മുറിവ് ഉടൻ സോപ്പിട്ട് കഴുകിയില്ല, വൈറസ് അതിവേഗം തലച്ചോറിലേക്ക് വ്യാപിച്ചു; മലപ്പുറത്ത് പേവിഷബാധയേറ്റ് കുട്ടി മരിച്ച സംഭവത്തിൽ ഡോക്‌ടർമാരുടെ വിശദീകരണം

APRIL 29, 2025, 5:45 AM

കോഴിക്കോട്: പേവിഷബാധയേറ്റ് മരിച്ച മലപ്പുറം സ്വദേശിയായ അഞ്ച് വയസുകാരിയുടെ ശരീരത്തിൽ 13 മുറിവുകൾ ഉണ്ടായിരുന്നുവെന്ന് വ്യക്തമാക്കി ചികിത്സിച്ച ഡോക്‌ടർമാർ. തലയിൽ ആഴത്തിലുള്ള നാല് മുറിവുകളുണ്ടായിരുന്നു എന്നും കാലിലും ചുണ്ടിലും മുഖത്തും തോളിലുമാണ് മറ്റുമുറിവുകൾ ഉണ്ടായത് എന്നും ഡോക്ടർമാർ പറയുന്നു.

തലയിലെ ആഴത്തിലുള്ള മുറിവുകളിലൂടെ വൈറസ് അതിവേഗം തലച്ചോറിലേക്ക് വ്യാപിച്ചത് പ്രതിരോധ മരുന്ന് ഫലം ചെയ്യാതിരിക്കാൻ കാരണമായിട്ടുണ്ടാവാമെന്നാണ് ഡോക്‌ടർമാർ വ്യക്തമാക്കുന്നത്. മലപ്പുറം പെരുവള്ളൂർ സ്വദേശി സൽമാൻ ഫാരിസിന്റെ മകൾ സിയ ഫാരിസയാണ് കോഴിക്കോട് മെഡിക്കൽ കോളേജിൽ ചികിത്സയിലിരിക്കെ മരിച്ചത്.

മൃഗങ്ങളുടെ കടിയേറ്റാൽ മുറിവ് സോപ്പും വെള്ളവും ഉപയോഗിച്ച് ആദ്യം കഴുകി വൃത്തിയാക്കണം. എന്നാൽ, സിയയുടെ മുറിവ് വീട്ടിൽ വച്ച് കഴുകി വൃത്തിയാക്കിയിരുന്നില്ല. തിരൂരങ്ങാടി താലൂക്ക് ആശുപത്രിയിൽ എത്തിച്ചശേഷം മാത്രമാണ് കുട്ടിയുടെ മുറിവ് കഴുകിയത്. കുട്ടിക്ക് ഐഡിആർവി വാക്‌സിൻ നൽകിയെങ്കിലും വൈറസ് വ്യാപനം തടയുന്നതിനുള്ള ഇമ്മ്യൂണോ ഗ്ലോബുലിൻ അവിടെവച്ച് നൽകിയിരുന്നില്ലെന്നും ഡോക്‌ടർമാർ വ്യക്തമാക്കി.