ദൈവക്കോലത്തെ അനുകരിച്ച സംഭവം: രൺവീർ സിങ്ങിനെതിരെയുള്ള കേസ് ഹൈക്കോടതി റദ്ദാക്കി

APRIL 25, 2026, 10:47 PM

ബെംഗളൂരു: സൂപ്പർഹിറ്റ് ചിത്രം 'കാന്താര'യിലെ ദൈവക്കോലത്തെ വികലമായി അനുകരിച്ചെന്ന പരാതിയിൽ ബോളിവുഡ് താരം രൺവീർ സിങ്ങിനെതിരെ എടുത്ത കേസ് കർണാടക ഹൈക്കോടതി റദ്ദാക്കി.

താൻ ചെയ്ത പ്രവൃത്തിയിൽ നടൻ നിരുപാധികം മാപ്പുപറയുകയും മൈസൂരുവിലെ ചാമുണ്ഡി ക്ഷേത്രം സന്ദർശിക്കാമെന്ന് ഉറപ്പുനൽകുകയും ചെയ്തതിനെത്തുടർന്നാണ് ജസ്റ്റിസ് എം. നാഗപ്രസന്ന അധ്യക്ഷനായ ബെഞ്ച് കേസ് തള്ളിയത്.

കഴിഞ്ഞ നവംബറിൽ ഗോവയിൽ നടന്ന അന്താരാഷ്ട്ര ചലച്ചിത്രമേളയുടെ സമാപനച്ചടങ്ങിൽ വച്ചായിരുന്നു വിവാദമായ അനുകരണം നടന്നത്. കാന്താരയിലെ നായകൻ ഋഷഭ് ഷെട്ടിയുടെ സാന്നിധ്യത്തിലായിരുന്നു രൺവീറിന്റെ പ്രകടനം.

മതവികാരം വ്രണപ്പെടുത്തിയെന്നും ചാമുണ്ഡി ദേവിയെ അധിക്ഷേപിച്ചെന്നും ആരോപിച്ച് ബെംഗളൂരുവിലെ അഭിഭാഷകനായ പ്രശാന്ത് മെത്തലാണ് പോലീസിൽ പരാതി നൽകിയത്. തുടർന്ന് ബെംഗളൂരു പോലീസ് നടനെതിരെ കേസെടുക്കുകയായിരുന്നു.

കേസ് റദ്ദാക്കണമെന്ന് ആവശ്യപ്പെട്ട് രൺവീർ സിങ് കോടതിയെ സമീപിക്കുകയും മാപ്പപേക്ഷിച്ചുകൊണ്ടുള്ള സത്യവാങ്മൂലം സമർപ്പിക്കുകയും ചെയ്തു. നടന്റെ പെരുമാറ്റം പൊതുവികാരത്തെ മുറിപ്പെടുത്തിയെന്ന് നിരീക്ഷിച്ച കോടതി, അടുത്ത നാലാഴ്ചയ്ക്കുള്ളിൽ മൈസൂരു ചാമുണ്ഡി ക്ഷേത്രം സന്ദർശിച്ച് പ്രായശ്ചിത്തം ചെയ്യാൻ നടനോട് നിർദേശിച്ചു.

രൺവീർ സിങ്ങിന്റെ ഏറ്റവും പുതിയ ചിത്രമായ 'ധുരന്തർ' വലിയ വിജയമായ സാഹചര്യത്തിൽ, യാത്ര ചെയ്യുമ്പോൾ ഉണ്ടാകാനിടയുള്ള സുരക്ഷാ പ്രശ്നങ്ങൾ അദ്ദേഹത്തിന്റെ അഭിഭാഷകൻ കോടതിയെ അറിയിച്ചിട്ടുണ്ട്. അതിനാൽ ക്ഷേത്രദർശനം നടത്തുന്ന കൃത്യമായ തീയതി ഇപ്പോൾ വെളിപ്പെടുത്തിയിട്ടില്ല. എങ്കിലും കോടതി ഉത്തരവ് അനുസരിച്ച് നിശ്ചിത സമയത്തിനുള്ളിൽ അദ്ദേഹം മൈസൂരുവിലെത്തും. ആരാധകർ ഏറെയുള്ള ഒരു താരം പൊതുവേദികളിൽ പെരുമാറുമ്പോൾ കൂടുതൽ ജാഗ്രത പാലിക്കണമെന്നും കോടതി ഓർമ്മിപ്പിച്ചു.