യുഎസ് ആക്രമണം: ഇറാന് അതിന്റെ ആണവ പദ്ധതി ഏതാനും മാസങ്ങള്‍ക്കുള്ളില്‍ പുനരാരംഭിക്കാന്‍ കഴിയുമെന്ന് വിലയിരുത്തല്‍

JUNE 24, 2025, 8:01 PM

വാഷിംഗ്ടണ്‍: ഇറാനിയന്‍ ആണവ കേന്ദ്രങ്ങളില്‍ നടന്ന യുഎസ് ആക്രമണങ്ങള്‍ ടെഹ്റാന്റെ പദ്ധതിക്ക് ഏതാനും മാസങ്ങളുടെ പിന്നോട്ടടിക്കലെ ഉള്ളെന്ന് യുഎസ് ഇന്റലിജന്‍സിന്റെ പ്രാഥമിക വിലയിരുത്തല്‍. ഈ വിഷയത്തെക്കുറിച്ച് അറിവുള്ള സ്രോതസ്സുകള്‍ റോയിട്ടേഴ്സിനോട് പറഞ്ഞതായാണ് വിവരം.

പെന്റഗണിന്റെ പ്രധാന രഹസ്യാന്വേഷണ വിഭാഗവും 18 യുഎസ് രഹസ്യാന്വേഷണ ഏജന്‍സികളില്‍ ഒന്നുമായ പ്രതിരോധ ഇന്റലിജന്‍സ് ഏജന്‍സിയാണ് പ്രാരംഭ റിപ്പോര്‍ട്ട് തയ്യാറാക്കിയത്. ഇറാന് അതിന്റെ ആണവ പദ്ധതി ഏതാനും മാസങ്ങള്‍ക്കുള്ളില്‍ പുനരാരംഭിക്കാന്‍ കഴിയുമെന്ന് വിലയിരുത്തല്‍ കണ്ടെത്തി. അവരില്‍ ഒരാള്‍ പറഞ്ഞത് ഒന്ന് മുതല്‍ രണ്ട് മാസത്തിനുള്ളില്‍ ആദ്യ പുനരാരംഭം ഉണ്ടാകുമെന്ന് കണക്കാക്കിയതായാണ്.

പ്രസിഡന്റ് ഡൊണാള്‍ഡ് ട്രംപിന്റെയും പ്രതിരോധ സെക്രട്ടറി പീറ്റ് ഹെഗ്സെത്ത് ഉള്‍പ്പെടെയുള്ള ഉന്നത യുഎസ് ഉദ്യോഗസ്ഥരുടെയും പ്രസ്താവനകളുമായി താരതമ്യം ചെയ്യുമ്പോള്‍ ഈ വിലയിരുത്തല്‍ വിരുദ്ധമാണ്. ബങ്കര്‍ തകര്‍ക്കുന്ന ബോംബുകളും കൂടുതല്‍ പരമ്പരാഗത ആയുധങ്ങളും സംയോജിപ്പിച്ച് നടത്തിയ വാരാന്ത്യ ആക്രമണങ്ങള്‍ ഇറാന്റെ ആണവ പദ്ധതിയെ ഇല്ലാതാക്കിയെന്നാണ് അവര്‍ പറഞ്ഞിരുന്നത്. ട്രംപിന്റെ ഭരണകൂടം ചൊവ്വാഴ്ച യുഎന്‍ സുരക്ഷാ കൗണ്‍സിലിനോട് പറഞ്ഞത്, അവരുടെ ആക്രമണങ്ങള്‍ ഇറാന്റെ ആണവ പദ്ധതിയെ തകര്‍ന്നത്തു എന്നായിരുന്നു.

30,000 പൗണ്ട് പ്രഹര ശേഷിയുള്ള പതിനാല് ബോംബുകള്‍ അവരുടെ ലക്ഷ്യങ്ങളില്‍ കൃത്യമായി പതിക്കുമ്പോള്‍ എന്ത് സംഭവിക്കുമെന്ന് എല്ലാവര്‍ക്കും അറിയാം. പൂര്‍ണ്ണമായ ഉന്മൂലനം എന്ന് സിഎന്‍എന്നിനോട് വക്താവ് കരോലിന്‍ ലീവിറ്റ് നടത്തിയ പ്രസ്താവനയില്‍ പറഞ്ഞിരുന്നു. വിലയിരുത്തല്‍ വായിച്ച ഒരു യുഎസ് ഉദ്യോഗസ്ഥന്‍ അതില്‍ നിരവധി മുന്നറിയിപ്പുകളും അടങ്ങിയിട്ടുണ്ടെന്ന് അഭിപ്രായപ്പെട്ടു. വരും ദിവസങ്ങളിലും ആഴ്ചകളിലും കൂടുതല്‍ പരിഷ്‌കരിച്ച ഒരു റിപ്പോര്‍ട്ട് പ്രതീക്ഷിക്കുന്നുണ്ടെന്ന് പറഞ്ഞു.

ഉപഗ്രഹ ചിത്രങ്ങളുടെ അടിസ്ഥാനത്തിലുള്ള വിലയിരുത്തലാണെങ്കില്‍, ആഴത്തില്‍ കുഴിച്ചിട്ട ഫോര്‍ഡോ യുറേനിയം സമ്പുഷ്ടീകരണ കേന്ദ്രത്തിന് എത്രത്തോളം നാശനഷ്ടമുണ്ടായെന്ന് വെളിപ്പെടുത്താന്‍ കഴിയില്ലെന്ന് വിശകലന വിദഗ്ധര്‍ പറഞ്ഞു. എന്നാല്‍ ഇറാന്‍ ആണവായുധം വികസിപ്പിക്കുന്നത് തടയാന്‍ ആക്രമണങ്ങള്‍ അനിവാര്യമാണെന്ന് ട്രംപ് പറഞ്ഞു. അത്തരമൊരു ആയുധം തേടുന്നില്ലെന്ന് ഇറാന്‍ നിഷേധിക്കുകയും അവരുടെ ആണവ പദ്ധതി സമാധാനപരമായ ആവശ്യങ്ങള്‍ക്കുള്ളതാണെന്ന് പറയുകയും ചെയ്യുന്നു.

ഫോര്‍ഡോ, ഇസ്ഫഹാന്‍, നടന്‍സ് ആണവ കേന്ദ്രങ്ങളിലെ നാശനഷ്ടങ്ങള്‍ വിലയിരുത്തുന്നത് ബുദ്ധിമുട്ടുള്ള കാര്യമാണെന്ന് പ്രതീക്ഷിക്കുന്നു. കൂടാതെ ഈ ജോലി കൈകാര്യം ചെയ്യുന്ന ഒരേയൊരു ഏജന്‍സി ഡിഐഎ മാത്രമല്ല. ഈ വിലയിരുത്തല്‍ സാര്‍വത്രികമായി അംഗീകരിക്കപ്പെട്ടിട്ടില്ലെന്നും കാര്യമായ അഭിപ്രായവ്യത്യാസം സൃഷ്ടിച്ചിട്ടുണ്ടെന്നും ഒരു സ്രോതസ്സ് വെളിപ്പെടുത്തി. നാശനഷ്ടത്തിന്റെ യഥാര്‍ത്ഥ വ്യാപ്തി യുഎസിന് ഇതുവരെ അറിയില്ലെന്ന് പേര് വെളിപ്പെടുത്തരുതെന്ന വ്യവസ്ഥയില്‍ സംസാരിച്ച ഒരു യുഎസ് ഉദ്യോഗസ്ഥന്‍ പറഞ്ഞു. ട്രംപ് ഭരണകൂടം അവകാശപ്പെടുന്നത്രയും ആക്രമണങ്ങള്‍ വിജയിച്ചിരിക്കില്ലെന്നാണ് പ്രാഥമിക വിലയിരുത്തല്‍ സൂചിപ്പിക്കുന്നത്.