ന്യൂഡല്‍ഹി: തലസ്ഥാനത്ത് വന്‍ പ്രതിഷേധത്തിന് പദ്ധതിയിട്ടെത്തിയ സിജെപി നേതാക്കളായ അഭിജിത് ദിപ്‌കെ, സൗരവ് ദാസ്, അശുതോഷ് റാംക എന്നിവരെ ഡല്‍ഹി വിമാനത്താവളത്തിലെത്തിച്ചേര്‍ന്ന ഉടന്‍ തന്നെ വിമാനത്തിനുള്ളില്‍ കയറി കസ്റ്റഡിയിലെടുത്ത ഡല്‍ഹി പൊലീസിന്റെ നീക്കം രാഷ്ട്രീയ-സുരക്ഷാ വൃത്തങ്ങളില്‍ വലിയ ചര്‍ച്ചയാകുന്നു. വിമാനത്തിനുള്ളിലേക്ക് വനിതാ ഉദ്യോഗസ്ഥരെ മാത്രം അയച്ച് നേതാക്കളെ നിയന്ത്രണത്തിലാക്കിയ പൊലീസിന്റെ തന്ത്രപരമായ നീക്കമാണ് ഇപ്പോള്‍ ശ്രദ്ധാകേന്ദ്രമായിരിക്കുന്നത്.
അതീവ സുരക്ഷാ മേഖലയായ ഇന്ദിരാഗാന്ധി അന്താരാഷ്ട്ര വിമാനത്താവളത്തില്‍ ലാന്‍ഡ് ചെയ്ത വിമാനത്തിനുള്ളിലെ ഇടുങ്ങിയ വഴികളില്‍ പുരുഷ പൊലീസിനെ ഉപയോഗിച്ച് ബലപ്രയോഗത്തിന് മുതിര്‍ന്നിരുന്നെങ്കില്‍ വലിയ സുരക്ഷാപ്രശ്‌നങ്ങള്‍ക്ക് വഴിവെക്കുമായിരുന്നു. പ്രതിഷേധക്കാരെ സാധാരണ തെരുവുകളില്‍ നേരിടുന്നതുപോലെയല്ല വിമാനത്തിനകം. വിമാനത്തിനുള്ളില്‍ ബലപ്രയോഗമോ തര്‍ക്കങ്ങളോ ഉണ്ടായാല്‍ അത് യാത്രക്കാര്‍ക്കിടയില്‍ പരിഭ്രാന്തി സൃഷ്ടിക്കുകയും വലിയ വിമര്‍ശനങ്ങള്‍ക്ക് ഇടയാക്കുകയും ചെയ്യുമായിരുന്നു.
എന്നാല്‍ വനിതാ ഉദ്യോഗസ്ഥരുടെ സംഘം എത്തിയതോടെ സിജെപി നേതാക്കള്‍ക്ക് വിമാനത്തിനുള്ളില്‍ വച്ച് ശാരീരികമായി ചെറുത്തുനില്‍പ്പ് നടത്താന്‍ സാധിക്കാത്ത സാഹചര്യമുണ്ടായി. 'ഞങ്ങളെ അറസ്റ്റ് ചെയ്യാന്‍ പുരുഷ പൊലീസിനെ അയക്കൂ' എന്ന് സൗരവ് ദാസും അശുതോഷ് റാംകയും ഉച്ചത്തില്‍ വിളിച്ചുപറയുന്നുണ്ടായിരുന്നെങ്കിലും, യാതൊരു പ്രകോപനത്തിനും ഇരയാകാതെ വനിതാ ഉദ്യോഗസ്ഥര്‍ നിയമപരമായ മുന്‍കരുതലുകളോടെ തന്നെ ഇവരെ പുറത്തേക്ക് നയിച്ചു.
കഴിഞ്ഞ ജൂലൈ 20-ന് ജന്തര്‍ മന്തറില്‍ നടന്ന പ്രക്ഷോഭത്തില്‍ പുരുഷ പൊലീസ് പ്രതിഷേധക്കാര്‍ക്ക് നേരെ നടത്തിയ ലാത്തിച്ചാര്‍ജ് വലിയ വിവാദമായിരുന്നു. പ്രത്യേകിച്ച് വനിതാ പ്രതിഷേധക്കാരെ പുരുഷ പൊലീസ് ക്രൂരമായി കൈകാര്യം ചെയ്‌തെന്ന പ്രചാരണം സിജെപിയുടെ പ്രക്ഷോഭത്തിന് വന്‍ ജനപിന്തുണയും ശ്രദ്ധയും നേടിക്കൊടുത്തിരുന്നു.
ആ സംഭവത്തിന്റെ പശ്ചാത്തലത്തില്‍, ഇത്തവണ തങ്ങള്‍ക്കെതിരെ യാതൊരുവിധ ക്രമസമാധാന/മനുഷ്യാവകാശ ലംഘന ആരോപണങ്ങളും ഉയര്‍ത്താന്‍ അവസരം നല്‍കരുതെന്ന് ഡല്‍ഹി പൊലീസ് ഉറപ്പിച്ചിരുന്നു. പുരുഷന്മാരെ അറസ്റ്റ് ചെയ്യാന്‍ വനിതാ ഉദ്യോഗസ്ഥര്‍ക്ക് നിയമതടസ്സങ്ങളൊന്നുമില്ലെന്ന കാര്യം കൃത്യമായി പ്രയോജനപ്പെടുത്തി പൊലീസ് തങ്ങളുടെ അപ്രതീക്ഷിത തന്ത്രത്തിലൂടെ സിജെപിയുടെ പ്ലാന്‍ ബി നീക്കങ്ങളെയും പൂര്‍ണ്ണമായി നിര്‍വീര്യമാക്കുകയായിരുന്നു.
വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ
ഇവിടെ ക്ലിക്ക് ചെയ്യുക
.
വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.
യൂട്യൂബ് ചാനൽ:വാചകം ന്യൂസ്
-20201011060828.jpg)
-(1)1-20261010063328.jpg)
