ദില്ലിയിൽ കനത്ത മഴ; വിമാന സർവീസുകൾ തടസ്സപ്പെട്ടേക്കാമെന്ന് ഇൻഡിഗോ

APRIL 17, 2026, 10:12 PM

ദേശീയ തലസ്ഥാനമായ ദില്ലിയിൽ കാലാവസ്ഥ പെട്ടെന്ന് മാറിയതിനെത്തുടർന്ന് കനത്ത മഴയും കാറ്റും ഉണ്ടായ സാഹചര്യത്തിൽ വിമാന സർവീസുകൾ തടസ്സപ്പെട്ടേക്കാമെന്ന് ഇൻഡിഗോ എയർലൈൻസ്.

മഴയും മോശം കാലാവസ്ഥയും വിമാനങ്ങളുടെ പ്രവർത്തനത്തെ ബാധിക്കുന്നുണ്ടെന്നും സ്ഥിതിഗതികൾ സൂക്ഷ്മമായി നിരീക്ഷിച്ചു വരികയാണെന്നും ഇൻഡിഗോ അറിയിച്ചു. വിമാനത്താവളത്തിലേക്ക് പുറപ്പെടുന്നതിന് മുൻപായി യാത്രക്കാർ വെബ്സൈറ്റോ ആപ്പോ വഴി തങ്ങളുടെ വിമാനത്തിന്റെ സ്റ്റാറ്റസ് പരിശോധിക്കണമെന്ന് ഇൻഡിഗോ എക്‌സിലൂടെ (X) അഭ്യർത്ഥിച്ചു.

കൂടാതെ, റോഡുകളിൽ മഴ കാരണം ഗതാഗതക്കുരുക്ക് ഉണ്ടാകാൻ സാധ്യതയുള്ളതിനാൽ യാത്രയ്ക്കായി കൂടുതൽ സമയം നീക്കിവെക്കണമെന്നും കമ്പനി നിർദ്ദേശിച്ചു.

കാലാവസ്ഥാ നിരീക്ഷണ കേന്ദ്രത്തിന്റെ (IMD) റിപ്പോർട്ട് പ്രകാരം ഏപ്രിൽ 17 രാത്രിയിൽ ദില്ലിയിൽ ഇടിമിന്നലോടു കൂടിയ മഴയും മണിക്കൂറിൽ 40 കിലോമീറ്റർ വേഗതയിലുള്ള കാറ്റും ഉണ്ടാകാൻ സാധ്യതയുണ്ട്.

എന്നാൽ വരും ദിവസങ്ങളിൽ ചൂട് വർദ്ധിക്കുമെന്നാണ് പ്രവചനം. ഏപ്രിൽ 20 മുതൽ 23 വരെ താപനില 42 ഡിഗ്രി സെൽഷ്യസ് വരെ ഉയർന്നേക്കാം. കടുത്ത ചൂടിനെതിരെ ജാഗ്രത പാലിക്കണമെന്നും കുട്ടികളും പ്രായമായവരും നേരിട്ട് വെയിൽ ഏൽക്കാതിരിക്കാൻ ശ്രദ്ധിക്കണമെന്നും കാലാവസ്ഥാ വകുപ്പ് മുന്നറിയിപ്പ് നൽകി.

നിലവിൽ വടക്കുപടിഞ്ഞാറൻ ഇന്ത്യയിൽ ചൂടിന് നേരിയ ശമനം ലഭിക്കുമെങ്കിലും മധ്യ ഇന്ത്യയിൽ ഉഷ്ണതരംഗം തുടരാനാണ് സാധ്യത.