വാഷിംഗ്‌ടണ്‍: പ്രസിഡന്‍റ് ഡോണള്‍ഡ് ട്രംപ് നിരോധനം വൈകിപ്പിച്ചതോടെ ചൈനീസ് സോഷ്യല്‍ മീഡിയ പ്ലാറ്റ്‌ഫോമായ ടിക്ടോകിന് ആശ്വാസം. ടിക്ടോക് അമേരിക്കയില്‍ ആപ്പ് സ്റ്റോറുകളില്‍ തിരിച്ചെത്തി എന്നാണ്  ലഭിക്കുന്ന വിവരം. ഷോര്‍ട് വീഡിയോ ആപ്പായ ടിക്ടോക്, ആപ്പിളിന്‍റെ ആപ്പ് സ്റ്റോറിലും ഗൂഗിളിന്‍റെ പ്ലേ സ്റ്റോറിലും ലഭ്യമായിത്തുടങ്ങിയതായി ആണ് പുറത്തു വരുന്ന റിപ്പോർട്ടുകൾ വ്യക്തമാക്കുന്നത്.

ടിക്ടോക്കിനെതിരെ സുരക്ഷാ ആരോപണങ്ങളുമായി യുഎസ് നിരോധന നടപടികളിലേക്ക് കടന്നതോടെയായിരുന്നു ആപ്പിന് കഷ്ടകാലം ആരംഭിച്ചത്. അമേരിക്കയില്‍ ഇക്കഴിഞ്ഞ ജനുവരി 19ന് സമ്പൂര്‍ണ വിലക്ക് വരുന്നതിന് മുന്നോടിയായി ടിക്ടോക് ആപ്ലിക്കേഷന്‍ യുഎസിലെ ആപ്പ് സ്റ്റോറുകളില്‍ നിന്ന് നീക്കംചെയ്യപ്പെട്ടിരുന്നു. വിലക്ക് ഒഴിവാകാന്‍ ടിക്‌ടോക്കിന്‍റെ അമേരിക്കന്‍ ബിസിനസ്, ഉടമകളായ ബൈറ്റ്‌ഡാന്‍സ് ഏതെങ്കിലും യുഎസ് കമ്പനിക്ക് വില്‍ക്കുക മാത്രമായിരുന്നു മുന്നിലുണ്ടായിരുന്ന ഏക വഴി.

എന്നാല്‍ ടിക്ടോക്കിന്‍റെ വിലക്ക് നടപ്പാക്കുന്നത് ഡോണള്‍ഡ് ട്രംപ് അധികാരമേറ്റതോടെ 75 ദിവസത്തേക്ക് നീട്ടിവയ്ക്കുകയായിരുന്നു. ഇതോടെയാണ് ടിക്ടോക്കിന് അമേരിക്കയില്‍ താല്‍ക്കാലികമായി പ്രവര്‍ത്തിക്കാനുള്ള അവസരമൊരുങ്ങിയത്. ഇന്നലെ (വ്യാഴം) മുതല്‍ ടിക്ടോക് ആപ്പ് വീണ്ടും അമേരിക്കയില്‍ ഡൗണ്‍ലോഡ് ചെയ്യാന്‍ കഴിയുന്നുണ്ട്. ടിക്ടോക്കിന് പ്രവര്‍ത്തിക്കാന്‍ താല്‍ക്കാലിക അനുമതി ട്രംപ് നല്‍കിയിരുന്നെങ്കിലും ആപ്പ് സ്റ്റോറുകളില്‍ ഇത് ഗൂഗിളും ആപ്പിളും ലഭ്യമാക്കിയിരുന്നില്ല. 

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

ടെലിഗ്രാം :ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്