2028 മുതൽ പുതിയ പെട്രോൾ വാഹനങ്ങൾ നിരത്തിലിറങ്ങില്ല; പുതിയ ഇവി നയം പുറത്തിറക്കി ഡൽഹി സർക്കാർ

APRIL 11, 2026, 4:05 AM

ഡൽഹി നഗരത്തിലെ വായുമലിനീകരണം കുറയ്ക്കുന്നതിനായി വിപ്ലവകരമായ മാറ്റങ്ങളുമായി ഡൽഹി സർക്കാർ പുതിയ ഇലക്ട്രിക് വാഹന (EV) നയം 2026-2030 പുറത്തിറക്കി. പെട്രോൾ വാഹനങ്ങൾക്ക് ഘട്ടംഘട്ടമായി നിയന്ത്രണം ഏർപ്പെടുത്തിയും ഇലക്ട്രിക് വാഹനങ്ങൾക്ക് ആനുകൂല്യങ്ങൾ പ്രഖ്യാപിച്ചും നഗരത്തെ പരിസ്ഥിതി സൗഹൃദമാക്കുകയാണ് ഈ നയത്തിന്റെ ലക്ഷ്യം. ഗതാഗത വകുപ്പിന്റെ ഇവി സെൽ പുറത്തിറക്കിയ കരട് നയത്തിന്മേൽ 30 ദിവസത്തിനകം പൊതുജനങ്ങൾക്ക് അഭിപ്രായം അറിയിക്കാം.

പുതിയ നിയമപ്രകാരം 2027 ജനുവരി 1 മുതൽ ഡൽഹിയിൽ പുതിയ ത്രീ-വീലറുകൾ ഇലക്ട്രിക് മോഡലുകൾ മാത്രമായിരിക്കും രജിസ്റ്റർ ചെയ്യാൻ അനുവദിക്കുക. ഇതിനു പിന്നാലെ 2028 ഏപ്രിൽ 1 മുതൽ ഇരുചക്ര വാഹന വിപണിയും പൂർണ്ണമായും ഇലക്ട്രിക്കിലേക്ക് മാറും.

അതായത് 2028 ഏപ്രിലിന് ശേഷം ഡൽഹിയിൽ പുതിയ പെട്രോൾ സ്കൂട്ടറുകളോ ബൈക്കുകളോ രജിസ്റ്റർ ചെയ്യാൻ സാധിക്കില്ല. ശീതകാലത്തെ പുകമഞ്ഞ് കുറയ്ക്കുന്നതിനും വാഹനങ്ങളിൽ നിന്നുള്ള വിഷപ്പുക നിയന്ത്രിക്കുന്നതിനും ഈ നീക്കം അത്യന്താപേക്ഷിതമാണെന്ന് സർക്കാർ കരുതുന്നു.

പരിസ്ഥിതി സംരക്ഷണ നിയമം, മോട്ടോർ വാഹന നിയമം എന്നിവയുടെ അടിസ്ഥാനത്തിലാണ് ഈ പുതിയ മാർഗ്ഗനിർദ്ദേശങ്ങൾ തയ്യാറാക്കിയിരിക്കുന്നത്.

കണക്കുകൾ പ്രകാരം ഡൽഹിയിലെ ശീതകാല മലിനീകരണത്തിന്റെ 23 ശതമാനവും വാഹനങ്ങളിൽ നിന്നാണ്. ഇതിൽ തന്നെ 67 ശതമാനത്തോളം ഇരുചക്ര വാഹനങ്ങളാണ്. ഈ സാഹചര്യത്തിലാണ് ഇരുചക്ര വാഹനങ്ങളെ ഇലക്ട്രിക്കിലേക്ക് മാറ്റുന്നതിന് മുൻഗണന നൽകുന്നത്.

ഇലക്ട്രിക് വാഹനങ്ങൾ വാങ്ങുന്നവർക്കായി വൻ ആനുകൂല്യങ്ങളും നയത്തിൽ വിഭാവനം ചെയ്യുന്നുണ്ട്. 2.25 ലക്ഷം രൂപ വരെ വിലയുള്ള ഇലക്ട്രിക് ഇരുചക്ര വാഹനങ്ങൾക്ക് ആദ്യ വർഷം കിലോവാട്ട് അവറിന് (kWh) 10,000 രൂപ എന്ന നിരക്കിൽ പരമാവധി 30,000 രൂപ വരെ സബ്‌സിഡി ലഭിക്കും. കൂടാതെ നഗരത്തിലുടനീളം ചാർജിംഗ് സ്റ്റേഷനുകളുടെ ശൃംഖല വിപുലീകരിക്കാനും ഡൽഹി സർക്കാർ പദ്ധതിയിടുന്നു.