എം കെ ത്യാഗരാജ ഭാഗവതരായി ദുല്‍ഖര്‍ എത്തുന്നു ; 'കാന്ത' അപ്ഡേറ്റ്

NOVEMBER 17, 2024, 10:40 AM

ദുല്‍ഖര്‍ സല്‍മാന്റേതായി അണിയറയില്‍ ഒരുങ്ങുന്ന ചിത്രമാണ് സെല്‍വമണി സെല്‍വരാജ് രചനയും സംവിധാനവും നിര്‍വ്വഹിക്കുന്ന കാന്ത.

യഥാർത്ഥ ജീവിതം ഇതിവൃത്തമാക്കി തെലുങ്ക് ഭാഷയില്‍ ഒരുങ്ങുന്ന ചിത്രമാണ് കാന്ത.1950കളില്‍ തമിഴ്‌നാടിനെ പിടിച്ചുകുലുക്കിയ ലക്ഷ്മികാന്തന്‍ കൊലക്കേസ് ആസ്പദമാക്കിയാണ് ചിത്രം ഒരുങ്ങുന്നത്.

ചിത്രത്തില്‍ തമിഴിലെ ആദ്യ സൂപ്പർസ്റ്റാറായ എം കെ ത്യാഗരാജ ഭാഗവതരായാണ് ദുല്‍ഖർ എത്തുക എന്നും റിപോർട്ടുകള്‍ സൂചിപ്പിക്കുന്നു. 1934 മുതല്‍ 1960 വരെ സിനിമയില്‍ സജീവമായിരുന്ന ജനപ്രിയ നടനും കർണാടിക് ഗായകനുമായിരുന്നു എംകെടി എന്നറിയപ്പെടുന്ന എം കെ ത്യാഗരാജ ഭാഗവതർ. തന്റെ കരിയറില്‍ 14 സിനിമകളാണ് അദ്ദേഹം ചെയ്തത്. അതില്‍ 10 വലിയ വിജയങ്ങളുമായിരുന്നു.

എന്നാല്‍ ലക്ഷ്മികാന്തന്‍ എന്ന മാധ്യമപ്രവർത്തകൻ കൊല്ലപ്പെട്ട കേസില്‍ ത്യാഗരാജ ഭാഗവതർ അറസ്റ്റിലാവുകയും ജയിലില്‍ കഴിയുകയുമുണ്ടായി. തുടർന്ന് ഭാഗവതര്‍ സിനിമയില്‍ നിന്നും കച്ചേരിയില്‍ നിന്നും മാറിനില്‍കുകയും 1959ല്‍ മരിക്കുകയുമായിരുന്നു.

ഈ സംഭവങ്ങള്‍ പശ്ചാത്തലമാക്കിയാണ് സിനിമ കഥ പറയുന്നത് എന്നാണ് സൂചന. കഴിഞ്ഞ വര്‍ഷം ദുല്‍ഖറിന്‍റെ പിറന്നാള്‍ ദിനത്തിലായിരുന്നു കാന്തയുടെ പ്രഖ്യാപനം നടന്നത്.

റാണ ദഗുബാട്ടിക്കൊപ്പം സ്വപ്ന ദത്തയും ദുല്‍ഖര്‍ സല്‍മാനും ചേര്‍ന്നാണ് ചിത്രത്തിന്‍റെ നിര്‍മ്മാണം. സ്പിരിറ്റ്, മീഡിയ, സ്വപ്ന സിനിമ, വേഫെറര്‍ ഫിലിംസ് എന്നിവയാണ് ബാനറുകള്‍.