കർണാടക കോൺഗ്രസിലെ രാഷ്ട്രീയ പ്രതിസന്ധിക്ക് താൽക്കാലിക വിരാമം; രാമലിംഗ റെഡ്ഡി രാജി പിൻവലിക്കാൻ തീരുമാനിച്ചു

JUNE 6, 2026, 6:00 AM

ബെംഗളൂരു: കർണാടക മന്ത്രിസഭയിലെ പ്രതിസന്ധിക്ക് താൽക്കാലിക വിരാമം. മന്ത്രിസ്ഥാനം രാജിവെച്ചിരുന്ന കോൺഗ്രസ് നേതാവ് രാമലിംഗ റെഡ്ഡി രാജി പിൻവലിച്ചതായി കർണാടകത്തിന്റെ ചുമതലയുള്ള എഐസിസി ജനറൽ സെക്രട്ടറി രൺദീപ് സിംഗ് സുർജേവാല അറിയിച്ചു.

ചില തെറ്റിദ്ധാരണകളുടെ അടിസ്ഥാനത്തിലാണ് രാജി സമർപ്പിച്ചതെന്നും രാമലിംഗ റെഡ്ഡി പാർട്ടിയുടെ വിലമതിക്കാനാവാത്ത സമ്പത്താണെന്നും സുർജേവാല വ്യക്തമാക്കി. ഇതോടെ രാമലിംഗ റെഡ്ഡി മന്ത്രിയായി തുടരുമെന്ന കാര്യവും ഉറപ്പായി.

തനിക്ക് ആഗ്രഹിച്ച വകുപ്പ് ലഭിക്കാത്തതിനെ തുടർന്നാണ് രാമലിംഗ റെഡ്ഡി മന്ത്രിസ്ഥാനം രാജിവെച്ചത്. ബെംഗളൂരു നഗര വികസനവുമായി ബന്ധപ്പെട്ട 'ബെംഗളൂരു വികസന വകുപ്പ്' ലഭിക്കുമെന്ന പ്രതീക്ഷയിലായിരുന്നെങ്കിലും ആ വകുപ്പ് ലഭിച്ചില്ല. പകരം 'വലിയ-ഇടത്തരം ജലസേചന വകുപ്പ്' ആണ് അദ്ദേഹത്തിന് അനുവദിച്ചത്.

ബെംഗളൂരു വികസന വകുപ്പ് ഒഴികെ മറ്റൊരു വകുപ്പ് ഏറ്റെടുക്കാൻ താൽപര്യമില്ലെന്ന നിലപാടിലായിരുന്നു എട്ടുതവണ എംഎൽഎയായി തിരഞ്ഞെടുക്കപ്പെട്ട രാമലിംഗ റെഡ്ഡി. ഇതാണ് മന്ത്രിസഭയിലെ അസ്വാരസ്യങ്ങൾക്ക് കാരണമായത്.

പ്രശ്നം രൂക്ഷമായതോടെ മുഖ്യമന്ത്രി സിദ്ധരാമയ്യയും ഉപമുഖ്യമന്ത്രി ഡി.കെ. ശിവകുമാറും വിഷയം കോൺഗ്രസ് ഹൈക്കമാൻഡിന്റെ ശ്രദ്ധയിൽപ്പെടുത്തി. ബെംഗളൂരുവിൽ എത്തിയിരുന്ന രാഹുൽ ഗാന്ധിയുമായും ഇരുവരും വിഷയം ചർച്ച ചെയ്തു.

സംഭാഷണത്തിലൂടെ പ്രശ്നം പരിഹരിക്കാനാണ് രാഹുൽ ഗാന്ധി നിർദേശിച്ചതെന്നാണ് വിവരം. അതേസമയം, പരിഹാരം കണ്ടെത്താനാകാത്ത പക്ഷം രാജി സ്വീകരിക്കാമെന്ന നിലപാടും അദ്ദേഹം സ്വീകരിച്ചിരുന്നു. ഇതിന് പിന്നാലെ രൺദീപ് സിംഗ് സുർജേവാല ഇന്ന് രാവിലെ രാമലിംഗ റെഡ്ഡിയുമായി നടത്തിയ ചർച്ചയിലാണ് ഒത്തുതീർപ്പ് രൂപപ്പെട്ടത്.