വിവാദ സിനിമയായ കേരള സ്റ്റോറി 2 പ്രദർശിപ്പിക്കാൻ അനുമതി നൽകരുതെന്നും സെൻസർ സർട്ടിഫിക്കറ്റ് റദ്ദാക്കണമെന്നും ആവശ്യപ്പെട്ടുള്ള ഹർജി ഹൈക്കോടതി പരിഗണിച്ചു. ‘കേരള സ്റ്റോറി’ എന്ന പേരും ‘ട്രൂ സ്റ്റോറി’ എന്ന അവകാശവാദവും ഉയർത്തുന്ന ആശങ്കകൾ അവഗണിക്കാനാവില്ലെന്ന് കോടതി വ്യക്തമാക്കി.

സിനിമയുടെ ഉള്ളടക്കം എന്താണെന്ന് പരിശോധിക്കേണ്ടതുണ്ടെന്ന് കോടതി ചൂണ്ടിക്കാട്ടി. യഥാർത്ഥ സംഭവങ്ങളെ ആസ്പദമാക്കിയുള്ളതാണെന്ന അവകാശവാദം ശരിയാണോ എന്നതും പരിശോധിക്കപ്പെടണം എന്നായിരുന്നു കോടതിയുടെ നിലപാട്. സിനിമ കേരളത്തിന്റെ പ്രതിഛായയെ ബാധിക്കാമെന്ന വാക്കാൽ നിരീക്ഷണവും കോടതി നടത്തി.

ഹർജിക്കാരന്റെ വാദമനുസരിച്ച്, ചിത്രം കേരളത്തിലെ ഒരു സമൂഹത്തെ തെറ്റായ രീതിയിൽ ചിത്രീകരിക്കുകയും സംസ്ഥാനത്തെ വർഗീയതയുടെയും നിർബന്ധിത മതപരിവർത്തനത്തിന്റെയും കേന്ദ്രമായി അവതരിപ്പിക്കാൻ ശ്രമിക്കുകയും ചെയ്യുന്നു. ഇത് സാമൂഹിക ഐക്യത്തിനും നിയമ-ക്രമസമാധാനത്തിനും തിരിച്ചടിയാകാമെന്നും ഹർജിയിൽ പറയുന്നു.

സംവിധായകൻ കാമാക്യ നാരായണൻ സിംഗ് രാജ്യത്ത് നിലനിൽക്കുന്ന സാഹചര്യങ്ങളെയാണ് സിനിമ അവതരിപ്പിക്കുന്നതെന്നായിരുന്നു മറുപടി. കണ്ണൂർ ചിറ്റാരിപ്പറമ്പ് സ്വദേശിയായ ശ്രീദേവ് നമ്പൂതിരിയാണ് ഹർജി സമർപ്പിച്ചത്.

ചിത്രത്തിന്റെ ട്രെയ്‌ലർ പുറത്തിറങ്ങിയതിനു പിന്നാലെ വലിയ വിമർശനമാണ് ഉയർന്നത്. കേരളത്തിൽ ഹിന്ദു പെൺകുട്ടികളെ പ്രണയം നടിച്ച് നിർബന്ധിത മതംമാറ്റത്തിന് വിധേയരാക്കുന്നതായും, സമ്മതമില്ലാതെ ഭക്ഷണം കഴിക്കാൻ ഭീഷണിപ്പെടുത്തുന്നതായും ചിത്രീകരിക്കുന്ന രംഗങ്ങൾ ട്രെയ്‌ലറിൽ ഉൾപ്പെട്ടിട്ടുണ്ട്. ഇതിനെതിരെ വിവിധ സാമൂഹിക-രാഷ്ട്രീയ രംഗങ്ങളിൽ നിന്ന് ശക്തമായ പ്രതികരണങ്ങൾ ഉയർന്നിരുന്നു. മുൻപ് പിണറായി വിജയൻ അടക്കമുള്ളവർ ട്രെയ്‌ലറിനെതിരെ രംഗത്തെത്തിയിരുന്നു. സിനിമ വർഗീയ ധ്രുവീകരണത്തിന് കാരണമാകാമെന്നായിരുന്നു അവരുടെ ആശങ്ക.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്