അമേരിക്കൻ സമാധാന കരാർ ലംഘിച്ചു; തായ്‌ലൻഡ് അതിർത്തി കൈയേറിയെന്ന് കമ്പോഡിയൻ പ്രധാനമന്ത്രി

FEBRUARY 18, 2026, 9:31 AM

വാഷിംഗ്ടൺ: അതിർത്തി തർക്കത്തെത്തുടർന്ന് തായ്‌ലൻഡ് സൈന്യം തങ്ങളുടെ പ്രദേശം കൈയേറിയിരിക്കുകയാണെന്ന ഗുരുതര ആരോപണവുമായി കമ്പോഡിയൻ പ്രധാനമന്ത്രി ഹുൻ മാനെറ്റ്. അമേരിക്കൻ പ്രസിഡന്റ് ഡൊണാൾഡ് ട്രംപിന്റെ മധ്യസ്ഥതയിൽ ഒപ്പിട്ട സമാധാന കരാർ നിലനിൽക്കെയാണ് തായ് സൈന്യത്തിന്റെ ഈ നീക്കമെന്ന് അദ്ദേഹം റോയിട്ടേഴ്സിന് നൽകിയ അഭിമുഖത്തിൽ വ്യക്തമാക്കി.

അധികാരമേറ്റശേഷം അന്താരാഷ്ട്ര മാധ്യമത്തിന് നൽകുന്ന ആദ്യ അഭിമുഖത്തിലാണ് ഹുൻ മാനെറ്റ് തായ്‌ലൻഡിനെതിരെ കടുത്ത ഭാഷയിൽ പ്രതികരിച്ചത്. കഴിഞ്ഞ വർഷം നടന്ന ഏറ്റുമുട്ടലിന് ശേഷം ഡിസംബറിൽ വെടിനിർത്തൽ പ്രഖ്യാപിച്ചെങ്കിലും അതിർത്തിയിലെ സാഹചര്യം ഇപ്പോഴും അതീവ ഗുരുതരമാണെന്ന് അദ്ദേഹം വിശേഷിപ്പിച്ചു.

ട്രംപിന്റെ ബോർഡ് ഓഫ് പീസ് യോഗത്തിൽ പങ്കെടുക്കാൻ വാഷിംഗ്ടണിലെത്തിയ ഹുൻ മാനെറ്റ്, അതിർത്തിയിലെ പിരിമുറുക്കം കുറയ്ക്കാൻ ഈ പുതിയ സമിതിക്ക് കഴിയുമെന്ന് പ്രത്യാശ പ്രകടിപ്പിച്ചു. തർക്കപ്രദേശങ്ങളിൽ അതിർത്തി നിർണ്ണയിക്കുന്നതിനായി സംയുക്ത കമ്മീഷനെ (Joint Boundary Commission) പ്രവർത്തിക്കാൻ അനുവദിക്കണമെന്ന് അദ്ദേഹം തായ്‌ലൻഡിനോട് ആവശ്യപ്പെട്ടു.

അതേസമയം, കമ്പോഡിയയുടെ ആരോപണങ്ങൾ തായ്‌ലൻഡ് പ്രതിരോധ മന്ത്രാലയം തള്ളി. നിലവിലുള്ള സൈനിക വിന്യാസം തുടരുക മാത്രമാണ് ചെയ്യുന്നതെന്നും പുതിയതായി ഒരു പ്രദേശം പോലും കൈയേറിയിട്ടില്ലെന്നും തായ് വക്താവ് റിയർ അഡ്മിറൽ സുരസന്ത് കൊങ്‌സിരി പ്രതികരിച്ചു. പിരിമുറുക്കം കുറയ്ക്കുന്നതിന്റെ ഭാഗമായാണ് സൈന്യത്തെ നിലനിർത്തുന്നതെന്നാണ് തായ്‌ലൻഡിന്റെ വാദം.

അതിർത്തി പ്രശ്നങ്ങൾക്ക് പുറമെ, കമ്പോഡിയയിൽ വർദ്ധിച്ചുവരുന്ന സൈബർ തട്ടിപ്പ് കേന്ദ്രങ്ങൾക്കെതിരെ തന്റെ സർക്കാർ കർശന നടപടികൾ സ്വീകരിച്ചുവരികയാണെന്നും ഹുൻ മാനെറ്റ് പറഞ്ഞു. വാഷിംഗ്ടണുമായുള്ള നയതന്ത്ര ബന്ധം മെച്ചപ്പെട്ടതിനെ അദ്ദേഹം സ്വാഗതം ചെയ്യുകയും ചെയ്തു.