എടിഎം കവർച്ച നടത്താൻ ശ്രമിച്ച പ്രതിയെ പിടികൂടി

FEBRUARY 12, 2025, 11:46 PM

കോഴിക്കോട്: കോഴിക്കോട് ചേവായൂർ പറമ്പിൽകടവിൽ എടിഎം കവർച്ച നടത്താൻ ശ്രമിച്ച പ്രതിയെ പിടികൂടി. പുലർച്ചെ 2.30ന് പൊലീസ് പട്രോളിങ്ങിനിടെയാണു സംഭവം.

പറമ്പിൽ കടവിലെ ധനകാര്യ സ്ഥാപനത്തിന്റെ എടിഎം ഷട്ടർ താഴ്ത്തിയ നിലയിലായിരുന്നു. ഉള്ളിൽ വെളിച്ചവും ആളനക്കവും ശ്രദ്ധയിൽപ്പെട്ടപ്പോഴാണു പൊലീസ് സംഘം പരിശോധിച്ചത്. എടിഎമ്മിനു പുറത്തു ഗ്യാസ് കട്ടറും കണ്ടതോടെ പൊലീസ് ഷട്ടർ തുറക്കാൻ ശ്രമിച്ചു. അപ്പോൾ അകത്തുണ്ടായിരുന്ന യുവാവ് ഭീഷണിപ്പെടുത്തി.

മൂന്ന് പേരടങ്ങുന്ന പെട്രോളിംഗ് സംഘം ഉടനെ പ്രതിയെ കീഴ്‌പ്പെടുത്തുകയായിരുന്നു. മലപ്പുറം സ്വദേശിയായ വിജേഷ് നാരായണനാണ് പൊലീസിൻ്റെ പിടിയിലായത്.