ചുട്ട് പൊള്ളി കേരളം; കോന്നിയിലും മൂന്നാറും ഓറഞ്ച് അലർട്ട്

FEBRUARY 26, 2026, 5:15 AM

തിരുവനന്തപുരം: സംസ്ഥാനത്ത് കഴിഞ്ഞ 24 മണിക്കൂറിനിടെ ഏറ്റവും ഉയർന്ന അൾട്രാവയലറ്റ് (UV) സൂചിക രേഖപ്പെടുത്തിയത് കോന്നിയിലും മൂന്നാറുമെന്ന് റിപ്പോർട്ട്. ഇരു സ്ഥലങ്ങളിലും UV സൂചിക 8 ആയി രേഖപ്പെടുത്തി. ജാഗ്രതയുടെ ഭാഗമായി India Meteorological Department ഓറഞ്ച് അലർട്ട് പ്രഖ്യാപിച്ചു.

UV സൂചിക 8 മുതൽ 10 വരെ രേഖപ്പെടുത്തുന്ന പ്രദേശങ്ങളിലാണ് ഓറഞ്ച് അലർട്ട് പ്രഖ്യാപിക്കുന്നത്. ഇതേസമയം കൊട്ടാരക്കര, ചെങ്ങന്നൂർ, ചങ്ങനാശേരി, ഒല്ലൂർ, തൃത്താല, പൊന്നാനി, ബേപ്പൂർ, മാനന്തവാടി മേഖലകളിൽ മഞ്ഞ അലർട്ട് പ്രഖ്യാപിച്ചിട്ടുണ്ട്. ഇവിടങ്ങളിൽ UV സൂചിക 6 മുതൽ 7 വരെയാണ്.

അതേസമയം തുടർച്ചയായി കൂടുതൽ സമയം അൾട്രാവയലറ്റ് കിരണങ്ങൾ ശരീരത്തിൽ ഏൽക്കുന്നത് സൂര്യാതപം, ത്വക്ക് രോഗങ്ങൾ, നേത്രരോഗങ്ങൾ തുടങ്ങി വിവിധ ആരോഗ്യപ്രശ്നങ്ങൾക്ക് കാരണമാകാം. പൊതുജനങ്ങൾ ആവശ്യമായ മുൻകരുതലുകൾ സ്വീകരിക്കണമെന്ന് സംസ്ഥാന ദുരന്ത നിവാരണ അതോറിറ്റി മുന്നറിയിപ്പ് നൽകി.