നോയിഡ അന്താരാഷ്ട്ര വിമാനത്താവളത്തിന് നരേന്ദ്ര മോദിയുടെ പേര്; യുപി മന്ത്രിസഭയുടെ തീരുമാനം

OCTOBER 9, 2026, 4:16 AM

ലഖ്‌നൗ: ഉത്തർപ്രദേശിലെ ജേവാറിൽ നിർമാണം പൂർത്തിയാക്കിയ നോയിഡ അന്താരാഷ്ട്ര വിമാനത്താവളത്തിന് നരേന്ദ്ര മോദി ഇന്റർനാഷണൽ എയർപോർട്ട് എന്ന് പേര് നൽകാൻ സംസ്ഥാന മന്ത്രിസഭാ യോഗം തീരുമാനിച്ചതായി റിപ്പോർട്ട്. മുഖ്യമന്ത്രി യോഗി ആദിത്യനാഥിന്റെ അധ്യക്ഷതയിൽ ചേർന്ന യോഗത്തിലാണ് ഇതുസംബന്ധിച്ച നിർദേശത്തിന് അംഗീകാരം നൽകിയത്. വിമാനത്താവളത്തിന്റെ പേര് മാറ്റാനുള്ള തീരുമാനം മുഖ്യമന്ത്രി പ്രഖ്യാപിച്ചതായും റിപ്പോർട്ടിൽ പറയുന്നു.

വിമാനത്താവളം സംസ്ഥാനത്തിന് സമ്മാനിച്ചതിന് പ്രധാനമന്ത്രിയോടുള്ള നന്ദി മന്ത്രിസഭ രേഖപ്പെടുത്തിയതായി യോഗി ആദിത്യനാഥ് വ്യക്തമാക്കി. ഉത്തർപ്രദേശിലെ ഏറ്റവും വലിയ വിമാനത്താവളമായി മാറുന്ന പദ്ധതി ഭാവിയിൽ രാജ്യത്തെ പ്രധാന വ്യോമയാന കേന്ദ്രങ്ങളിലൊന്നായി വളരുമെന്നും അദ്ദേഹം പറഞ്ഞു.

ഡൽഹി–ദേശീയ തലസ്ഥാന മേഖലയിലെ വ്യോമഗതാഗത സൗകര്യങ്ങൾ വർധിപ്പിക്കുകയെന്ന ലക്ഷ്യത്തോടെയാണ് അത്യാധുനിക സൗകര്യങ്ങളോടെ വിമാനത്താവളം വിഭാവനം ചെയ്തിരിക്കുന്നത്. റോഡ് ഉൾപ്പെടെയുള്ള മറ്റ് ഗതാഗത സംവിധാനങ്ങളുമായി ബന്ധിപ്പിക്കുന്ന സംയോജിത ഗതാഗത കേന്ദ്രമായാണ് പദ്ധതി രൂപകൽപ്പന ചെയ്തിരിക്കുന്നത്.

വിമാനത്താവളത്തിന്റെ ഒന്നാം ഘട്ടം 2026 മാർച്ച് 28ന് പ്രധാനമന്ത്രി നരേന്ദ്ര മോദി ഉദ്ഘാടനം ചെയ്തതായും ജൂൺ 15ന് ലഖ്‌നൗവിൽ നിന്നുള്ള ഇൻഡിഗോ വിമാനം ഇറങ്ങിയതോടെ വാണിജ്യ പ്രവർത്തനങ്ങൾ ആരംഭിച്ചതായും റിപ്പോർട്ടിൽ പറയുന്നു.

വരാനിരിക്കുന്ന ഉത്തർപ്രദേശ് നിയമസഭാ തിരഞ്ഞെടുപ്പ് മുന്നിൽക്കണ്ടാണ് വിമാനത്താവളത്തിന് പ്രധാനമന്ത്രിയുടെ പേര് നൽകാനുള്ള തീരുമാനമെന്ന രാഷ്ട്രീയ വിലയിരുത്തലുകളും ഉയരുന്നുണ്ട്.