നഷ്ടം പെരുകുന്നു; ശമ്പളം വെട്ടിക്കുറയ്ക്കാനും സർവീസുകൾ കുറയ്ക്കാനും എയർ ഇന്ത്യ

MAY 8, 2026, 10:05 PM

പശ്ചിമേഷ്യൻ സംഘർഷത്തെത്തുടർന്നുണ്ടായ സാമ്പത്തിക പ്രതിസന്ധി മറികടക്കാൻ കടുത്ത ചെലവുചുരുക്കൽ നടപടികളിലേക്ക് എയർ ഇന്ത്യ. ഗുരുഗ്രാമിലെ ആസ്ഥാനത്ത് ചേർന്ന ബോർഡ് യോഗത്തിലാണ് ഇതുസംബന്ധിച്ച പ്രാഥമിക ധാരണയായത്.

സംഘർഷം തുടരുകയാണെങ്കിൽ അടുത്ത മൂന്ന് മാസത്തേക്ക് വിമാന സർവീസുകൾ 20 ശതമാനം വരെ വെട്ടിക്കുറയ്ക്കാനാണ് കമ്പനിയുടെ തീരുമാനം. ഇതിനകം തന്നെ അഞ്ഞൂറോളം അന്താരാഷ്ട്ര സർവീസുകൾ എയർ ഇന്ത്യ റദ്ദാക്കി കഴിഞ്ഞു.

പ്രവർത്തനച്ചെലവ് കുറയ്ക്കുന്നതിന്റെ ഭാഗമായി ജീവനക്കാരെ ശമ്പളമില്ലാത്ത അവധിയിൽ വിടാനും ബോർഡ് ആലോചിക്കുന്നുണ്ട്. പ്രധാനമായും നോൺ-ടെക്നിക്കൽ വിഭാഗത്തിലുള്ള ജീവനക്കാരെയാകും ഇത് ബാധിക്കുക.

കൂടാതെ, വൈസ് പ്രസിഡന്റ് റാങ്കിന് മുകളിലുള്ള ഉദ്യോഗസ്ഥരുടെ ശമ്പളവും ജീവനക്കാരുടെ ബോണസും വെട്ടിക്കുറയ്ക്കാൻ നിർദ്ദേശമുണ്ട്. കഴിഞ്ഞ സാമ്പത്തിക വർഷം ഏകദേശം 22,000 കോടി രൂപയുടെ ഭീമമായ നഷ്ടമാണ് കമ്പനി രേഖപ്പെടുത്തിയത്.

പശ്ചിമേഷ്യയിലെ യുദ്ധസമാനമായ സാഹചര്യം കാരണം വ്യോമപാതകളിൽ ഏർപ്പെടുത്തിയ നിയന്ത്രണങ്ങൾ വിമാനങ്ങളുടെ യാത്രാദൂരവും ഇന്ധന ഉപഭോഗവും വർധിപ്പിച്ചിട്ടുണ്ട്. വിമാന ഇന്ധനവിലയിലുണ്ടായ കുതിച്ചുചാട്ടവും കമ്പനിക്ക് വലിയ തിരിച്ചടിയായി. ഈ സാഹചര്യത്തിൽ കമ്പനിയുടെ നിലനിൽപ്പിനായി കർശനമായ സാമ്പത്തിക അച്ചടക്കം പാലിക്കാനാണ് എയർ ഇന്ത്യ ലക്ഷ്യമിടുന്നത്. എന്നാൽ ഈ തീരുമാനങ്ങളെക്കുറിച്ച് കമ്പനി ഇതുവരെ ഔദ്യോഗിക പ്രഖ്യാപനം നടത്തിയിട്ടില്ല.

Keywords: Air India, Cost-cutting Measures, West Asia Conflict, Flight Cancellation, Salary Cut, Leave Without Pay, Financial Loss, Fuel Price Hike, Gurugram Board Meeting, Aviation Crisis.