നീറ്റ് യുജി പരീക്ഷ ചോദ്യപേപ്പർ ചോർച്ച; വീഴ്ചകൾ ഉണ്ടായതായി സമ്മതിച്ചു കേന്ദ്ര സർക്കാർ

MAY 15, 2026, 1:42 AM

ഡൽഹി: നീറ്റ് യുജി പരീക്ഷയിലെ ചോദ്യപേപ്പർ ചോർച്ച സംഭവത്തിൽ സംവിധാനത്തിലെ വീഴ്ചകൾ ഉണ്ടായതായി സമ്മതിച്ചു കേന്ദ്ര സർക്കാർ. പരീക്ഷാ സംവിധാനത്തിൽ പോരായ്മകളുണ്ടെന്ന് അംഗീകരിക്കുന്നതായി കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ വ്യക്തമാക്കി.

ചോദ്യപേപ്പർ ചോർച്ചയെ തുടർന്ന് ഉയർന്ന വിവാദങ്ങളുടെ പശ്ചാത്തലത്തിൽ, നീറ്റ് പരീക്ഷ അടുത്ത വർഷം മുതൽ ഓൺലൈനായി നടത്താൻ സാധ്യതയുണ്ടെന്ന് കേന്ദ്രമന്ത്രി അറിയിച്ചു. വിദ്യാർത്ഥികളുടെ ഭാവിക്ക് മുൻഗണന നൽകുന്നതായും, പരീക്ഷകൾ കൂടുതൽ സുതാര്യവും വിശ്വസനീയവുമാക്കുമെന്നും അദ്ദേഹം പറഞ്ഞു.

അതേസമയം, ചോദ്യപേപ്പർ ചോർച്ചയുമായി ബന്ധപ്പെട്ട അന്വേഷണം തുടരുകയാണ്. “ചോദ്യപേപ്പർ ചോർച്ച മാഫിയയുമായുള്ള പോരാട്ടമാണ് സർക്കാരിന്റെ ലക്ഷ്യം” എന്ന നിലപാടും കേന്ദ്രമന്ത്രി വ്യക്തമാക്കിയിട്ടുണ്ട്.

ഈ സംഭവത്തെ തുടർന്ന് റദ്ദാക്കിയ നീറ്റ് യുജി പരീക്ഷ അടുത്ത മാസം 21-ന് വീണ്ടും നടത്തുമെന്ന് എൻടിഎ അറിയിച്ചു. പരീക്ഷയുമായി ബന്ധപ്പെട്ട ഔദ്യോഗിക വിവരങ്ങൾക്കും അപ്‌ഡേറ്റുകൾക്കും ഉദ്യോഗാർത്ഥികളും രക്ഷിതാക്കളും ഔദ്യോഗിക ചാനലുകൾ മാത്രം ആശ്രയിക്കണമെന്ന് എൻടിഎ നിർദേശിച്ചു. സംശയങ്ങൾക്ക് [email protected] എന്ന ഇമെയിൽ വിലാസത്തിലും 011-40759000, 011-69227700 എന്നീ ഹെൽപ്പ്‌ലൈൻ നമ്പറുകളിലും ബന്ധപ്പെടാമെന്നും അറിയിച്ചു.

ഈ വർഷം ഏകദേശം 22 ലക്ഷം വിദ്യാർത്ഥികളാണ് പരീക്ഷ എഴുതിയത്. ചോദ്യപേപ്പർ ചോർച്ച കേസിൽ സിബിഐ അന്വേഷണം നടക്കുമെന്നും എൻടിഎ വ്യക്തമാക്കി. കൂടാതെ പുനഃപരീക്ഷയ്ക്ക് പുതിയ രജിസ്ട്രേഷനും പരീക്ഷാ ഫീസും ആവശ്യമായിരിക്കില്ലെന്നും അറിയിച്ചിട്ടുണ്ട്.

അതിനിടെ, മാതൃകാ ചോദ്യക്കടലാസുമായി ബന്ധപ്പെട്ടും ആരോപണങ്ങൾ ഉയർന്നിട്ടുണ്ട്. 410 ചോദ്യങ്ങളിൽ 135 എണ്ണം കെമിസ്ട്രി, ബയോളജി വിഭാഗങ്ങളിലായി യഥാർത്ഥ പരീക്ഷയുമായി സാമ്യമുണ്ടായിരുന്നുവെന്ന വിവരം അന്വേഷണ ഉദ്യോഗസ്ഥർ പുറത്തുവിട്ടതായും റിപ്പോർട്ടുകൾ പറയുന്നു.