വാലറ്റ് ഉപയോഗിച്ചില്ലെങ്കില്‍ പണി കിട്ടും; ഫോണ്‍ പേയില്‍ ഇനി നിഷ്‌ക്രിയ വാലറ്റുകള്‍ക്ക് പിഴ ചുമത്തും

JUNE 19, 2026, 5:15 AM

ബംഗളൂരു: ഡിജിറ്റല്‍ പേയ്മെന്റ് രംഗത്തെ പ്രമുഖരായ ഫോണ്‍പെ തങ്ങളുടെ വാലറ്റ് ഉപയോക്താക്കള്‍ക്കായി പുതിയ നിബന്ധനകള്‍ പുറപ്പെടുവിച്ചു. നിശ്ചിത കാലയളവിനുള്ളില്‍ വാലറ്റ് ഉപയോഗിച്ച് ഇടപാടുകള്‍ നടത്താത്തവര്‍ക്ക് ഇനി മുതല്‍ കമ്പനി പിഴ ചുമത്തും. ഒരു വര്‍ഷമായി വാലറ്റ് വഴി ഒരു ഇടപാടും നടത്താത്ത ഉപയോക്താക്കളില്‍ നിന്ന് 100 രൂപയാണ് പിഴയായി ഈടാക്കുക.

സാമ്പത്തിക വര്‍ഷത്തിന്റെ ഓരോ പാദത്തിലും ഈ രീതിയില്‍ പിഴ ഈടാക്കാനാണ് കമ്പനിയുടെ തീരുമാനം. പിഴ ഈടാക്കുന്ന സമയത്ത് ഉപയോക്താവിന്റെ ഫോണ്‍പെ വാലറ്റില്‍ 100 രൂപയോ അതില്‍ കൂടുതലോ ഉണ്ടെങ്കില്‍, ആ തുക വാലറ്റില്‍ നിന്ന് നേരിട്ട് കുറയ്ക്കും. എന്നാല്‍ വാലറ്റില്‍ 100 രൂപ തികച്ചില്ലെങ്കില്‍, ലഭ്യമായ തുക എത്രയാണോ അത് പിഴയായി ഈടാക്കുമെന്നും ഫോണ്‍പെ അറിയിച്ചിട്ടുണ്ട്.

യുപിഐ ഇടപാടുകള്‍ നടത്തിയാലും രക്ഷയില്ല

കഴിഞ്ഞ ഒരു വര്‍ഷത്തിനിടെ വാലറ്റ് വഴി ഒരു ഇടപാടും നടത്താത്തവര്‍ക്ക് മാത്രമായിരിക്കും നിലവില്‍ ഈ പിഴ ബാധകമാകുക. എന്നാല്‍, ഫോണ്‍പെ ആപ്പ് വഴി യുപിഐ ഇടപാടുകളോ, മൊബൈല്‍ റീച്ചാര്‍ജുകളോ നടത്തിയത് കൊണ്ട് മാത്രം ഈ പിഴയില്‍ നിന്ന് ഒഴിഞ്ഞുമാറാനാകില്ല. ക്രെഡിറ്റ് കാര്‍ഡ് പേയ്മെന്റുകള്‍, ഇന്‍ഷുറന്‍സ് പ്രീമിയം അടയ്ക്കല്‍ എന്നിവയും വാലറ്റ് പിഴയില്‍ നിന്ന് ഉപയോക്താവിനെ ഒഴിവാക്കാന്‍ സഹായകരമാകില്ലെന്ന് കമ്പനി വ്യക്തമാക്കുന്നു. ചുരുക്കത്തില്‍, വാലറ്റ് തുക ഉപയോഗിച്ച് തന്നെ ഏതെങ്കിലും തരത്തിലുള്ള ഇടപാടുകള്‍ നടത്തിയിരിക്കണം.

15 ദിവസം മുമ്പ് മുന്നറിയിപ്പ് ലഭിക്കും

വാലറ്റ് ഉപയോഗിക്കാത്തതിന്റെ പേരില്‍ അക്കൗണ്ടില്‍ നിന്ന് പണം ഈടാക്കുന്നതിന് 15 ദിവസം മുമ്പ് ഫോണ്‍പെ ഉപയോക്താക്കള്‍ക്ക് ഔദ്യോഗിക മുന്നറിയിപ്പ് നല്‍കും. ഈ 15 ദിവസത്തെ സമയപരിധിക്കുള്ളില്‍ വാലറ്റ് വഴി എന്തെങ്കിലും ഒരു ഇടപാട് നടത്തിയാല്‍ പിഴയില്‍ നിന്ന് പൂര്‍ണ്ണമായും രക്ഷപ്പെടാം. ആപ്ലിക്കേഷന്റെ മെയിന്റനന്‍സ് ഉള്‍പ്പെടെയുള്ള ആവശ്യങ്ങള്‍ക്കായാണ് ഉപയോക്താക്കളില്‍ നിന്ന് ഈ പിഴത്തുക വിനിയോഗിക്കുകയെന്നും ഫോണ്‍പെ അധികൃതര്‍ വ്യക്തമാക്കി.