"കോവിഡിന് സമാനമായ സാഹചര്യം"; ഡൽഹിയിലെ വായു മലിനീകരണത്തിൽ പ്രതികരിച്ചു കിരൺ ബേദി

NOVEMBER 28, 2025, 4:28 AM

ഡൽഹി: രാജ്യതലസ്ഥാനത്ത് വായു മലിനീകരണം രൂക്ഷമായതിന് പിന്നാലെ പ്രതികരണവുമായി മുൻ ഐപിഎസ് ഉദ്യോഗസ്ഥ കിരൺ ബേദി രംഗത്ത്. നഗരത്തിലെ വായു മലിനീകരണം അതിരൂക്ഷമാണെന്ന് വ്യക്തമാക്കിക്കൊണ്ടുള്ള ഒന്നിലധികം പോസ്റ്റുകളാണ് കിരൺ ബേദി എക്സിൽ പങ്കുവച്ചത്.

ഡൽഹിയിലെ വായു ഗുണനിലവാര സൂചിക (എക്യുഐ) നിലവിൽ 458 ആണെന്നും വായുവിനെ അപകടകാരിയായി തരംതിരിക്കുന്നുവെന്നും ആണ് കിരൺ ബേദി ഏറ്റവുമൊടുവിൽ പങ്കുവച്ച പോസ്റ്റിൽ വ്യക്തമാക്കുന്നത്.

"വിഷയത്തിൽ നേരിട്ട് ഇടപെടാൻ പ്രധാനമന്ത്രി നരേന്ദ്ര മോദിക്ക് താൽപ്പര്യമില്ലെങ്കിൽ, മന്ത്രിമാരുടെ നേതൃത്വത്തിൽ ഒരു സമിതി രൂപീകരിക്കണം. കാരണം അത്രയധികം ആളുകൾ മലിനീകരണത്താൽ ബുദ്ധിമുട്ടുന്നുണ്ട്. വായു മലിനീകരണം കുറഞ്ഞതായി തോന്നുമെങ്കിലും അത് വീണ്ടും വീണ്ടും തിരിച്ചുവരികയാണ്. കുട്ടികൾ മുതൽ പ്രായമായവർ വരെയുള്ള എല്ലാ ഡൽഹി നിവാസികളെയും ഇത് ദോഷകരമായി ബാധിക്കുന്നു," കിരൺ ബേദി പറഞ്ഞു.