പ്രശസ്ത താരം കോഡി ഫേൺ ആദ്യമായി സംവിധാനം ചെയ്യുന്ന ബിഗ് ബജറ്റ് ഡ്രാമ ചിത്രത്തിൽ നവോമി വാട്‌സും ഒഡീസ്സ അസിയോണും പ്രധാന വേഷങ്ങളിൽ എത്തുന്നു. സാറാ പോൾസൺ കേന്ദ്രകഥാപാത്രത്തെ അവതരിപ്പിക്കുന്ന ചിത്രത്തിന്റെ പേര് ഇതുവരെ പുറത്തുവിട്ടിട്ടില്ല.

'ഡയറി ഓഫ് എ വിംപി കിഡ്', 'ഓപ്പൺഹൈമർ' എന്നീ ചിത്രങ്ങളിലൂടെ ശ്രദ്ധേയനായ ഡെവൺ ബോസ്റ്റിക്കും കൊഡി  ഫേണും ചേർന്നാണ് ചിത്രത്തിന് തിരക്കഥ ഒരുക്കിയിരിക്കുന്നത്. നിലവിൽ കാനഡയിലെ മോൺട്രിയലിൽ ചിത്രീകരണം പുരോഗമിക്കുന്ന ഈ ചിത്രം 'ഫിക്ഷ്യസ്' (Fictious) എന്ന ബാനറിലാണ് നിർമ്മിക്കുന്നത്.

സാന്ദ്ര വേൽ എന്ന പ്രശസ്ത നടിയായാണ് സാറാ പോൾസൺ ഈ ചിത്രത്തിൽ വേഷമിടുന്നത്. മുപ്പത് വർഷമായി അകന്നു കഴിയുന്ന തന്റെ സഹോദരി ഏപ്രിൽ (നവോമി വാട്‌സ്) വീണ്ടും ജീവിതത്തിലേക്ക് കടന്നുവരുന്നതും തുടർന്നുണ്ടാകുന്ന സംഭവവികാസങ്ങളുമാണ് സിനിമയുടെ ഇതിവൃത്തം. ബെർട്ടോൾട്ട് ബ്രെഹ്‌റ്റിന്റെ 'മദർ കറേജ്' എന്ന നാടകത്തിന്റെ അവതരണത്തിന് സാന്ദ്ര തയ്യാറെടുക്കുന്ന വേളയിലാണ് സഹോദരിയുടെ അപ്രതീക്ഷിത വരവ്. ഇത് സാന്ദ്രയുടെ വ്യക്തിജീവിതത്തിലും കരിയറിലും വലിയ പ്രതിസന്ധികൾ സൃഷ്ടിക്കുന്നു.

അമേരിക്കൻ നാടകവേദിയിലെ ഇതിഹാസ താരം ഡയാൻ വീസ്റ്റ്, ടോബി വാലസ് എന്നിവരും ചിത്രത്തിൽ പ്രധാന വേഷങ്ങളിലുണ്ട്. ഏപ്രിലിന്റെ മകൻ തിയോ ആയിട്ടാണ് ടോബി വാലസ് അഭിനയിക്കുന്നത്. 'അമേരിക്കൻ ഹൊറർ സ്റ്റോറി'ക്ക് ശേഷം കൊഡി  ഫേണും സാറാ പോൾസണും വീണ്ടും ഒന്നിക്കുന്നു എന്ന പ്രത്യേകതയും ഈ ചിത്രത്തിനുണ്ട്.

നവോമി വാട്‌സ് അഭിനയിക്കുന്ന മറ്റൊരു പ്രധാന പ്രൊജക്റ്റ് 'ലവ് സ്റ്റോറി'യാണ്. ഇതിൽ മുൻ അമേരിക്കൻ പ്രഥമ വനിത ജാക്കി കെന്നഡിയെയാണ് താരം അവതരിപ്പിക്കുന്നത്. ഒഡീസ്സ അസിയോൺ തന്റെ ഹിറ്റ് പരമ്പരയായ 'ഐ ലവ് എൽഎ'യുടെ രണ്ടാം സീസണിലും വേഷമിടുന്നുണ്ട്. കൂടാതെ 'മാർട്ടി സുപ്രീം' എന്ന ചിത്രത്തിലെ പ്രകടനത്തിന് മികച്ച സഹനടിക്കുള്ള ആക്ടർ അവാർഡ് (മുമ്പ് സാഗ് അവാർഡ്) നാമനിർദ്ദേശവും ഒഡീസ്സ സ്വന്തമാക്കിയിട്ടുണ്ട്.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്