നീറ്റ് ക്രമക്കേട്: പെണ്‍കുട്ടികളുടെ ഭാവിയില്‍ അനിശ്ചിതത്വം; വിവാഹ വേഷത്തില്‍ ജന്തര്‍ മന്തറില്‍ വേറിട്ട പ്രതിഷേധവുമായി വിദ്യാര്‍ത്ഥിനി

JULY 24, 2026, 10:21 PM

ന്യൂഡല്‍ഹി: നീറ്റ് പരീക്ഷാ ക്രമക്കേടുകള്‍ക്കെതിരെ രാജ്യതലസ്ഥാനത്ത് നടക്കുന്ന വിദ്യാര്‍ത്ഥി പ്രക്ഷോഭങ്ങള്‍ക്ക് കൂടുതല്‍ ജനശ്രദ്ധ നേടിക്കൊടുത്ത് വേറിട്ട പ്രതിഷേധം. ഉത്തരേന്ത്യന്‍ വധുവിന്റെ വേഷമണിഞ്ഞ് ഡല്‍ഹിയിലെ ജന്തര്‍ മന്തറിലെത്തിയ യുവതിയുടെ സമരരീതിയാണ് ഇപ്പോള്‍ സമൂഹമാധ്യമങ്ങളിലും മാധ്യമങ്ങളിലും വലിയ ചര്‍ച്ചയായിരിക്കുന്നത്. 'ആര്‍.ഐ.പി കരിയര്‍, ഷാദി ഡോട്ട് കോം ഹിയര്‍ ഐ കം' എന്ന് എഴുതിയ പ്ലക്കാര്‍ഡും ഏന്തിയാണ് ഈ പെണ്‍കുട്ടി പ്രതിഷേധത്തിന്റെ ഭാഗമായത്.

ചുവന്ന ലെഹങ്കയും പരമ്പരാഗത ആഭരണങ്ങളും മെഹന്തിയും ധരിച്ച് പൂര്‍ണ്ണമായും ഒരു വധുവിന്റെ രൂപത്തിലാണ് യുവതി എത്തിയത്. തുടര്‍ന്ന് മാധ്യമങ്ങള്‍ക്ക് മുന്നില്‍ പോസ് ചെയ്ത ശേഷമാണ് പെണ്‍കുട്ടി താന്‍ നേരിടുന്ന ആശങ്കകള്‍ പങ്കുവെച്ചത്. നീറ്റ് പരീക്ഷയ്ക്കായി ഏറെ പ്രതീക്ഷയോടെ തയ്യാറെടുത്തിരുന്ന വിദ്യാര്‍ത്ഥിയായിരുന്നു താനെന്നും എന്നാല്‍ നിലവിലുണ്ടായ പരീക്ഷാ ക്രമക്കേടുകള്‍ തന്റെയും മറ്റു ലക്ഷക്കണക്കിന് വിദ്യാര്‍ത്ഥികളുടെയും പ്രതീക്ഷ തല്ലിക്കെടുത്തിയെന്നും പെണ്‍കുട്ടി വ്യക്തമാക്കി.

പരീക്ഷാ ഫലങ്ങളിലുണ്ടാകുന്ന ഇത്തരം സുതാര്യതയില്ലായ്മയും ക്രമക്കേടുകളും കാരണം മാതാപിതാക്കള്‍ക്ക് വിദ്യാഭ്യാസ സമ്പ്രദായത്തിലുള്ള വിശ്വാസം നഷ്ടപ്പെടുകയാണ്. മക്കളെ ഉപരിപഠനത്തിന് അയക്കുന്നതിന് പകരം പെട്ടെന്ന് വിവാഹം കഴിപ്പിച്ചു വിടാന്‍ മാതാപിതാക്കള്‍ നിര്‍ബന്ധിതരാകുന്ന അവസ്ഥയാണിപ്പോഴുള്ളത്. നിലവിലെ പരീക്ഷാ ക്രമക്കേടുകളുടെ പൂര്‍ണ്ണ ഉത്തരവാദിത്തം ഏറ്റെടുത്ത് കേന്ദ്ര വിദ്യാഭ്യാസ മന്ത്രി രാജി വെക്കണമെന്നും, അല്ലാത്തപക്ഷം രാജ്യത്തെ പെണ്‍കുട്ടികളുടെ ഭാവി ഇരുളടയുമെന്നും യുവതി കൂട്ടിച്ചേര്‍ത്തു.

സ്വന്തം മാതാപിതാക്കളുടെ പൂര്‍ണ്ണ പിന്തുണയോടെയാണ് താന്‍ ഈ വേറിട്ട പ്രതിഷേധത്തിന് ഇറങ്ങിയതെന്നും പെണ്‍കുട്ടി മാധ്യമങ്ങളോട് പറഞ്ഞു. വിദ്യാര്‍ത്ഥികളുടെ ഭാവി അനിശ്ചിതത്വത്തിലായതോടെ ഡല്‍ഹിയില്‍ ശക്തമായ പ്രക്ഷോഭങ്ങളാണ് നടക്കുന്നത്. പാരമ്പര്യ സമരമുറകളില്‍ നിന്ന് വേറിട്ടുനില്‍ക്കുന്ന ജെന്‍ സീ തലമുറയുടെ ആവിഷ്‌കാരങ്ങള്‍ സമരത്തിന് പുതിയ തലങ്ങള്‍ നല്‍കുന്നുണ്ട്. പരീക്ഷാ സമ്മര്‍ദ്ദവും ക്രമക്കേടുകളും കാരണം ഇരുപത്തഞ്ചോളം വിദ്യാര്‍ത്ഥികള്‍ക്ക് ജീവന്‍ നഷ്ടപ്പെടേണ്ടി വന്ന പശ്ചാത്തലത്തില്‍, ഇത്തരം പ്രതിഷേധങ്ങള്‍ അത്യന്താപേക്ഷിതമാണെന്ന് സമരത്തിന് പിന്തുണയുമായെത്തിയ വിവിധ സാമൂഹിക രംഗത്തെ പ്രമുഖര്‍ അഭിപ്രായപ്പെട്ടു.