ അവതരണം ചിത്രത്തിൽ മോഹൻലാലും നിർണായക വേഷത്തിൽ എത്തുമെന്ന സൂചന നൽകുന്നതായാണ് ആരാധകർ വിലയിരുത്തുന്നത്.

ചിത്രം ഓഗസ്റ്റ് 7-ന് ലോകമെമ്പാടുമുള്ള തിയേറ്ററുകളിൽ റിലീസ് ചെയ്യും. വിസ്മയ മോഹൻലാലാണ് ചിത്രത്തിലെ കേന്ദ്ര കഥാപാത്രത്തെ അവതരിപ്പിക്കുന്നത്. ആശിർവാദ് സിനിമാസിന്റെ ഉടമ ആന്റണി പെരുമ്പാവൂരിന്റെ മകൻ ആശിഷ് ജോ ആന്റണിയും ചിത്രത്തിൽ പ്രധാന കഥാപാത്രമായി എത്തുന്നുണ്ട്. നേരത്തെ മോഹൻലാൽ ചിത്രം 'എമ്പുരാൻ'-ൽ ശ്രദ്ധേയമായ രംഗത്തിലൂടെ ആശിഷ് അഭിനയരംഗത്തേക്ക് അരങ്ങേറ്റം കുറിച്ചിരുന്നു.

കുടുംബപ്രേക്ഷകരെ ലക്ഷ്യമിട്ട് ഒരുക്കുന്ന സസ്പെൻസ് ത്രില്ലറായാണ് 'തുടക്കം' എത്തുന്നതെന്നാണ് അണിയറപ്രവർത്തകർ നൽകുന്ന വിവരം. സായ് കുമാർ, ഗണേഷ് കുമാർ, ബോബി കുര്യൻ എന്നിവരടക്കമുള്ള താരനിരയും ചിത്രത്തിൽ അണിനിരക്കുന്നു.

ഡോ. എമിൽ ആന്റണിയും ഡോ. അനീഷ ആന്റണിയുമാണ് ചിത്രത്തിന്റെ എക്സിക്യൂട്ടീവ് പ്രൊഡ്യൂസർമാർ. ലിനീഷ് നെല്ലിക്കൽ, അഖിൽ കൃഷ്ണ, ജൂഡ് ആന്തണി ജോസഫ് എന്നിവർ ചേർന്നാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്.

പുതിയ പോസ്റ്റർ പുറത്തിറങ്ങിയതോടെ ചിത്രത്തെക്കുറിച്ചുള്ള പ്രേക്ഷക പ്രതീക്ഷയും ചർച്ചകളും സമൂഹമാധ്യമങ്ങളിൽ ശക്തമായിരിക്കുകയാണ്.