ഹൂസ്റ്റൺ : ശാരീരിക ആരോഗ്യം പോലെ തന്നെ പ്രധാനമാണ് മാനസികാരോഗ്യവും. പലപ്പോഴും മാനസികാരോഗ്യവും അനുബന്ധ പ്രശ്‌നങ്ങളും യഥാസമയം പരിഹരിക്കപ്പെടുന്നില്ല. നമ്മുടെ മാനസികാരോഗ്യം സംരക്ഷിച്ചില്ലെങ്കിൽ അത് വിഷാദം, ഉത്കണ്ഠ, ആത്മഹത്യാ പ്രവണത, അക്രമ വാസന, ഏകാന്തത, സാമ്പത്തിക ഭാരം, ജോലി നഷ്ടപ്പെടൽ, സാമൂഹികമായ ഒറ്റപ്പെടൽ തുടങ്ങിയവയ്ക്ക് കാരണമാകും.

ശിഥിലമായ ബന്ധങ്ങൾ, തകരുന്ന കുടുംബങ്ങൾ, മറ്റ് പെരുമാറ്റ പ്രശ്‌നങ്ങൾ, മദ്യം, മയക്കുമരുന്ന്, മറ്റ് വസ്തുക്കൾ, സോഷ്യൽ മീഡിയ എന്നിവയ്ക്ക് അടിമപ്പെടുന്നതിന് അനാരോഗ്യകരമായ മനസ്സ് കാരണമാകും. ചികിത്സയും സഹായവും വിരൽത്തുമ്പിലാണെങ്കിലും പലരും മുന്നോട്ട് വരാനും സഹായം തേടാനും മടിക്കുന്നു. കാര്യങ്ങളെക്കുറിച്ചുള്ള അവബോധത്തിന്റെയും ഉൾക്കാഴ്ചയുടെയും അഭാവം, സ്വന്തം പ്രശ്‌നങ്ങൾ മറ്റൊരാളോട് പങ്കിടാനുള്ള ഭയം, നമ്മുടെ തനതായ സംസ്‌കാരം, നിഷേധാത്മകമായ വീക്ഷണം, മാനസിക രോഗങ്ങളെക്കുറിച്ചും ആസക്തികളെക്കുറിച്ചും ഉള്ള സാമൂഹിക അപമാന ഭയം എന്നിവ സഹായം തേടാൻ മടിക്കുന്ന കാരണങ്ങളാകാം.

നമ്മുടെ മലയാളി സമൂഹത്തിന്റെ ഈ വിനാശകരമായ സാഹചര്യങ്ങളെ നേരിടുവാൻ ഡോ. സജി മത്തായി ഒരു ഓൺലൈൻ സൗജന്യ സേവന പദ്ധതി സ്വപ്നം കണ്ടു. ഒരു ഐടി സ്‌പെഷ്യലിസ്റ്റായ ഡോ. സജി കൗൺസിലിംഗിൽ മാസ്റ്റേഴ്‌സും പി.എച്ച്.ഡി.യും നേടി. ദൈവാനുഗ്രഹത്താലും സേവന മനോഭാവമുള്ളവരും ദയയുള്ളവരുമായ ആളുകളുടെ പിന്തുണയാലും 2024, ഒക്‌ടോബർ 27ന് ഒരു ഓൺലൈൻ മീറ്റിംഗിലൂടെ റിലീഫ് കോർണർ എന്ന ചാരിറ്റബിൾ ഓർഗനൈസേഷൻ ഔദ്യോഗികമായി ഉദ്ഘാടനം ചെയ്തുകൊണ്ട് അദ്ദേഹത്തിന്റെ സ്വപ്നം ലോകത്തിന് സമർപ്പിച്ചു.

അമേരിക്കൻ, കനേഡിയൻ, ഇന്ത്യൻ മലയാളികളുടെ മാനസികാരോഗ്യ വികസനത്തെ പിന്തുണയ്ക്കുന്നതിനും വീണ്ടെടുക്കുന്നതിനും സൗജന്യ സഹായം വാഗ്ദാനം ചെയ്യുക എന്നതാണ് ഈ സംരംഭത്തിന്റെ ലക്ഷ്യം. ലോകമെമ്പാടും സേവനം വ്യാപിപ്പിക്കുക എന്നതാണ് ദീർഘകാല ലക്ഷ്യവും സ്വപ്നവും. അമേരിക്കയിൽ നിന്നും കേരളത്തിൽ നിന്നുമുള്ള നിരവധി പ്രമുഖരും യോഗ്യതയുള്ള മാനസികാരോഗ്യ വിദഗ്ധരും ഓൺലൈൻ മീറ്റിംഗിലൂടെ ഉദ്ഘാടനത്തിൽ പങ്കെടുക്കുകയും അവരുടെ പൂർണ്ണ പിന്തുണ അറിയിക്കുകയും ചെയ്തു. അവർ തങ്ങളുടെ വ്യക്തിപരവും ഹൃദയസ്പർശിയായതുമായ സന്ദേശങ്ങൾ പങ്കുവെക്കുകയും മലയാളികളെ സഹായിക്കുന്നതിനുള്ള മഹത്തായതും സുപ്രധാനവുമായ ഈ സംരംഭത്തിന് ഡോക്ടർ സജി മത്തായിയെയും അദ്ദേഹത്തിന്റെ ടീമംഗങ്ങളെയും അഭിനന്ദിക്കുകയും ചെയ്തു.

ഹൂസ്റ്റൺ സ്റ്റാഫോർഡ് സിറ്റി മേയർ കെൻ മാത്യൂസ് ഉദ്ഘാടനം നിർവ്വഹിക്കുകയും തന്റെ പിന്തുണ പങ്കുവെക്കുകയും സംരംഭത്തെ അഭിനന്ദിക്കുകയും ചെയ്തു. പ്രശസ്ത സൈക്കോളജിസ്റ്റും അഡിക്ഷൻ സപ്പോർട്ട് സ്‌പെഷ്യലിസ്റ്റുമായ ഡോ. സിസ്റ്റർ ജോവാൻ ചുങ്കപ്പുരയ്ക്ക് (ട്രാഡ ഡയറക്ടർ) ചില അപ്രതീക്ഷിത കാരണങ്ങളാൽ ഉദ്ഘാടന ചടങ്ങിൽ പങ്കെടുക്കാനായില്ല. എന്നാൽ ഡോ. ജോവാൻ ചുങ്കപ്പുര സൗജന്യമായി സേവനമനുഷ്ഠിക്കുന്ന റിലീഫ് കോർണറിലെ പ്രൊഫഷണലുകളുടെ ടീമിൽ അംഗമാണെന്ന് ഡോ. സജി മത്തായി വളരെ താഴ്മയോടെ പങ്കുവെച്ചു. ഫോർട്ട്‌ബെൻഡ് കൗണ്ടി ജഡ്ജ് കെ.പി. ജോർജ് ഈ സംരംഭത്തിന് പൂർണ്ണ പിന്തുണ നൽകി അഭിനന്ദിച്ചു. ഐപ്പ് തോമസ്, തന്റെ ജീവിതാനുഭവത്തിലൂടെ മദ്യപാനികളേയും അവരുടെ കുടുംബാംഗങ്ങളേയും സഹായിക്കുന്നതിലൂടെ ലഭിക്കുന്ന സന്തോഷം പങ്കുവച്ചു.  മദ്യപാന ആസക്തിയിൽ നിന്ന് കരകയറാൻ സഹായം ആവശ്യമുള്ള എല്ലാവരെയും മുന്നോട്ട് വരാനും സഹായം നേടാനും പ്രോത്സാഹിപ്പിച്ചു.

അലക്‌സാണ്ടർ ജേക്കബ് ആസക്തി ബോധവൽക്കരണത്തിന്റെ പ്രാധാന്യത്തെക്കുറിച്ചുള്ള വിലപ്പെട്ട വിവരങ്ങൾ ഊന്നിപ്പറയുകയും പങ്കുവെക്കുകയും ചെയ്തു. മറ്റ് പ്രശസ്ത കൗൺസിലർമാരായ അഡ്വ. ഡോ. മാത്യു വൈരമൺ, ഡോ. തോമസ് പി. മാത്യു, ഡോ. ഫ്രാൻസിസ് ജേക്കബ്, പാട്രിക് എം. കല്ലട എന്നിവരും ഈ മഹത്തായ സേവനത്തെ പിന്തുണയ്ക്കാനുള്ള തങ്ങളുടെ ആഗ്രഹവും സന്നദ്ധതയും പങ്കുവെച്ചു. പ്രശസ്ത കർണാടക സംഗീതജ്ഞൻ കുമ്മനം ശശികുമാറും കാർട്ടൂണിസ്റ്റ് പന്തളം ബാബുവും മാനസികാരോഗ്യം വീണ്ടെടുക്കുന്നതിനും നിലനിർത്തുന്നതിനും സംഗീതത്തിന്റെയും കലയുടെയും പ്രാധാന്യം പങ്കുവെക്കുകയും വെർച്വൽ ക്ലാസുകൾ നൽകാനുള്ള പൂർണ പിന്തുണയും സന്നദ്ധതയും വാഗ്ദാനം ചെയ്യുകയും ചെയ്തു. തങ്ങളുടെ കുടുംബത്തിന്റെ കഷ്ടപ്പാടുകളിൽ നിന്ന് കരകയറാൻ റിലീഫ് കോർണർ ഗ്രൂപ്പ് സഹായിച്ചതെങ്ങനെയെന്ന് അൽഫോൻസി ജെയിംസ് അഭിമാനത്തോടെ പങ്കുവെച്ചു. ഈ ടീമിൽ നിന്ന് തനിക്ക് ലഭിച്ച എല്ലാ പിന്തുണക്കും സഹായത്തിനും അൽഫോൻസി നന്ദി അറിയിച്ചു. ഐപ്പ് തോമസ് നന്ദി പറഞ്ഞുകൊണ്ട് ഔദ്യോഗിക ഉദ്ഘാടനം സമാപിച്ചു.

വാഗ്ദാനം ചെയ്യുന്ന എല്ലാ സേവനങ്ങളും വളരെ രഹസ്യാത്മകവും വിശ്വസനീയവും, ആത്മീയതയ്ക്ക് പ്രാധാന്യം നൽകുന്നവയുമാണ്. പരിചയസമ്പന്നരായ കൗൺസിലർമാർ, സൈക്കോളജിസ്റ്റുകൾ, അഡിക്ഷൻ സ്‌പെഷ്യലിസ്റ്റുകൾ, ലൈഫ് കോച്ചുകൾ, കാർട്ടൂണിസ്റ്റുകൾ, സംഗീതജ്ഞർ എന്നിവരടങ്ങുന്ന ടീം സേവനം ചെയ്യാൻ തയ്യാറായിരിക്കുന്നു. ഡോ. സജി മത്തായിയും സംഘവും, ഈ സൗജന്യ സേവനം ഉപയോഗപ്പെടുത്താൻ നിങ്ങളെ എല്ലാവരേയും ഹൃദയപൂർവ്വം സ്വാഗതം ചെയ്യുന്നു. ബഹുമാന്യരായ വായനക്കാരോട് ഇത് സുഹൃത്തുക്കളുമായും കുടുംബങ്ങളുമായും കമ്മ്യൂണിറ്റികളുമായും പങ്കിടാൻ വിനീതമായി അഭ്യർത്ഥിക്കുന്നു. നിങ്ങളുടെ ഏതൊരു വൈദഗ്ധ്യമോ കഴിവുകളോ ഉപയോഗിച്ച് ഈ ഉദ്യമത്തെ പിന്തുണയ്ക്കാൻ തയ്യാറുള്ളവർ മുന്നോട്ട് വരിക. നമുക്കൊരുമിച്ച് ഒരു മാറ്റമുണ്ടാക്കാം. മാനസികമായി സുശക്തമായ ഒരു സമൂഹത്തിനായി നമുക്ക് സ്വപ്നംകാണാം. കൂടുതൽ വിവരങ്ങൾക്ക് ദയവായി www.Reliefcorner.org എന്ന വെബ്‌സൈറ്റ് സന്ദർശിക്കുക.

ജീമോൻ റാന്നി

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

ടെലിഗ്രാം :ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്