കോട്ടുക്കല്‍ ദേവീ ക്ഷേത്രത്തിലെ ആര്‍എസ്‌എസ് ഗണഗീതാലാപനം; ഉപദേശക സമിതിയെ പിരിച്ചു വിട്ടു

APRIL 10, 2025, 11:13 AM

കൊല്ലം: കോട്ടുക്കല്‍ ദേവി ക്ഷേത്രത്തിലെ ആർഎസ്‌എസ് ഗണഗീത വിവാദത്തില്‍ ഉപദേശക സമിതിയെ പിരിച്ചു വിട്ട് തിരുവിതാംകൂർ ദേവസ്വം ബോർഡ്.

ഉത്സവാഘോഷത്തിലെ ഗാനമേളയില്‍ ഗണഗീതം പാടിയതില്‍ ഉപദേശക സമിതിക്ക് വീഴ്ച പറ്റിയെന്ന് കണ്ടെത്തിയതിനെ തുടർന്നാണ് തിരുവിതാംകൂർ ദേവസ്വം ബോർഡിന്‍റെ നടപടി.

ക്ഷേത്ര പരിസരത്ത് ആർഎസ്‌എസിന്‍റെ കൊടിയും തോരണങ്ങളും കെട്ടിയെന്ന പരാതിയില്‍ കൊട്ടാരക്കര ദേവസ്വം അസിസ്റ്റൻറ് കമ്മീഷണർ അന്വേഷണം നടത്തുന്നതിനിടെയാണ് ഗാനമേളയില്‍ ഗണഗീതം പാടിയത്. ഇത് ബോധപൂർവ്വം ചെയ്തതെന്നാണ് ദേവസ്വം ബോർഡിന്‍റെ വിലയിരുത്തല്‍.

ക്ഷേത്രപരിസരം രാഷ്ട്രീയ പ്രചരണത്തിന് ഉപയോഗിച്ചെന്ന നാട്ടുകാരന്‍റെ പരാതിയില്‍ കടയ്ക്കല്‍ പോലീസ് എടുത്ത കേസിലും അന്വേഷണം തുടരുകയാണ്.

നേരത്തെ വിപ്ലവ ഗാന വിവാദത്തിന്‍റെ പശ്ചാത്തലത്തില്‍ കടയ്ക്കല്‍ ദേവി ക്ഷേത്രത്തിലെ ഉപദേശക സമിതിയെയും ദേവസ്വം ബോർഡ് പിരിച്ചു വിട്ടിരുന്നു.

കഴിഞ്ഞ ദിവസമാണ് കോട്ടുക്കല്‍ മഞ്ഞിപ്പുഴ ദേവീ ക്ഷേത്രത്തില്‍ ഗാനമേള നടന്നത്. ആളുകളുടെ ആവശ്യപ്രകാരമാണ് ഗണഗീതം പാടിയതെന്നായിരുന്നു സംഭവത്തില്‍ ഗാനമേള ട്രൂപ്പിലെ അംഗങ്ങള്‍ നല്‍കിയ വിശദീകരണം.