യഹൂദരെ വധിക്കാൻ പദ്ധതിയിട്ടു; ഒട്ടാവയിലെ കൗമാരക്കാരൻ ഭീകരവാദ കുറ്റങ്ങളിൽ കുറ്റക്കാരനെന്ന് കോടതി

APRIL 22, 2026, 9:10 PM

ഒട്ടാവ: കാനഡയുടെ തലസ്ഥാനമായ ഒട്ടാവയിൽ യഹൂദ സമൂഹത്തിന് നേരെ ഭീകരാക്രമണം നടത്താൻ പദ്ധതിയിട്ട 17 വയസ്സുകാരൻ കുറ്റക്കാരനാണെന്ന് കോടതി കണ്ടെത്തി. ഐസിസ് (ISIS) ആശയങ്ങളിൽ പ്രചോദനം ഉൾക്കൊണ്ട്, 2023 ക്രിസ്മസ് കാലയളവിൽ നഗരത്തിൽ സ്ഫോടന പരമ്പര നടത്താനായിരുന്നു ഇയാൾ ലക്ഷ്യമിട്ടത്. കുറ്റസമ്മതം നടത്താതെ തന്നെ ശിക്ഷ സ്വീകരിക്കുന്ന 'നോ-കണ്ടസ്റ്റ്' (no-contest) രീതിയിലുള്ള അപൂർവ്വമായ വിചാരണയ്ക്ക് ശേഷമാണ് ഒട്ടാവ സുപ്പീരിയർ കോടതി വിധി പ്രസ്താവിച്ചത്.

പ്രതിയുടെ കിടപ്പുമുറിയിൽ നിന്ന് മൂന്ന് പ്രഷർ കുക്കർ ബോംബുകൾ നിർമ്മിക്കാനാവശ്യമായ സ്ഫോടകവസ്തുക്കളും ആറായിരത്തോളം സ്റ്റീൽ ബോൾ ബെയറിംഗുകളും പോലീസ് കണ്ടെടുത്തു. പരമാവധി ആളുകളെ കൊല്ലുക എന്ന ലക്ഷ്യത്തോടെ ബോംബുകളിൽ ഈ ബോളുകൾ നിറയ്ക്കാനും, ആക്രമണത്തിനൊടുവിൽ ചാവേറായി സ്വയം പൊട്ടിത്തെറിക്കാനും ഇയാൾ പദ്ധതിയിട്ടിരുന്നു.

ടെലിഗ്രാം വഴി മറ്റൊരാൾക്ക് സ്ഫോടകവസ്തു നിർമ്മാണ വീഡിയോ അയച്ചുകൊടുത്തതിനെക്കുറിച്ച് അമേരിക്കൻ അന്വേഷണ ഏജൻസിയായ എഫ്ബിഐ (FBI) നൽകിയ രഹസ്യവിവരമാണ് പ്രതിയെ കുടുക്കാൻ സഹായിച്ചത്.

ഭീകരസംഘടനയുമായി ചേർന്ന് കൊലപാതകത്തിന് ഗൂഢാലോചന നടത്തിയതടക്കം നാല് പ്രധാന കുറ്റങ്ങളാണ് കോടതി ശരിവെച്ചത്. പ്രതി പ്രായപൂർത്തിയാകാത്ത ആളായതിനാൽ പേരുവിവരങ്ങൾ പുറത്തുവിടാൻ നിയമപരമായ വിലക്കുണ്ട്.

എന്നാൽ ഇയാൾ ചെയ്ത കുറ്റത്തിന്റെ ഗൗരവം കണക്കിലെടുത്ത്, പ്രായപൂർത്തിയായ ഒരാൾക്ക് നൽകുന്ന കഠിനമായ ശിക്ഷ തന്നെ നൽകണമെന്ന് പ്രോസിക്യൂഷൻ കോടതിയിൽ ആവശ്യപ്പെട്ടു. കേസിൽ ഉൾപ്പെട്ട മറ്റൊരു 15 വയസ്സുകാരന്റെ വിചാരണ ഉടൻ ആരംഭിക്കും