വത്താക്കാന്‍ സിറ്റി: ശ്വാസകോശ അര്‍ബുദ ശസ്ത്രക്രിയയ്ക്ക് വിധേയനായ ലിയോ പതിനാലാമന്‍ മാര്‍പ്പാപ്പ ആരോഗ്യനില മെച്ചപ്പെട്ടതിനെ തുടര്‍ന്ന് ശനിയാഴ്ച ജെമെല്ലി ആശുപത്രിയില്‍ നിന്ന് മടങ്ങി. ശസ്ത്രക്രിയ കഴിഞ്ഞ് വെറും നാല് ദിവസത്തിനുള്ളിലാണ് അദ്ദേഹം തന്റെ ഔദ്യോഗിക ചുമതലകളിലേക്ക് തിരിച്ചെത്തുന്നത്.
ആശുപത്രിയില്‍ നിന്ന് പുറത്തേക്ക് വന്ന 71 കാരനായ മാര്‍പ്പാപ്പ, സഹായങ്ങളൊന്നുമില്ലാതെ നടന്നാണ് തന്നെ കാണാന്‍ തടിച്ചുകൂടിയ ജനങ്ങളെ അഭിവാദ്യം ചെയ്തത്. തനിക്ക് സമ്മാനമായി ഒരു സ്റ്റഫ്ഡ് ടോയ് നല്‍കിയ 13 വയസ്സുള്ള ഉക്രേനിയന്‍ പെണ്‍കുട്ടിയോട് സംസാരിച്ച ശേഷമാണ് അദ്ദേഹം മടങ്ങിയത്. ചൊവ്വാഴ്ചയാണ് അദ്ദേഹത്തെ ആശുപത്രിയില്‍ പ്രവേശിപ്പിച്ചത്. അദ്ദേഹത്തിന്റെ ശ്വാസകോശത്തിലെ ഒരു നോഡ്യൂള്‍ നീക്കം ചെയ്യുകയും, അത് പരിശോധിച്ചതില്‍ നിന്ന് ശ്വാസകോശ അര്‍ബുദത്തിന്റെ ഏറ്റവും സാധാരണമായ രൂപമായ പള്‍മണറി അഡിനോകാര്‍സിനോമ ആണെന്ന് സ്ഥിരീകരിക്കുകയും ചെയ്തിരുന്നു. തുടര്‍ന്ന് നടത്തിയ രക്തപരിശോധനകളിലും എക്‌സ്-റേയിലും തൃപ്തികരമായ ഫലം കണ്ടതിനെ തുടര്‍ന്നാണ് ഡോക്ടര്‍മാര്‍ അദ്ദേഹത്തെ ഡിസ്ചാര്‍ജ് ചെയ്തത്.
ശസ്ത്രക്രിയ പ്രഖ്യാപിച്ച് കൃത്യം ഒരാഴ്ച തികയുന്ന ഞായറാഴ്ച, സെന്റ് പീറ്റേഴ്‌സ് സ്‌ക്വയറിന് അഭിമുഖമായുള്ള ജാലകത്തില്‍ നിന്ന് അദ്ദേഹം പരമ്പരാഗത ഞായറാഴ്ച ആശംസകള്‍ നല്‍കും. മാര്‍പ്പാപ്പയുടെ അസുഖവാര്‍ത്ത വത്തിക്കാനില്‍ വലിയ ആശങ്ക സൃഷ്ടിച്ചിരുന്നെങ്കിലും, ശാരീരികക്ഷമതയില്‍ ഏറെ മുന്നിലുള്ള വ്യക്തിയാണ് അദ്ദേഹം. കഴിഞ്ഞ മെയ് മാസത്തില്‍ 69-ാം വയസ്സില്‍ തിരഞ്ഞെടുക്കപ്പെട്ട ഈ ആദ്യ അമേരിക്കന്‍ പോപ്പ്, റോമില്‍ കര്‍ദിനാളായിരിക്കെ പേഴ്‌സണല്‍ ട്രെയിനറെ വെച്ച് ടെന്നീസും നീന്തലും ഉള്‍പ്പെടെയുള്ള കായിക വിനോദങ്ങളില്‍ സജീവമായിരുന്നു.
അടുത്ത മാസം നവംബര്‍ 6 മുതല്‍ 17 വരെ ഉറുഗ്വേ, അര്‍ജന്റീന, പെറു എന്നീ രാജ്യങ്ങളിലേക്ക് അദ്ദേഹത്തിന് യാത്രാ പദ്ധതികളുണ്ട്. താന്‍ മുന്‍പ് മിഷണറിയായും ബിഷപ്പായും സേവനമനുഷ്ഠിച്ച പെറുവിലേക്കുള്ള സന്ദര്‍ശനം ഏറെ പ്രാധാന്യമുള്ളതാണെന്ന് അദ്ദേഹം വ്യക്തമാക്കിയിരുന്നു. നിലവില്‍ ഈ യാത്രാ പദ്ധതികളെക്കുറിച്ച് വത്തിക്കാന്‍ ജാഗ്രത പാലിക്കുകയാണെങ്കിലും, മാര്‍പ്പാപ്പ പൂര്‍ണ്ണ കായികക്ഷമത വീണ്ടെടുക്കാന്‍ രണ്ടാഴ്ചയോളം സമയമെടുക്കുമെന്നും യാത്രകള്‍ തടസ്സപ്പെടാന്‍ ക്ലിനിക്കല്‍ കാരണങ്ങളൊന്നുമില്ലെന്നും ഡോക്ടര്‍മാര്‍ വ്യക്തമാക്കിയിട്ടുണ്ട്.
ആശുപത്രിയില്‍ കഴിയുമ്പോഴും മാര്‍പ്പാപ്പ തന്റെ ഭരണപരമായ ജോലികള്‍ മുടക്കിയിരുന്നില്ല. കര്‍ദിനാളന്മാരെ കാണുകയും, തെക്കന്‍ ഉക്രേനിയന്‍ നഗരമായ ഒലേഷ്‌കിയിലെ സാധാരണക്കാരുടെ ദുരിതങ്ങള്‍ ഉന്നയിച്ചുകൊണ്ട് റഷ്യന്‍ പ്രസിഡന്റ് വ്ലാഡിമിര്‍ പുടിനുമായി ഫോണില്‍ സംസാരിക്കുകയും ചെയ്തിരുന്നു. മുന്‍കാല മാര്‍പ്പാപ്പമാര്‍ കാര്യമായ അസുഖമുണ്ടാകുമ്പോള്‍ രാജിക്കത്തുകള്‍ തയ്യാറാക്കി വെക്കാറുണ്ടെങ്കിലും, പോപ്പ് ലിയോ അത്തരമൊരു മുന്‍കരുതല്‍ എടുക്കേണ്ട സാഹചര്യം ഉണ്ടായിട്ടില്ലെന്ന് ഹോളി സീ സ്റ്റേറ്റ് സെക്രട്ടറി കര്‍ദിനാള്‍ പരോളിന്‍ അറിയിച്ചു.
അതേസമയം ശസ്ത്രക്രിയയ്ക്ക് തൊട്ടുമുമ്പ് കര്‍ദിനാള്‍ സംഘത്തിന്റെ ഡീനായി 69 കാരനായ കര്‍ദിനാള്‍ ലൂയിസ് അന്റോണിയോ ടാഗ്ലെയെ മാര്‍പ്പാപ്പ നിയമിച്ചിരുന്നു. സഭയിലെ സുപ്രധാന തീരുമാനങ്ങളിലും ഭാവിയിലെ പാപ്പ തിരഞ്ഞെടുപ്പ് യോഗങ്ങളിലും പ്രധാന പങ്കുവഹിക്കുന്ന ഈ പദവിയിലേക്ക് നടത്തിയ നിയമനം വത്തിക്കാനിലെ ഒരു പ്രധാന ഭരണപരമായ നടപടിയായാണ് കാണപ്പെടുന്നത്.
വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ
ഇവിടെ ക്ലിക്ക് ചെയ്യുക
.
വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.
യൂട്യൂബ് ചാനൽ:വാചകം ന്യൂസ്
1-20261015014724.jpg)
