പുതുച്ചേരിയില്‍ ബിജെപി മുന്നേറ്റം; ഞെട്ടിച്ച് തൊട്ടുപിന്നില്‍ വിജയിയുടെ ടിവികെ

MAY 3, 2026, 11:38 PM

പുതുച്ചേരി: പുതുച്ചേരി നിയമസഭാ തിരഞ്ഞെടുപ്പിന്റെ വോട്ടെണ്ണല്‍ പുരോഗമിക്കുമ്പോള്‍ ബിജെപി പല മണ്ഡലങ്ങളിലും മുന്നേറ്റം തുടരുന്നു. എന്നാല്‍ രാഷ്ട്രീയ കേന്ദ്രങ്ങളെ ഞെട്ടിച്ചുകൊണ്ട് നടന്‍ വിജയുടെ തമിഴക വെട്രി കഴകം തൊട്ടുപിന്നാലെ രണ്ടാം സ്ഥാനത്ത് നിലയുറപ്പിച്ചിരിക്കുകയാണ്.

ആദ്യ ഘട്ട സൂചനകള്‍ പ്രകാരം ബിജെപി സ്ഥാനാര്‍ത്ഥികള്‍ പലയിടത്തും ലീഡ് ചെയ്യുന്നു. എന്‍ഡിഎ സഖ്യത്തിലെ മറ്റൊരു പ്രമുഖ കക്ഷിയായ എഐഎന്‍ആര്‍സിയും മികച്ച പ്രകടനമാണ് കാഴ്ചവെക്കുന്നത്. തമിഴ്നാട്ടിലെന്നപോലെ പുതുച്ചേരിയിലും വിജയ് ഫാക്ടര്‍ പ്രതിഫലിക്കുന്നതായാണ് ലീഡ് നിലകള്‍ സൂചിപ്പിക്കുന്നത്. 12 സീറ്റുകളിലെ ഫലസൂചനകള്‍ ലഭ്യമായപ്പോള്‍ ടിവികെ രണ്ടാം സ്ഥാനത്താണെന്നത് കോണ്‍ഗ്രസ്-ഡിഎംകെ സഖ്യത്തിന് വലിയ തിരിച്ചടിയാണ്.

രാവിലെ 8.47-ഓടെ ഇലക്ട്രോണിക് വോട്ടിംഗ് മെഷീനുകളിലെ വോട്ടുകള്‍ എണ്ണിത്തുടങ്ങിയിട്ടുണ്ട്. ഇതോടെ ലീഡ് നിലകളില്‍ കൂടുതല്‍ വ്യക്തത വരുന്നുണ്ട്. 89.87% എന്ന റെക്കോര്‍ഡ് പോളിംഗ് നടന്നതിനാല്‍, അന്തിമ ഫലം വരുമ്പോള്‍ വലിയ അട്ടിമറികള്‍ സംഭവിക്കാനുള്ള സാധ്യത തള്ളിക്കളയാനാവില്ല.