ന്യൂയോർക്ക്: ലോകകോടീശ്വരൻ ഇലോൺ മസ്കിന്റെ റോക്കറ്റ്-സാറ്റലൈറ്റ് നിർമ്മാണ കമ്പനിയായ സ്പേസ് എക്സ്  ഓഹരി വിപണിയിലേക്ക് ചുവടുവെക്കുന്നു. ചരിത്രത്തിലെ ഏറ്റവും വലിയ പ്രാരംഭ ഓഹരി വില്പനയ്ക്കാണ് (IPO) കമ്പനി ഒരുങ്ങുന്നത്. ഐപിഒ വഴി ഏകദേശം 75 ശതകോടി യു.എസ് ഡോളർ സമാഹരിക്കാനാണ് കമ്പനി ലക്ഷ്യമിടുന്നത്.

യു.എസ് സെക്യൂരിറ്റീസ് ആൻഡ് എക്സ്ചേഞ്ച് കമ്മീഷന്  ബുധനാഴ്ച സമർപ്പിച്ച അപേക്ഷയിലാണ് ഈ വിവരങ്ങളുള്ളത്.  ഒരു ഓഹരിക്ക് 135 ഡോളർവിപണിയിൽ നിന്ന് ലഭിക്കുന്ന വിവരങ്ങൾ പ്രകാരം സ്പേസ് എക്സ് തങ്ങളുടെ 55.56 കോടി (555.6 Million) ഓഹരികൾ വിപണിയിലിറക്കും.

ഒരു ഓഹരിക്ക് 135 യു.എസ് ഡോളർ എന്ന നിശ്ചിത നിരക്കിലായിരിക്കും ഇത് വിൽക്കുക. ഈ വില നിശ്ചയിക്കുന്നതിലൂടെ സ്പേസ് എക്സിന്റെ ആകെ വിപണി മൂല്യം ഏകദേശം 1.77 ലക്ഷം കോടി (1.77 Trillion) ഡോളറിലെത്തും.  ഈ ഐപിഒ പൂർത്തിയാകുന്നതോടെ, 2019-ൽ സൗദി അരാംകോ സ്ഥാപിച്ച 26 ശതകോടി ഡോളറിന്റെ ഐപിഒ റെക്കോർഡാണ് സ്പേസ് എക്സ് തകർക്കാൻ പോകുന്നത്. 

സാധാരണയായി കമ്പനികൾ ഒരു പ്രൈസ് ബാൻഡ് (വില പരിധി) പ്രഖ്യാപിച്ച ശേഷമാണ് ഓഹരി വില നിശ്ചയിക്കാറുള്ളത്. എന്നാൽ സ്പേസ് എക്സ് തുടക്കത്തിൽ തന്നെ 135 ഡോളർ എന്ന് വില ഉറപ്പിച്ചു കൊണ്ടാണ് വിപണിയിലേക്ക് വരുന്നത് എന്നത് ശ്രദ്ധേയമാണ്. ജൂൺ 12-ഓടെ കമ്പനി നാസ്ഡാകിൽ (Nasdaq) 'SPCX' എന്ന ടിക്കർ ചിഹ്നത്തിൽ വ്യാപാരം ആരംഭിക്കുമെന്നാണ് റിപ്പോർട്ടുകൾ സൂചിപ്പിക്കുന്നത്.

ഈ ഐപിഒ വഴി സമാഹരിക്കുന്ന തുക ഇലോൺ മസ്കിന്റെ ആർട്ടിഫിഷ്യൽ ഇന്റലിജൻസ് (AI) സംരംഭമായ xAI-യുടെ കമ്പ്യൂട്ടിങ് ശേഷി വർദ്ധിപ്പിക്കുന്നതിനും സ്റ്റാർലിങ്ക്  സാറ്റലൈറ്റ് ശൃംഖല വിപുലീകരിക്കുന്നതിനും ഉപയോഗിക്കും. കൂടാതെ ചൊവ്വയിൽ സ്ഥിരമായ ഒരു മനുഷ്യ കോളനി സ്ഥാപിക്കുക എന്ന ലക്ഷ്യത്തിലേക്കും ഈ തുക വിനിയോഗിക്കും. ഐപിഒയ്ക്ക് ശേഷവും കമ്പനിയുടെ പൂർണ്ണ നിയന്ത്രണം ഇലോൺ മസ്കിന്റെ കൈകളിൽ തന്നെയായിരിക്കും. സ്പെഷ്യൽ ക്ലാസ്-ബി (Class B) ഓഹരികൾ കൈവശമുള്ളതിനാൽ കമ്പനിയിലെ 82.4 ശതമാനം വോട്ടിങ് അധികാരവും മസ്കിനായിരിക്കും. 

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്