ഖമേനിയുടെ വധം ഇറാനിൽ ഭരണമാറ്റമുണ്ടാക്കില്ലെന്ന് യുഎസ് ഉദ്യോഗസ്ഥർ

MARCH 1, 2026, 10:42 PM

വാഷിംഗ്‌ടൺ: ഇറാൻ പരമോന്നത നേതാവ് ആയത്തുള്ള അലി ഖമേനിയുടെ വധത്തിന് പിന്നാലെ രാജ്യത്ത് അടിയന്തരമായ ഒരു ഭരണമാറ്റം ഉണ്ടാകുമെന്ന കാര്യത്തിൽ സംശയം പ്രകടിപ്പിച്ച് അമേരിക്കൻ ഉദ്യോഗസ്ഥർ.

ഖമേനിയുടെ അന്ത്യം ഇറാനിയൻ ഭരണകൂടത്തിന് വലിയ തിരിച്ചടിയാണെങ്കിലും, നിലവിലെ ഭരണസംവിധാനം പെട്ടെന്ന് തകരുമെന്നോ പകരം പാശ്ചാത്യ അനുകൂലമായ ഒരു സർക്കാർ അധികാരത്തിൽ വരുമെന്നോ കരുതുന്നില്ലെന്നാണ് അമേരിക്കൻ ഇന്റലിജൻസ് വിഭാഗങ്ങളുടെ വിലയിരുത്തൽ.

ഇറാന്റെ ആഭ്യന്തര സുരക്ഷാ സംവിധാനങ്ങളും റെവല്യൂഷണറി ഗാർഡും (IRGC) ഇപ്പോഴും ശക്തമായി തുടരുന്നത് ഭരണമാറ്റത്തിനുള്ള സാധ്യതകളെ ഇല്ലാതാക്കുന്നുവെന്ന് യുഎസ് ഉദ്യോഗസ്ഥർ ചൂണ്ടിക്കാട്ടുന്നു. നേതൃത്വത്തിൽ ഉണ്ടായ വിടവ് നികത്താൻ മറ്റൊരു നേതാവ് തന്നെ അധികാരത്തിൽ വരാനാണ് സാധ്യതയെന്നും ഇത് മേഖലയിൽ കൂടുതൽ സംഘർഷങ്ങൾക്ക് വഴിതെളിക്കുമെന്നും വാഷിംഗ്ടൺ ആശങ്കപ്പെടുന്നു. ജനകീയ പ്രക്ഷോഭങ്ങൾ വഴി ഒരു ജനാധിപത്യ മാറ്റം ഉടൻ സംഭവിക്കാനുള്ള സാധ്യതകൾ വിരളമാണെന്നും റിപ്പോർട്ടുകൾ സൂചിപ്പിക്കുന്നു.

അമേരിക്കയുടെയും ഇസ്രായേലിന്റെയും സൈനിക നീക്കങ്ങൾ ഇറാൻ ഭരണകൂടത്തെ ഉലച്ചിട്ടുണ്ടെങ്കിലും, നിലവിലെ ഇസ്ലാമിക ഭരണസംവിധാനം അത്ര പെട്ടെന്ന് തകർന്നുവീഴില്ലെന്നാണ് രഹസ്യാന്വേഷണ വിഭാഗം നൽകുന്ന സൂചനകൾ. ഖമേനിയുടെ അഭാവത്തിൽ റെവല്യൂഷണറി ഗാർഡിലെ (IRGC) തീവ്ര നിലപാടുള്ള നേതാക്കളോ അല്ലെങ്കിൽ അത്രതന്നെ കടുത്ത ചിന്താഗതിക്കാരായ പുരോഹിതന്മാരോ അധികാരം ഏറ്റെടുക്കാനാണ് സാധ്യതയെന്ന് സിഐഎ വിലയിരുത്തുന്നു.

ഭരണകൂടത്തിന് കീഴിലുള്ള വിശാലമായ ശൃംഖലകളിൽ നിന്ന് ആനുകൂല്യങ്ങൾ പറ്റുന്ന ഐആർജിസി ഉദ്യോഗസ്ഥർ അത്ര പെട്ടെന്ന് കീഴടങ്ങാൻ സാധ്യതയില്ല. സൈന്യത്തിനുള്ളിൽ നിന്ന് വലിയ തോതിലുള്ള പിളർപ്പോ കൂറുമാറ്റമോ ഉണ്ടാകാത്ത പക്ഷം ഒരു വിപ്ലവം വിജയിക്കില്ലെന്ന് രഹസ്യാന്വേഷണ ഏജൻസികൾ മുന്നറിയിപ്പ് നൽകുന്നു. ജനുവരിയിൽ ഇറാനിൽ നടന്ന വൻ പ്രതിഷേധങ്ങളെ അടിച്ചമർത്താൻ സുരക്ഷാ സേന കാണിച്ച ഐക്യം ഇതിന് ഉദാഹരണമായി അവർ ചൂണ്ടിക്കാട്ടുന്നു.

നിലവിൽ പ്രസിഡന്റ് മസൂദ് പെസെഷ്കിയാന്റെ നേതൃത്വത്തിലുള്ള സമിതി ഭരണപരമായ ചുമതലകൾ താൽക്കാലികമായി ഏറ്റെടുത്തിട്ടുണ്ട്. രാജ്യത്തെ ശിഥിലമാക്കാൻ അമേരിക്കയും ഇസ്രായേലും ശ്രമിക്കുകയാണെന്ന് ഇറാൻ സുരക്ഷാ വിഭാഗം ആരോപിച്ചു. അതേസമയം, ഖമേനിയുടെ മരണം ഇറാന്റെ ആണവ-മിസൈൽ നയങ്ങളിൽ മാറ്റം വരുത്തുമോ എന്ന കാര്യത്തിലും വാഷിംഗ്ടണിൽ ചർച്ചകൾ സജീവമാണ്.