'ആളുകളെ ഒഴിപ്പിച്ച് സുരക്ഷിതരാക്കാൻ മുന്നറിയിപ്പ്'; കോഴിക്കോട് ജില്ലാ കോടതിയിൽ ബോംബ് ഭീഷണി

MARCH 10, 2026, 3:42 AM

കോഴിക്കോട്: കോഴിക്കോട് ജില്ലാ കോടതിയിൽ വ്യാജ ബോംബ് ഭീഷണി. ജില്ലാ ജഡ്ജിയുടെ ഓഫീസിലെ ഇമെയിലിലേക്കാണ് ഭീഷണി സന്ദേശം എത്തിയത്. തുടർന്ന് പൊലീസ് ബോംബ് സ്ക്വാഡും ഡോഗ് സ്ക്വാഡും എത്തി പരിശോധന നടത്തി. പരിശോധനയിൽ ഭീഷണി വ്യാജമാണെന്ന് കണ്ടെത്തി.

ജഡ്ജിയുടെ ചേംബറിൽ സയനൈഡ് വാതകം നിറച്ച 15 വിഷബോംബുകൾ പൊട്ടിത്തെറിക്കുമെന്നായിരുന്നു ഇമെയിൽ സന്ദേശത്തിലെ ഉള്ളടക്കം. നിരപരാധികൾക്ക് നീതി ലഭിക്കാത്ത കോടതി കൊണ്ട് എന്താണ് പ്രയോജനം എന്നതും സന്ദേശത്തിൽ പരാമർശിച്ചിരുന്നു. ഇത് വ്യാജ ഭീഷണിയല്ലെന്നും പരമാവധി ആളുകളെ ഒഴിപ്പിച്ച് സുരക്ഷിതരാക്കാൻ മുന്നറിയിപ്പ് നൽകുകയാണെന്നുമാണ് സന്ദേശത്തിൽ പറഞ്ഞിരുന്നത്.

സന്ദേശം ശ്രദ്ധയിൽപ്പെട്ടതോടെ കോടതിയിലെ ജീവനക്കാരി ഉടൻ പൊലീസിനെ വിവരം അറിയിച്ചു. തുടർന്ന് നടത്തിയ പരിശോധനയിൽ സംശയാസ്പദമായ ഒന്നും കണ്ടെത്താനായില്ല.