'കെജ്‌രിവാൾ കോ ആശിർവാദ്'; കെജ്‌രിവാളിന് വേണ്ടി ഓൺലൈൻ കാമ്പെയ്ൻ ആരംഭിച്ച് ആപ്പ്

MARCH 29, 2024, 1:10 PM

ന്യൂ ഡൽഹി: ഇഡി കസ്റ്റഡിയിലുള്ള ഡൽഹി മുഖ്യമന്ത്രി അരവിന്ദ് കെജ്‌രിവാളിന് വേണ്ടി ഓൺലൈൻ കാമ്പെയ്ൻ ആരംഭിച്ച് ആം ആദ്മി പാർട്ടി. കെജ്‌രിവാളിന്റെ ഭാര്യ സുനിതയാണ് പുതിയ കാമ്പെയ്ൻ വീഡിയോ സന്ദേശത്തിലൂടെ പ്രഖ്യാപിച്ചത്.

'കെജ്‌രിവാൾ കോ ആശിർവാദ്' എന്നാണ് ഓൺലൈൻ കാമ്പെയ്ന്റെ പേര്.രാജ്യത്തെ ഏറ്റവും അഴിമതി നിറഞ്ഞതും സ്വേച്ഛാധിപത്യപരവുമായ ശക്തികളെ തൻ്റെ ഭർത്താവ് വെല്ലുവിളിച്ചിട്ടുണ്ടെന്നും, അനുഗ്രഹങ്ങളിലൂടെയും പ്രാർത്ഥനയിലൂടെയും അദ്ദേഹത്തെ പിന്തുണയ്ക്കാൻ ജനങ്ങളോട് അഭ്യർത്ഥിച്ചതായും സുനിത കെജ്‌രിവാൾ ഒരു ഡിജിറ്റൽ മീഡിയ ബ്രീഫിംഗിൽ പറഞ്ഞു.

"ഞങ്ങൾ ഇന്ന് മുതൽ ഒരു ഡ്രൈവ് ആരംഭിക്കുകയാണ് - കെജ്രിവാൾ കോ ആശിർവാദ്. ഈ നമ്പറിൽ കെജ്‌രിവാളിന് നിങ്ങളുടെ അനുഗ്രഹങ്ങളും പ്രാർത്ഥനകളും അയയ്‌ക്കാം.ഇന്നലെ അരവിന്ദ് കോടതിയിൽ തൻ്റെ ഭാഗം അവതരിപ്പിച്ചു. കോടതിയിൽ എന്ത് പറഞ്ഞാലും അത്യധികം ധൈര്യം വേണം. രാജ്യത്തെ ഏറ്റവും ശക്തരും അഴിമതിക്കാരുമായ ശക്തികളെ അദ്ദേഹം വെല്ലുവിളിച്ചു. ഞാൻ നിങ്ങൾക്ക് ഒരു വാട്ട്‌സ്ആപ്പ് നമ്പർ നൽകുന്നു -- 8297324624. ഞങ്ങൾ 'കെജ്‌രിവാൾ കോ ആശിർവാദ്' എന്ന കാമ്പെയ്ൻ ആരംഭിക്കുകയാണ്,"-സുനിത പറഞ്ഞു.