ഓടുന്ന ട്രെയിനിൽ ഹണിമൂൺ അലങ്കാരം; വൈറൽ സംഭവത്തിന് പിന്നാലെ ചീഫ് ടിക്കറ്റ് ഇൻസ്പെക്ടർക്ക് സസ്‌പെൻഷൻ

JULY 9, 2026, 5:49 AM

ഡൽഹി: ഓടിക്കൊണ്ടിരുന്ന ട്രെയിനിലെ ഫസ്റ്റ് എസി കാബിൻ നവദമ്പതികൾക്കായി ആഡംബരമായി അലങ്കരിച്ച സംഭവം സമൂഹമാധ്യമങ്ങളിൽ വ്യാപകമായി ചർച്ചയായതിന് പിന്നാലെ റെയിൽവേ നടപടി സ്വീകരിച്ചു. സംഭവവുമായി ബന്ധപ്പെട്ട് ചീഫ് ടിക്കറ്റ് ഇൻസ്പെക്ടർ ഗിരീഷ് കുമാറിനെ സസ്‌പെൻഡ് ചെയ്തതായി അധികൃതർ അറിയിച്ചു.

11002 നമ്പർ നന്ദേഡ്–ഗ്രാം എക്സ്പ്രസിലെ ഫസ്റ്റ് എസി കാബിനാണ് നവദമ്പതികൾക്കായി പ്രത്യേകമായി അലങ്കരിച്ചത്. വീഡിയോ പുറത്തുവന്നതോടെ നിരവധി പേർ ആശംസകളുമായി രംഗത്തെത്തിയെങ്കിലും, സുരക്ഷാ മാനദണ്ഡങ്ങളും റെയിൽവേ ചട്ടങ്ങളും സംബന്ധിച്ച് ആശങ്കകളും ഉയർന്നു.

അലങ്കാരത്തിനായി ഉപയോഗിച്ച സാമഗ്രികൾ തീപിടിത്ത ഭീഷണി സൃഷ്ടിക്കുമോയെന്നും, റിസർവ് ചെയ്ത കാബിനാണെങ്കിലും ഇത്തരം അലങ്കാരങ്ങൾ അനുവദനീയമാണോയെന്നും സമൂഹമാധ്യമങ്ങളിൽ നിരവധി പേർ ചോദ്യം ചെയ്തു. "ഹണിമൂൺ ഓൺ വീൽസ്", "സഞ്ചരിക്കുന്ന ഹണിമൂൺ സ്യൂട്ട്" എന്നീ വിശേഷണങ്ങളോടെയാണ് സംഭവം വ്യാപകമായി പ്രചരിച്ചത്.

സംഭവത്തെ തുടർന്ന് റെയിൽവേയുടെ നിലപാടും ശ്രദ്ധേയമായി. യാത്രക്കാരൻ ഫസ്റ്റ് എസി കാബിനിലെ രണ്ട് ബെർത്തുകളും ബുക്ക് ചെയ്തിരുന്നതിനാൽ ആ കാബിൻ പൂർണമായും അവരുടെ സ്വകാര്യ ഉപയോഗത്തിനായിരുന്നുവെന്ന് അധികൃതർ വ്യക്തമാക്കി. കൂടാതെ, നടത്തിയ അലങ്കാരങ്ങൾ റെയിൽവേയുടെ സ്വത്തിനോ ട്രെയിൻ സർവീസിനോ കേടുപാടുകൾ വരുത്തിയിട്ടില്ലെന്നും അധികൃതർ വിശദീകരിച്ചു.

മഹാരാഷ്ട്രയിലെ ജൽന സ്വദേശികളായ നവദമ്പതികൾക്കായാണ് കാബിൻ മുൻകൂട്ടി അലങ്കരിച്ചതെന്ന് അലങ്കാര ചുമതല ഏറ്റെടുത്ത സ്ഥാപനത്തിന്റെ പ്രതിനിധികൾ അറിയിച്ചു. ജൽന സ്റ്റേഷനിൽ നിന്ന് ട്രെയിനിൽ കയറിയ ദമ്പതികൾക്കായി മുൻകൂട്ടി ഒരുക്കങ്ങൾ പൂർത്തിയാക്കിയിരുന്നുവെന്നും, ഇതിനായി റെയിൽവേയുടെ പ്രത്യേക അനുമതി ആവശ്യമില്ലെന്ന ധാരണയിലായിരുന്നു പ്രവർത്തിച്ചതെന്നും അവർ വ്യക്തമാക്കി.