സഹപ്രവർത്തകനെതിരായ പരാമർശം: പരസ്യമായി മാപ്പപേക്ഷിച്ച് അമേരിക്കൻ സുപ്രീം കോടതി ജസ്റ്റിസ് സോണിയ സോട്ടോമയർ

APRIL 15, 2026, 9:42 PM

വാഷിംഗ്ടൺ: സഹപ്രവർത്തകനായ ജസ്റ്റിസ് ബ്രെറ്റ് കവനക്കെതിരെ നടത്തിയ വ്യക്തിപരമായ പരാമർശങ്ങളിൽ ഖേദം പ്രകടിപ്പിച്ച് യുഎസ് സുപ്രീം കോടതി ജസ്റ്റിസ് സോണിയ സോട്ടോമയർ രംഗത്ത്.

ട്രംപ് ഭരണകൂടത്തിന്റെ വിവാദമായ ഇമിഗ്രേഷൻ നയങ്ങളെ (Immigration Enforcement) പിന്തുണച്ച കവനക്കിന്റെ നിലപാടിനെതിരെ കഴിഞ്ഞ ആഴ്ച ഒരു സർവ്വകലാശാലയിൽ നടത്തിയ പ്രസംഗത്തിലാണ് സോണിയ വിവാദ പരാമർശം നടത്തിയത്.

സാധാരണക്കാരുടെ ജീവിതം അറിയാത്ത പ്രൊഫഷണൽ പശ്ചാത്തലമുള്ള വ്യക്തിയാണ് കവനക്കെന്നും അദ്ദേഹത്തിന് മണിക്കൂർ കൂലിക്ക് ജോലി ചെയ്യുന്നവരെ അറിയില്ലെന്നുമായിരുന്നു സോണിയയുടെ വിമർശനം.

അഭയാർത്ഥികളെ അതിർത്തിയിൽ തടയുന്നതുമായി ബന്ധപ്പെട്ട കേസിൽ വംശീയമായ ഘടകങ്ങൾ പരിശോധനയ്ക്ക് ആധാരമാക്കാമെന്ന കവനക്കിന്റെ നിലപാടിനെ സോണിയ സോട്ടോമയർ നേരത്തെ ശക്തമായി എതിർത്തിരുന്നു.

ഭരണഘടനാപരമായ സ്വാതന്ത്ര്യം ഇല്ലാതാകുന്നതിൽ നിശബ്ദയായി ഇരിക്കാൻ കഴിയില്ലെന്ന് തന്റെ വിയോജന കുറിപ്പിൽ അവർ വ്യക്തമാക്കിയിരുന്നു. എന്നാൽ നിയമവൃത്തങ്ങളിൽ നിന്നടക്കം വിമർശനം ഉയർന്നതോടെ, തന്റെ വാക്കുകൾ അനുചിതമായിപ്പോയെന്നും വ്യക്തിപരമായി മുറിവേൽപ്പിച്ചതിൽ സഹപ്രവർത്തകനോട് ക്ഷമ ചോദിച്ചതായും സുപ്രീം കോടതി പുറത്തിറക്കിയ പ്രസ്താവനയിൽ സോണിയ അറിയിച്ചു.