പാർലമെന്ററി കമ്മിറ്റികളുടെ നിയന്ത്രണം പിടിച്ചെടുക്കാൻ ലിബറൽ നീക്കം; 'ഏകാധിപത്യം' എന്ന് പ്രതിപക്ഷം

APRIL 22, 2026, 9:05 PM

ഒട്ടാവ: പാർലമെന്റിൽ ഭൂരിപക്ഷം നേടിയതിന് പിന്നാലെ ഹൗസ് കമ്മിറ്റികളുടെ നിയന്ത്രണം പിടിച്ചെടുക്കാനുള്ള ലിബറൽ പാർട്ടിയുടെ നീക്കത്തിനെതിരെ കാനഡയിൽ പ്രതിഷേധം ശക്തമാകുന്നു.

ഉപതിരഞ്ഞെടുപ്പുകളിലെ വിജയത്തിന് ശേഷം സഭയിൽ ഭൂരിപക്ഷം ഉറപ്പിച്ച ലിബറലുകൾ, പാർലമെന്ററി കമ്മിറ്റികളിൽ തങ്ങളുടെ അംഗങ്ങളുടെ എണ്ണം വർധിപ്പിക്കാൻ നീക്കം തുടങ്ങിയതാണ് വിവാദത്തിന് കാരണമായത്.

ഈ മാസം ആദ്യം നടന്ന മൂന്ന് ഉപതിരഞ്ഞെടുപ്പുകളിൽ ജയിക്കുകയും പ്രതിപക്ഷ നിരയിൽ നിന്നുള്ള എംപിമാരുടെ പിന്തുണ ഉറപ്പാക്കുകയും ചെയ്തതോടെയാണ് പ്രധാനമന്ത്രി മാർക്ക് കാർണിയുടെ നേതൃത്വത്തിലുള്ള ലിബറലുകൾ ഭൂരിപക്ഷം നേടിയത്.

സർക്കാർ ഫണ്ട് ചെലവഴിക്കുന്നതും കരാറുകൾ നൽകുന്നതും നിരീക്ഷിക്കുന്ന എത്തിക്‌സ്, പബ്ലിക് അക്കൗണ്ട്‌സ്, ഗവൺമെന്റ് ഓപ്പറേഷൻസ് എന്നീ മൂന്ന് സുപ്രധാന മേൽനോട്ട സമിതികളെ ലിബറൽ നീക്കത്തിൽ നിന്ന് ഒഴിവാക്കണമെന്ന് പ്രതിപക്ഷ കൺസർവേറ്റീവ് നേതാവ് ആൻഡ്രൂ ഷീർ ആവശ്യപ്പെട്ടു.

സർക്കാർ സ്വന്തം താൽപ്പര്യങ്ങൾ സംരക്ഷിക്കാൻ കമ്മിറ്റികളെ രാഷ്ട്രീയവൽക്കരിക്കുകയാണെന്നും (Stack the deck) അദ്ദേഹം ആരോപിച്ചു. എന്നാൽ, സഭയിൽ ഭൂരിപക്ഷമുള്ള പാർട്ടിക്ക് കമ്മിറ്റികളിലും ഭൂരിപക്ഷം വേണമെന്നത് പാർലമെന്ററി തത്വമാണെന്ന് ഗവൺമെന്റ് ഹൗസ് ലീഡർ സ്റ്റീവൻ മക്കിന്നൻ പ്രതികരിച്ചു. ബ്ലോക്ക് ക്യൂബെക്കോയിസ് നേതാവ് ഈവ്-ഫ്രാങ്കോയിസ് ബ്ലാഞ്ചെറ്റും ലിബറൽ നീക്കത്തെ രൂക്ഷമായി വിമർശിച്ചു.