ഡൽഹി സീമാപുരിയിൽ അഞ്ചുനില കെട്ടിടം തകർന്നു; ഗർഭിണി ഉൾപ്പടെ മൂന്ന് മരണം, തിരച്ചിൽ തുടരുന്നു

OCTOBER 8, 2026, 5:10 AM

ഡൽഹിയിലെ അതിർത്തി പ്രദേശമായ ഈസ്റ്റ് സീമാപുരിയിൽ അഞ്ചുനില കെട്ടിടം തകർന്നു വീണുണ്ടായ അപകടത്തിൽ വൻ ദുരന്തം. ബുധനാഴ്ചയുണ്ടായ അപകടത്തിൽ ഒരു കുട്ടിയും നാല് മാസം ഗർഭിണിയായ യുവതിയും ഉൾപ്പെടെ മൂന്ന് പേർ മരണപ്പെടുകയും 11 പേരെ രക്ഷപ്പെടുത്തുകയും ചെയ്തു. സത്യാ നികേതനിൽ നടന്ന കെട്ടിട ദുരന്തത്തിന് ഒരു മാസത്തിന് ശേഷമാണ് ഡൽഹിയെ വീണ്ടും ഞെട്ടിച്ച് സമാനമായ സംഭവം റിപ്പോർട്ട് ചെയ്യുന്നത്.

തഹിർപൂരിലെ രാജീവ് ഗാന്ധി സൂപ്പർ സ്പെഷ്യാലിറ്റി ആശുപത്രിയിൽ പ്രവേശിപ്പിച്ച എട്ട് പരിക്കേറ്റവരിൽ മൂന്ന് വയസ്സുള്ള കുട്ടിയും ഉൾപ്പെടുന്നു. അപകടത്തിൽ സമീപത്തെ രണ്ട് കെട്ടിടങ്ങൾക്കും മസ്ജിദിന്റെ മതിൽക്കെട്ടിനും ഭാഗികമായി കേടുപാടുകൾ സംഭവിച്ചിട്ടുണ്ട്.

ഡൽഹി ഫയർ സർവീസ്, ഡൽഹി പോലീസ്, എം.സി.ഡി, എൻ.ഡി.ആർ.എഫ് (NDRF) ടീമുകൾ സ്ഥലത്തെത്തി തിരച്ചിൽ നടത്തുകയാണ്. അവശിഷ്ടങ്ങൾക്കിടയിൽ ഇനിയും ആളുകൾ കുടുങ്ങിക്കിടക്കാൻ സാധ്യതയുണ്ടെന്ന് ഷാഹ്ദര ഡി.സി.പി രാജേന്ദ്ര പ്രസാദ് മീന അറിയിച്ചു.