ഇൽഹാൻ ഒമറിന്റെ ഭർത്താവിന്റെ വൈനറി പൂട്ടി; സ്വത്ത് വിവരങ്ങളിൽ പൊരുത്തക്കേടെന്ന് ആരോപണം

APRIL 24, 2026, 12:27 AM

കാലിഫോർണിയ: അമേരിക്കൻ കോൺഗ്രസ് അംഗം ഇൽഹാൻ ഒമറിന്റെ ഭർത്താവ് ടിം മൈനറ്റിന്റെ ഉടമസ്ഥതയിലുള്ള കാലിഫോർണിയയിലെ വൈനറി പൂട്ടി. ഒമറിന്റെ സ്വത്ത് വിവരങ്ങളിൽ വലിയ വർദ്ധനവ് രേഖപ്പെടുത്തിയത് റിപ്പബ്ലിക്കൻ പാർട്ടി അംഗങ്ങളുടെ കടുത്ത പരിശോധനയ്ക്ക് ഇടയാക്കിയ സാഹചര്യത്തിലാണ് ഈ നീക്കം.

2024ലെ വാർഷിക ഫയലിംഗിൽ തന്റെ ഭർത്താവിന് 6 ദശലക്ഷം മുതൽ 30 ദശലക്ഷം ഡോളർ വരെ മൂല്യമുള്ള ആസ്തിയുണ്ടെന്നാണ് ഇൽഹാൻ ഒമർ ആദ്യം രേഖപ്പെടുത്തിയിരുന്നത്. എന്നാൽ തൊട്ടുപിന്നാലെ ഇത് വലിയ വിവാദമായി.

വിവാദങ്ങൾക്കും അന്വേഷണങ്ങൾക്കും പിന്നാലെ ഒമർ ഈ കണക്കുകൾ തിരുത്തി. പുതിയ ഫയലിംഗ് പ്രകാരം ഈ ആസ്തി പൂജ്യം ('0') ആയി കുറച്ചു. അക്കൗണ്ടന്റിന് സംഭവിച്ച പിശകാണെന്നും തന്റെ ഭർത്താവ് കോടീശ്വരനല്ലെന്നുമാണ് ഒമറിന്റെ വിശദീകരണം.

സാമ്പത്തിക ക്രമക്കേട് ആരോപണങ്ങളും കേസുകളും നിലനിൽക്കുന്നതിനിടെ ഏപ്രിൽ 4ഓടെ ഈ വൈനറി ഔദ്യോഗികമായി പ്രവർത്തനം അവസാനിപ്പിച്ചു.

ഡോണാൾഡ് ട്രംപ് ഉൾപ്പെടെയുള്ള റിപ്പബ്ലിക്കൻ നേതാക്കൾ ഒമറിനെതിരെ രംഗത്തെത്തിയിട്ടുണ്ട്. ഇത് വെറുമൊരു അക്കൗണ്ടിംഗ് പിശകല്ലെന്നും അഴിമതി മറയ്ക്കാനുള്ള ശ്രമമാണെന്നുമാണ് ഇവരുടെ ആരോപണം. നിലവിൽ ഹൗസ് കമ്മിറ്റികൾ ഈ വിഷയത്തിൽ അന്വേഷണം തുടരുകയാണ്. താൻ ഭർത്താവിന്റെ ബിസിനസ് കാര്യങ്ങളിൽ ഇടപെടാറില്ലെന്നും, വിവരങ്ങൾ കൃത്യമല്ലാത്തതിനാലാണ് ഫയലിംഗിൽ മാറ്റം വരുത്തിയതെന്നും ഇൽഹാൻ ഒമറിന്റെ വക്താവ് അറിയിച്ചു.

പി.പി. ചെറിയാൻ