ഷിക്കാഗോയുടെ ഗതാഗതചരിത്രത്തിന് 133 വയസ്സ്; 1893ൽ ആരംഭിച്ച ലേക്ക് സ്ട്രീറ്റ് എലിവേറ്റഡ് റെയിൽവേ ഇന്നും സജീവം

NOVEMBER 6, 2026, 1:10 PM

ഷിക്കാഗോ: ഷിക്കാഗോ നഗരത്തിന്റെ ഗതാഗതചരിത്രത്തിൽ വിപ്ലവകരമായ മാറ്റത്തിന് തുടക്കമിട്ട ലേക്ക് സ്ട്രീറ്റ് എലിവേറ്റഡ് റെയിൽവേ (Lake tSreet Elevated Railroad) യാത്രാസേവനം ആരംഭിച്ചിട്ട് ഇന്ന് 133 വർഷം പൂർത്തിയാകുന്നു. 1893 നവംബർ 6നാണ് ഈ ചരിത്രപ്രസിദ്ധമായ റെയിൽപാതയിൽ പൊതുജനങ്ങൾക്കായുള്ള പതിവ് സർവീസ് ആരംഭിച്ചത്.

ഇന്ന് ഷിക്കാഗോയുടെ അഭിമാനമായ 'L' ട്രെയിൻ സംവിധാനത്തിന്റെ ഗ്രീൻ ലൈൻ (Green Line) ആയി തുടരുന്ന ഈ പാത, പത്തൊൻപതാം നൂറ്റാണ്ടിന്റെ അവസാനത്തിൽ നഗരത്തിന്റെ വളർച്ചയ്ക്കും വികസനത്തിനും വലിയ സംഭാവന നൽകിയിരുന്നു.

1893ന് മുമ്പ് ഷിക്കാഗോയിലെ ജനങ്ങൾ പ്രധാനമായും കാൽനടയായും കുതിരവണ്ടികളിലൂടെയും സ്ട്രീറ്റ് കാറുകളിലൂടെയുമായിരുന്നു യാത്ര ചെയ്തിരുന്നത്. തിരക്കേറിയ തെരുവുകളും ഗതാഗതക്കുരുക്കുകളും നഗരത്തിലെ യാത്രകൾ ദുഷ്‌കരമാക്കിയിരുന്നു. ഈ സാഹചര്യത്തിലാണ് തെരുവുകൾക്ക് മുകളിലൂടെ ഉയർത്തിനിർമിച്ച ഇരുമ്പുപാളങ്ങളിലൂടെ ട്രെയിനുകൾ ഓടിക്കുന്ന സംവിധാനം നിലവിൽവന്നത്.

ഇന്നത്തെ വൈദ്യുത ട്രെയിനുകളിൽനിന്ന് വ്യത്യസ്തമായി, ആദ്യകാല ട്രെയിനുകൾ കൽക്കരി കത്തിച്ച് പ്രവർത്തിക്കുന്ന ചെറിയ ആവി എൻജിനുകളാണ് ഉപയോഗിച്ചിരുന്നത്. ഈ എൻജിനുകൾ തടികൊണ്ടുള്ള യാത്രാബോഗികളെ വലിച്ചുകൊണ്ടുപോയിരുന്നു.

1893 നവംബർ 4ന് ഔദ്യോഗിക ഉദ്ഘാടനച്ചടങ്ങ് നടന്നെങ്കിലും നവംബർ 6നാണ് പതിവ് യാത്രാസേവനം ആരംഭിച്ചത്. ഇന്നത്തെ വെസ്റ്റ് ലൂപ്പിന് സമീപമുള്ള മാഡിസൺ-മാർക്കറ്റ് പ്രദേശത്തുനിന്ന് കാലിഫോർണിയ അവന്യൂവരെയായിരുന്നു ആദ്യ സർവീസ്. ചരിത്രരേഖകൾ പ്രകാരം ആദ്യദിവസം തന്നെ 50,000ത്തിലധികം യാത്രക്കാർ പുതിയ ഗതാഗതസംവിധാനം ഉപയോഗിച്ചു.

ഉയർന്ന പാളങ്ങളിലൂടെ സഞ്ചരിക്കുന്ന ട്രെയിനുകൾ നഗരവാസികളുടെ യാത്രാസമയം ഗണ്യമായി കുറച്ചു. വ്യാപാരസ്ഥാപനങ്ങളിലേക്കും തൊഴിൽകേന്ദ്രങ്ങളിലേക്കും വേഗത്തിൽ എത്താൻ സാധിച്ചതോടെ നഗരത്തിന്റെ പടിഞ്ഞാറൻ മേഖലകളുടെ വികസനത്തിനും ഈ റെയിൽപാത വഴിയൊരുക്കി.

1896ൽ ലേക്ക് സ്ട്രീറ്റ് റെയിൽവേ ആവി എൻജിനുകളിൽനിന്ന് വൈദ്യുത ട്രെയിനുകളിലേക്ക് മാറി. ഇതോടെ കൽക്കരി പുകയും എൻജിനുകളുടെ ശബ്ദവും കുറഞ്ഞു. തുടർന്നുള്ള പതിറ്റാണ്ടുകളിൽ പാത വിപുലീകരിക്കപ്പെടുകയും ഷിക്കാഗോയുടെ പ്രധാന പൊതുഗതാഗത ശൃംഖലയുടെ ഭാഗമായി മാറുകയും ചെയ്തു.

ഇന്ന് ഷിക്കാഗോ ട്രാൻസിറ്റ് അതോറിറ്റിയുടെ (CTA) ഗ്രീൻ ലൈൻ സർവീസിന്റെ ഭാഗമാണ് ഈ ചരിത്രപാത. ആധുനിക ട്രെയിനുകളും നവീകരിച്ച സ്റ്റേഷനുകളും എത്തിയെങ്കിലും 1893ൽ ആരംഭിച്ച ഗതാഗതപാരമ്പര്യം ഇന്നും തുടരുന്നു.
അമേരിക്കയിലെ നഗരഗതാഗത ചരിത്രത്തിൽ നിർണായക സ്ഥാനമുള്ള ഷിക്കാഗോയിലെ 'L' ട്രെയിൻ സംവിധാനം, 133 വർഷങ്ങൾക്കിപ്പുറവും നഗരത്തിന്റെ ചരിത്രത്തെയും വർത്തമാനകാലത്തെയും ബന്ധിപ്പിക്കുന്ന സജീവ സ്മാരകമായി നിലകൊള്ളുകയാണ്.

അനിൽ മറ്റത്തിക്കുന്നേൽ