മിനിയാപൊളിസ്: ബുധനാഴ്ച മിനിയാപൊളിസിൽ ഫെഡറൽ ഏജന്റിന്റെ വെടിയേറ്റ് കൊല്ലപ്പെട്ട യുവതിയെ തിരിച്ചറിഞ്ഞു. മിനിയാപൊളിസിൽ സ്ഥിരതാമസമാക്കിയ 37 വയസ്സുകാരിയായ റെനെ നിക്കോൾ ഗുഡ് ആണ് കൊല്ലപ്പെട്ടതെന്ന് അവരുടെ മാതാവ് ഡോണ ഗാംഗർ സ്ഥിരീകരിച്ചു.

മിനിയാപൊളിസിലെ പോർട്ട്‌ലാൻഡ് അവന്യൂവിൽ ബുധനാഴ്ച രാവിലെയാണ് വെടിവയ്പ്പുണ്ടായത്. സംഭവസ്ഥലത്ത് വെച്ച് തന്നെ റെനെ കൊല്ലപ്പെട്ടു. തങ്ങളുടെ മകൾ ഇത്തരമൊരു സംഭവത്തിൽ ഉൾപ്പെട്ടുവെന്ന് വിശ്വസിക്കാനാകുന്നില്ലെന്ന് കുടുംബം പറഞ്ഞു.

'അവൾ അത്യന്തം കരുണയുള്ളവളും സ്‌നേഹനിധിയുമായ ഒരു മനുഷ്യനായിരുന്നു. മറ്റുള്ളവരെ സഹായിക്കാൻ എപ്പോഴും മുന്നിലുണ്ടായിരുന്നു,' മാതാവ് ഡോണ വികാരാധീനയായി പറഞ്ഞു. വെടിവയ്പ്പ് നടന്ന സമയത്ത് അവൾ ഭയപ്പെട്ടുപോയിട്ടുണ്ടാകാമെന്നും അവർ കൂട്ടിച്ചേർത്തു.

റെനെ നിക്കോൾ ഒരു കവയിത്രിയും എഴുത്തുകാരിയുമായിരുന്നു. 2023ൽ മരിച്ച ടിമ്മി റേ മക്ലിൻ ജൂനിയർ ആണ് റെനെയുടെ ഭർത്താവ്. ഇവർക്ക് നാലോ അഞ്ചോ വയസ്സുള്ള ഒരു മകനുണ്ട്. പിതാവ് മരിച്ചതിന് പിന്നാലെ അമ്മയെയും നഷ്ടപ്പെട്ട കുഞ്ഞിനെ ഏറ്റെടുക്കാൻ റെനെയുടെ ബന്ധുക്കൾ സന്നദ്ധത അറിയിച്ചിട്ടുണ്ട്.

എമിഗ്രേഷൻ ആൻഡ് കസ്റ്റംസ് എൻഫോഴ്‌സ്‌മെന്റ് ഏജന്റാണ് വെടിവച്ചതെന്ന് അധികൃതർ സ്ഥിരീകരിച്ചിട്ടുണ്ട്. പ്രതിഷേധക്കാരുമായുള്ള സംഘർഷത്തിനിടെയാണോ അതോ മറ്റ് സാഹചര്യത്തിലാണോ വെടിവയ്പ്പുണ്ടായത് എന്നതിനെക്കുറിച്ച് അന്വേഷണം നടക്കുകയാണ്.

മിനിയാപൊളിസ് സിറ്റി കൗൺസിൽ അംഗങ്ങൾ റെനെയുടെ മരണത്തിൽ അനുശോചനം രേഖപ്പെടുത്തി. സംഭവസ്ഥലത്ത് തടിച്ചുകൂടിയ നാട്ടുകാർ റെനെയുടെ ഓർമ്മയ്ക്കായി പ്രാർത്ഥനകൾ നടത്തി.

പി.പി. ചെറിയാൻ

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്