ക്ഷേത്രക്കമ്മിറ്റി വാങ്ങിവച്ചിരുന്നത് 24,000 രൂപയുടെ പടക്കങ്ങൾ: പൊട്ടിയത് ചൈനീസ് പടക്കങ്ങൾ

OCTOBER 29, 2024, 9:42 AM

നീലേശ്വരം: കാസർകോട് നീലേശ്വരത്തെ അഞ്ഞൂറ്റമ്പലം വീരർകാവ് ക്ഷേത്രത്തിലെ ഉത്സവത്തിനിടെ നടന്ന വെടിക്കെട്ടിനായി വാങ്ങിയത് 24,000 രൂപയുടെ പടക്കം.

ഇതിന്റെ ബില്ല് പൊലീസിനു കൈമാറി. വെടിക്കെട്ട് പുരയ്ക്കു സമീപം നിന്നവർക്കാണ് പരുക്കേറ്റിരിക്കുന്നത്. മൂവാളംകുഴി ചാമുണ്ഡി തെയ്യത്തിന്റെ തോറ്റം ഇന്നലെ രാത്രി 12 മണിക്കാണ് പുറത്തേക്കു വന്നത്.

ആ തോറ്റത്തിന്റെ തട്ടുകൊള്ളാതിരിക്കാൻ വേണ്ടി സ്ത്രീകളുൾപ്പെടെയുള്ളവർ സമീപമുള്ള ഷെഡിനകത്താണ് നിന്നത്. ഈ ഷെഡിനകത്തായിരുന്നു പടക്കങ്ങൾ വച്ചിരുന്നത്.

തോറ്റത്തിന്റെ പുറപ്പാട് സമയത്ത് ചൈനീസ് പടക്കമാണ് പൊട്ടിച്ചത്. ഇതു പൊട്ടിച്ചപ്പോൾ ഒരു ഗുണ്ട് പൊട്ടുകയും അതു സ്ത്രീകൾനിന്ന ഷെഡിന്റെ മുകളിൽപ്പോയി വീഴുകയും ചെയ്തു.

അതിനകത്ത് തീപ്പൊരി വീഴുകയും മുഴുവൻ പൊട്ടിത്തെറിക്കുകയുമായിരുന്നു. സ്ത്രീകളും കുട്ടികളുമാണ് അകത്തുണ്ടായിരുന്നത്. വലിയ തീഗോളംപോലെ പടക്കശേഖരം പൊട്ടിത്തെറിക്കുകയായിരുന്നു. പലർക്കും മുഖത്തും കൈകൾക്കുമാണ് പൊള്ളലേറ്റത്.