പശ്ചിമ ബംഗാൾ വോട്ടർപട്ടിക പുതുക്കൽ: ആശങ്ക പ്രകടിപ്പിച്ച് സുപ്രീം കോടതി

APRIL 13, 2026, 4:42 AM

പശ്ചിമ ബംഗാളിലെ വോട്ടർപട്ടിക പ്രത്യേക തീവ്ര പരിഷ്കരണ (Special Intensive Revision - SIR) നടപടികളിൽ സുപ്രധാനയ ആശങ്കകൾ രേഖപ്പെടുത്തി സുപ്രീം കോടതി . തിരഞ്ഞെടുപ്പ് നടത്താനുള്ള തിരക്കിനിടയിൽ വോട്ടർമാരുടെ അവകാശങ്ങൾ ഹനിക്കപ്പെടരുതെന്ന് കോടതി ഓർമ്മിപ്പിച്ചു. വോട്ടർപട്ടികയിൽ തുടരുക എന്നത് ഒരു പൗരന്റെ ഭരണഘടനാപരമായ അവകാശം മാത്രമല്ല, വൈകാരികമായ ഒന്നുകൂടി ആണെന്ന് ചീഫ് ജസ്റ്റിസ് സൂര്യകാന്ത്, ജസ്റ്റിസ് ജോയ്മാല്യ ബാഗ്ചി എന്നിവരടങ്ങിയ ബെഞ്ച് നിരീക്ഷിച്ചു.

വോട്ടർപട്ടികയിൽ നിന്ന് ഒഴിവാക്കപ്പെട്ടതിനെതിരെ അപ്പീൽ നൽകിയ വോട്ടർമാരുടെ ഹർജി പരിഗണിക്കുകയായിരുന്നു കോടതി. ഏപ്രിൽ 9-ഓടെ വോട്ടർപട്ടിക മരവിപ്പിച്ചതായി തിരഞ്ഞെടുപ്പ് കമ്മീഷൻ (Election Commission of India - ECI) അറിയിച്ചിരുന്നു.

എന്നാൽ, തങ്ങളുടെ അപ്പീലുകളിൽ അനുകൂലമായ തീരുമാനം ഉണ്ടായാൽ വരാനിരിക്കുന്ന നിയമസഭാ തിരഞ്ഞെടുപ്പിൽ വോട്ട് ചെയ്യാൻ അനുവദിക്കണമെന്നും അതിനായി വോട്ടർപട്ടിക മരവിപ്പിച്ച തീയതി നീട്ടണമെന്നുമാണ് ഹർജിക്കാരുടെ ആവശ്യം. അപ്പീൽ നടപടികളോട് തിരഞ്ഞെടുപ്പ് കമ്മീഷൻ സഹകരിക്കുന്നില്ലെന്നും പരാതിക്കാർ കോടതിയെ ബോധിപ്പിച്ചു.

ബംഗാളിലെ വോട്ടർപട്ടിക പുതുക്കൽ പ്രക്രിയയിൽ ചില നടപടിക്രമങ്ങളിലെ വ്യതിയാനങ്ങളും കോടതി ചൂണ്ടിക്കാട്ടി. മറ്റ് സംസ്ഥാനങ്ങളിൽ ഇല്ലാത്ത "ലോജിക്കൽ ഡിസ്ക്രെപ്പൻസി" (Logical discrepancy) എന്ന പുതിയൊരു വിഭാഗം ബംഗാളിൽ മാത്രം കമ്മീഷൻ കൊണ്ടുവന്നതിനെ കോടതി ചോദ്യം ചെയ്തു. 2002-ലെ വോട്ടർപട്ടികയിലുള്ളവർ രേഖകൾ ഹാജരാക്കേണ്ടതില്ലെന്ന് ബിഹാർ കേസിൽ കമ്മീഷൻ പറഞ്ഞ കാര്യവും ബെഞ്ച് ഓർമ്മിപ്പിച്ചു. വോട്ടർമാരുടെ പരാതികൾ പരിശോധിക്കാൻ ശക്തമായ ഒരു അപ്പീൽ സംവിധാനം ആവശ്യമാണെന്നും കോടതി വ്യക്തമാക്കി.

വോട്ടർപട്ടികയുമായി ബന്ധപ്പെട്ട രേഖകൾ പരിശോധിക്കുമ്പോൾ ഉദ്യോഗസ്ഥർക്ക് പിഴവ് സംഭവിക്കാൻ സാധ്യതയുണ്ടെന്നും ജസ്റ്റിസ് ബാഗ്ചി നിരീക്ഷിച്ചു. പ്രതിദിനം ആയിരക്കണക്കിന് അപേക്ഷകൾ പരിശോധിക്കുമ്പോൾ 70 ശതമാനം കൃത്യത പാലിച്ചാൽ പോലും അത് മികച്ചതാണെന്ന് കരുതേണ്ടി വരും, അതിനാൽ തെറ്റുകൾ തിരുത്താൻ വ്യക്തമായ വേദി വേണം. പശ്ചിമ ബംഗാളിൽ ഏപ്രിൽ 23, 29 തീയതികളിലായി രണ്ട് ഘട്ടങ്ങളിലായാണ് നിയമസഭാ തിരഞ്ഞെടുപ്പ് നടക്കുന്നത്. മെയ് 4-നാണ് വോട്ടെണ്ണൽ.